ດ່ວນ…! ສປປ.ລາວ ມີຜູ້ທີ່ປົວດີແລ້ວກັບມາມີເຊື້ອໂຄວິດ-19 ຄືນອີກ 1 ຄົນ ແລະ ເປັນມື້ທີ 20 ທີ່ບໍ່ພົບຜູ້ຕິດເຊື້ອໃໝ່

ອີກຕາມການຖະແຫຼງຂ່າວຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂພະຍາດໂຄວິດ-19 ປະຈຳວັນທີ 2 ພຶດສະພາ 2020 ໃຫ້ຮູ້ວ່າ: ໃນວັນທີ 1 ພຶດສະພາ ທີ່ຜ່ານມາ ໄດ້ເກັບຕົວຢ່າງທັງໝົດ 144 ຕົວຢ່າງ ນັ້ນໃນມີຜູ້ມີອາກາດສົງໄສເຂົ້າໄປກວດຢູ່ໂຮງໝໍ 3 ຄົນ, ຕົວຢ່າງຈາກຜູ້ທີ່ຕິດເຊື້ອນອນຢູ່ໂຮງໝໍ 3 ຄົນ, ຕົວຢ່າງຈາກຜູ້ທີ່ປົວດີແລ້ວ 1 ຄົນທີ່ອອກໄປຕິດຕາມຢູ່ເຮືອນພາຍຫຼັງຄົບຮອບ 14 ວັນ, ຕົວຢ່າງຈາກແຮງງານຈີນທີ່ເຂົ້າມາກໍ່ສ້າງທາງລົດໄຟ 127 ຄົນ ແລະ ຕົວຢ່າງຈາກແຮງງານລາວທີ່ກັບມາແຕ່ປະເທດໄທ 10 ຄົນ ໃນທັງໝົດນັ້ນ “ກວດບໍ່ພົບຜູ້ຕິດເຊື້ອໃໝ່”.

ແຕ່ຜູ້ຕິດເຊື້ອກໍລະນີທີ 14 ທີ່ອອກໂຮງໝໍໄປຕິດຕາມອາກາດຢູ່ເຮືອນ ແຕ່ວັນທີ 16 ເມສາ ທີ່ຜ່ານມາ ພາຍຫຼັງຄົບກຳນົດ 14 ວັນ ຄະນະສະເພາະກິດໄດ້ນຳເອົາຕົວຢ່າງມາກວດຄືນ ຜົນປາກົດວ່າ ຜູ້ກ່ຽວ “ພົບເຊື້ອຄືນ” ຈຶ່ງໄດ້ນຳກັບເຂົ້າມາຕິດຕາມຢູ່ໂຮງໝໍຄືເກົ່າ.

ໂດຍນັບແຕ່ເດືອນມັງກອນ ເຖິງວັນທີ 1 ມັງກອນ 2020 ໄດ້ມີການເກັບຕົວຢ່າງມາກວດແລ້ວ 2,165 ຕົວຢ່າງ ໃນນັ້ນພົບຜູ້ຕິດເຊື້ອ 19 ຄົນ ແລະ ມື້ນີ້ຖືເປັນມື້ທີ 20 ແລ້ວທີ່ບໍ່ພົບຢູ່ຕິດເຊື້ອໃໝ່ໃນ ສປປ.ລາວ, ສ່ວນຜູ້ມີເຊື້ອທີ່ຍັງຢູ່ໂຮງໝໍມີ 11 ຄົນ ໃນນັ້ນ 2 ຄົນກວດຫາເຊື້ອຄືນ 2 ຄັ້ງບໍ່ພົບເຊື້ອແລ້ວ ແມ່ນຈະໄດ້ອອກໂຮງໝໍໄປຕິດຕາມຢູ່ເຮືອນ, ສະຫຼຸບວ່າ ຕອນນີ້ແມ່ນມີຢູ່ຕິດເຊື້ອທີ່ຍັງຢູ່ໂຮງໝໍ 10 ຄົນ ຜູ້ຕິດເຊື້ອທີ່ຍັງບໍ່ໄດ້ອອກໂຮງໝໍເທື່ອ 9 ຄົນ ບວກກັບຜູ້ເກົ່າທີ່ກັບມາຕິດເຊື້ອອີກ 1 ຄົນ.

ເຊິ່ງໃນທົ່ວປະເທດ ມີສູນຈຳກັດຢູ່ 153 ສູນ ມີຜູ້ຈຳກັດຢູ່ສູນ 665 ຄົນ ແລະ ຈຳກັດຕົວເອງຢູ່ເຮືອນ 407 ຄົນ ແລະ ໄດ້ເກັບຕົວຢ່າງມາກວດ 705 ຄົນ ແຕ່ບໍ່ພົບເຊື້ອ.