ຜູ້ນຳເວເນຊູເອລາສະແດງຫຼັກຖານວ່າ ສ.ອາເມຣິກາ ໄດ້ພະຍາຍາມໂຄ່ນລົ້ມອຳນາດຂອງຕົນ

ລາຍງານ 7 ພຶດສະພາ 2020, ສືບເນື່ອງມາຈາກການທີ່ລັດຖະບານເວເນຊູເອລາ ໄດ້ທຳການຈັບກຸມທະຫານຮັບຈ້າງ ທີ່ເດີນທາງດ້ວຍເຮືອໄວມາຈາກໂກໂລມບີ ພະຍາມຂຶ້ນຝັ່ງທີ່ເມືອງລາ ກວຍຣາ ເມືອງເອກຂອງລັດບາກັສ ທາງພາກເໜືອຂອງປະເທດເວເນຊູເອລາ ເມື່ອວັນອາທິດ (3 ພຶດສະພາ) ທີ່ຜ່ານມາ ເຊິ່ງລັດຖະບານເວເນຊູເອລາກ່າວວ່າ ເປັນການຮຸກຮານທາງທະເລທີ່ມີຈຸດປະສົງເພື່ອໂຄ່ນລົ້ມອຳນາດລັດຖະບານເວເນຊູເອລາ ພາຍໃຕ້ການນຳຂອງທ່ານປະທານປະເທດ ນິໂຄລັສ ມາດູໂຣ.

ຜູ້ນຳເວລາຊູເອລາຖະແຫຼງເມື່ອວັນພຸດ (6 ພຶດສະພາ) ທີ່ຜ່ານມາວ່າ ຜູ້ຖືກຈັບກຸມຈາກເຫດການດັ່ງກ່າວມີທັງໝົດ 13 ຄົນ ລວມມີຄົນສັນຊາດອາເມຣິກາ 2 ຄົນຄືທ້າວ ລຸກ ເດນແມນ ອາຍຸ 34 ປີ ແລະ ທ້າວ ໄອແຣນ ແບຣີ ອາຍຸ 41 ປີ ເບື້ອງຕົ້ນທັງສອງໃຫ້ການຕໍ່ພະນັກງານສືບສວນສອບສວນວ່າ ໄດ້ຮັບຈ້າງໃຫ້ມາເຝິກອາວຸດໃຫ້ກັບຄົນເວເນຊູເອລາໃນໂກໂລມບີ ໂດຍເປົ້າໝາຍຂອງພາລະກິດຄື ການນຳຕົວທ່ານ ນິໂຄລັສ ມາດູໂຣຂຶ້ນຍົນໄປຍັງ ສ.ອາເມຣິກາ ແຕ່ຍັງບໍ່ຊັດເຈນວ່າຈະນຳຕົວຜູ້ນຳເວເນຊູເອລາອອກຈາກທຳນຽບໄດ້ດ້ວຍວິທີໃດ.

ຂະນະທີ່ຜູ້ຈ້າງຄືທ້າວ ຈໍແດນ ກູໂດຣ ອະດີດທະຫານຜ່ານເສິກສັນຊາດອາເມຣິກາ ທີ່ເປີດບໍລິສັດຢູ່ລັດຟໍຣິດາຊື່ ຊິວເວີຄັອບ ໃຫ້ບໍລິການດ້ານທະຫານຮັບຈ້າງໂດຍສະເພາະ, ນອກຈາກນີ້ທ້າວ ເດນແມນ ກ່າວເຖິງທ່ານ ຮວນ ກວຍໂດ ຜູ້ນຳຝ່າຍຄ້ານຂອງເວເນຊູເອລາ ທີ່ລັດຖະບານ ສ.ອາເມຣິກາ ໃຫ້ການສະໜັບສະໜູນໃຫ້ເປັນຜູ້ນຳຄູ່ຂະໜານກັບທ່ານ ນິໂຄລັສ ມາດູໂຣ ເປັນຜູ້ລົງນາມໃນສັນຍາວ່າຈ້າງກັບບໍລິສັດຊິວເວີຄັອບ.

ເຊິ່ງທ່ານ ນິໂຄລັສ ມາດູໂຣກ່າວ່າ ຄຳໃຫ້ການຂອງພົນລະເມືອງອາເມຣິກທັງສອງຄົນຊັດເຈນວ່າ ລັດຖະບານ ສ.ອາເມຣິກາ ພາຍໃຕ້ການນຳຂອງທ່ານ ໂດໂນ ທຣຳ ຢູ່ເບື້ອງຫຼັງເລື່ອງນີ້ ແລະ ມີໂກໂລມບີຮ່ວມໃຫ້ການສະໜັບສະໜູນ, ເຊິ່ງຜູ້ນຳເວເນຊູເອລາປະຕິເສດທີ່ຈະບອກວ່າຈັບກຸ່ມທ້າວ ເດນແມນ ແລະ ແບຣີໄວ້ໃສ ລວມທັງຂໍ້ມູນຂອງຜູ້ຖືຈັບອີກ 11 ຄົນ, ແຕ່ກ່າວເຈາະຈົງເຖິງຊາວອາເມຣິກາທັງສອງຄົນວ່າ ຈະໄດ້ຮັບການສືບສວນສອບສວນຢ່າງເປັນທຳ.

ຕໍ່ມາທີມງານຂອງທ່ານ ຮວນ ກວຍໂດ ອອກມາປະຕິເສດການມີສ່ວນກ່ຽວຂ້ອງກັບທ້າວ ເດນແມນ ແລະ ແບຣີ, ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຢືນຢັນວ່າລັດຖະບານ ສ.ອາເມຣິກາ ບໍ່ໄດ້ກ່ຽວຂ້ອງກັບເລື່ອງນີ້ ແຕ່ຈະດຳເນີນການທຸກວິຖີທາງ ເພື່ອນຳຕົວທ້າວ ເດນແມນ ແລະ ແບຣີກັບຄືນປະເທດໃຫ້ໄດ້.




ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube