ປ.ທຣຳ ປະກາດຖອນ ສ.ອາເມຣິກາ ອອກຈາກການເປັນສະມາຊິກອົງການອະນາໄມໂລກ

ລາຍງານ 30 ພຶດສະພາ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຖະແຫຼງເມື່ອວັນສຸກ (29 ພຶດສະພາ) ທີ່ຜ່ານມາ ວ່າ ສ.ອາເມຣິກາກຳລັງດຳເນີນການຕາມຂັ້ນຕອນ ເພື່ອຍຸຕິສະຖານະພາບການເປັນສະມາຊິກຂອງອົງການອະນາໄມໂລກ (WHO) ແລະ ຈະເຄື່ອນງົບປະມານທີ່ເຄີຍຈັດສັນເພື່ອສະໜັບສະໜູນອົງກອນແຫ່ງນີ້ ໄປຊ່ວຍເຫຼືອໜ່ວຍງານດ້ານສາທາລະນະສຸກລະຫວ່າງປະເທດແຫ່ງອື່ນແທນ.

ຜູ້ນຳ ສ.ອາເມຣິກາກ່າວຕື່ມວ່າ: ຈີນມີອິດທິພົນໂດຍສົມບູນ ເໜືອການປະຕິບັດງານຂອງອົງການອະນາໄມໂລກໃນທຸກດ້ານ, ໃນຂະນະທີ່ໂລກກຳລັງສະແຫວງຫາຄວາມຈິງ ກ່ຽວກັບວິກິດການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ ແຕ່ລັດຖະບານຈີນຜັດໃຊ້ອຳນາດກົດດັນໃຫ້ອົງການອະນາໄມໂລກຊັກນຳຊາວໂລກໄປໃນທາງທີ່ຜິດ ຈົນທຸກຝ່າຍຕ້ອງເຈັບປວດກັບການກະທຳໂດຍບໍ່ຖືກຕ້ອງຂອງຈີນ ໂດຍສະເພາະປະຊາຊົນອາເມຣິກາຫຼາຍກວ່າ 100,000 ຄົນຕ້ອງເສຍຊີວິດຈາກວິກິດໂລກລະບາດທີ່ຈີນເຮັດໃຫ້ເກີດຂຶ້ນ.

ເຖິງແມ່ນວ່າການປະກາດັ່ງກ່າວຂອງທ່ານ ໂດໂນ ທຣຳ ບໍ່ແມ່ນສິ່ງທີ່ເໜືອຄວາມຄາດໝາຍ ເນື່ອງຈາກຜູ້ນຳ ສ.ອາເມຣິກາໄດ້ສົ່ງໜັງສືເຖິງທ່ານ ເທດຼອສ ແອດນາຮອມ ເກເບຼເຢຊຸສ ຜູ້ນຳອຳນວຍອົງການອະນາໄມໂລກ ເມື່ອວັນທີ 18 ພຶດສະພາ ທີ່ຜ່ານມາ ທີ່ລະບຸເຖິງຄວາມຜິດພາດຂອງອົງການອະນາໄມໂລກພາຍໃຕ້ການບໍລິຫານຂອງທ່ານ ເທດຼອສ ໃນການຮັບມື ແລະ ຕອບສະໜອງຕໍ່ໂລກລະບບາດໂຄວິດ-19 ແລະ ກ່າວຫາໜ່ວຍງານແຫ່ງນີ້ ທີ່ເປັນໜຶ່ງໃນໜ່ວຍງານທີ່ຂຶ້ນກັບອົງການສະຫະປະຊາຊາດ ວ່າເປັນຫຸ່ນຂອງລັດຖະບານຈີນ ໂດຍທ່ານ ໂດໂນ ທຣຳ ຍື່ນຄຳຂາດໃຫ້ອົງການອະນາໄມໂລກ ປັບປຸງຕົວເອງພາຍໃນ 30 ວັນ ຖ້າບໍ່ດັ່ງນັ້ນຕົນຈະຍົກລະດັບມາດຕະການ ທີ່ລວມເຖິງການພິຈາລະນາລາອອກຈາກອົງການອະນາໄມໂລກ.

ເຊິ່ງຂໍ້ມູນຈາກອົງການອະນາໄມໂລກລະບຸວ່າ ສ.ອາເມຣິກາຄືປະເທດຜູ້ບໍລິຈາກລາຍໃຫຍ່ທີ່ສຸດ ດ້ວຍສະຖິຕິ 450 ລ້ານໂດລາສະຫະລັດ ເມື່ອປີງົບປະມານ 2019, ສ່ວນຈີນບໍລິຈາກ 40 ລ້ານໂດລາສະຫະລັດ ເຊິ່ງສະແດງວ່າການລາອອກຂອງ ສ.ອາເມຣິກາ ຈະສົ່ງຜົນຕໍ່ສະຖຽນລະພາບທາງການເງິນຂອງອົງການອະນາໄມໂລກຫຼາຍ.

ເຖິງຢ່າງໃດກໍ່ຕາມ, ທ່ານ ສີ ຈິ້ນຜິງ ປະທານປະເທດຈີນ ກ່າວຕໍ່ກອງປະຊຸມສະມັດຊາອົງການອະນາໄມໂລກ ເມື່ອກາງເດືອນນີ້ ວ່າຈີນກຽມບໍລິຈາກອີກ 2,000 ລ້ານໂດລາສະຫະລັດ ພາຍໃນໄລຍະເວລາ 2 ປີຕໍ່ຈາກນີ້ ເພື່ອສະໜັບສະໜູນພາລະກິດຂອງອົງການອະນາໄມໂລກ ໃນການຕໍ່ສູ້ກັບການແຜ່ລະບາດຂອງພະຍາດໂຄວິດ-19.

HTML tutorial