ສະຫະພາບເອີຣົບວ່າ ສ.ອາເມຣິກາຄວນທົບທວນຄືນ ເລື່ອງການຕັດສິນໃຈຈະລາອອກຈາກອົງການອະນາໄມໂລກ

ລາຍງານ 31 ພຶດສະພາ 2020, ພາຍຫຼັງທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ປະກາດເມື່ອວັນສຸກ (29 ພຶດສະພາ) ທີ່ຜ່ານມາ ວ່າລັດຖະບານ ສ.ອາເມຣິກາ ກຳລັງດຳເນີນການຕາມຂັ້ນຕອນ ເພື່ອຍຸຕິສະຖານະພາບການເປັນສະມາຊິກຂອງອົງການອະນາໄມໂລກ (WHO) ແລະ ຈະເຄື່ອນຍ້າຍງົບປະມານທີ່ເຄີຍສະໜັບສະໜູນໜ່ວຍງານແຫ່ງນີ້ ໄດ້ຊ່ວຍເຫຼືອການດຳເນີນງານຂອງອົງການດ້ານສາທາລະນະສຸກລະຫວ່າງປະເທດແຫ່ງອື່ນແທນ ເນື່ອງຈາກອົງການອະນາໄມໂລກລົ້ມແຫຼວໃນການບໍລິຫານຈັດການບັນຫາການແຜ່ລະບາດຂອງພະຍາດໂຄວິດ-19 ແລະ ເປັນອົງກອນທີ່ຢູ່ພາຍໃຕ້ອິດທິພົນຂອງ ສປ.ຈີນ.

ທ່ານ ນາງ ອົວຊູລາ ຟອນ ແດ ເລເຢັນ ປະທານຄະນະກຳມາທິການເອີຣົບ ກ່າວວ່າທ່າມກາງວິກິດດ້ານສາທາລະນະສຸກແບບນີ້ ໂລກຄວນປະສານການຮ່ວມມືຫຼາຍກວ່າການໂດດດ່ຽວຕົນເອງ, ສະຫະພາບເອີຣົບ (EU) ຂໍໃຫ້ ສ.ອາເມຣິກາ ທົບທວນຄືນການຕັດສິນໃຈຂອງຕົນເອງ.

ໃນດ້ານຂອງທ່ານ ເຢນ ສະພານ (Jens Spahn) ລັດຖະມົນຕີກະຊວງສາທາລະນະສຸກຂອງເຢຍລະມັນ ວິຈານການຕັດສິນໃຈຂອງຜູ້ນຳ ສ.ອາເມຣິກາ ວ່າໜ້າຜິດຫວັງ ແຕ່ເຫັນດີນຳກັບລັດຖະບານ ສ.ອາເມຣິກາ ຕໍ່ກັບບັນຫາທີ່ວ່າ ອົງການອະນາໄມໂລກຕ້ອງປະຕິຮູບ, ຂະນະທີ່ທຳນຽມນາຍົກລັດຖະມົນຕີອັງກິດອອກຖະແຫຼງການວ່າ ວິກິດການແຜ່ລະບາດຂອງພະຍາດໂຄວິດ-19 ເປັນຄວາມທ້າທາຍທີ່ທົ່ວໂລກປະເຊີນຮ່ວມກັນ ອົງການອະນາໄມໂລກຄືໜ່ວຍງານລະຫວ່າງປະເທດ ທີ່ມີບົດບາດສຳຄັນຢ່າງຍິ່ງຕໍ່ບັນຫານີ້ ແລະ ອັງກິດບໍ່ມີນະໂຍບາຍຍຸຕິການສະໜັບສະໜູນດ້ານການເງິນໃຫ້ແກ່ອົງການອະນາໄມໂລກ.

ໃນອີກດ້ານໜຶ່ງທ່ານ ລາມາ ອະເລັກຊານເດີ ປະທານຄະນະກຳມາທິການສາທາລະນະສຸກປະຈຳສະພາສູງ ສ.ອາເມຣິກາ ກ່າວວ່າການລາອອກຈາກອົງການອະນາໄມໂລກອາດມີຜົນກະທົບຕໍ່ການດຳເນີນງານຂອງທຸກພາກສ່ວນໃນປະເທດ ບໍ່ວ່າຈະເປັນພາກລັດ ຫຼື ພາກເອກະຊົນ ທີ່ກຳລັງຮີບຮ້ອນເລັ່ງດ່ວນຄິດຄົ້ນ ແລະ ພັດທະນາວັກແຊັງປ້ອງກັນໂລກໂຄວິດ-19, ສ່ວນອົງການອະນາໄມໂລກ ແລະ ສປ.ຈີນ ຍັງບໍ່ສະແດງຈຸດຢືນຂອງຕົນຢ່າງເປັນທາງການຕໍ່ບັນຫານີ້.

ໂດຍຍັງບໍ່ຊັດເຈນວ່າ ຂະບວນການຍຸຕິສະຖານະພາບການເປັນສະມາຊິກອົງການອະນາໄມໂລກຂອງ ສ.ອາເມຣິກາ ເລີ່ມຂຶ້ນແລ້ວຫຼືບໍ່, ເຖິງຢ່າງໃດກໍ່ຕາມ ຕາມຂໍ້ຕົກລົງທີ່ລັດຖະບານ ສ.ອາເມຣິກາ ລົງນາມເຂົ້າເປັນສາມຊິກຂອງອົງການອະນາໄມໂລກ ເມື່ອປີ 1948 ລະບຸວ່າ ຂະບວນການລາອອກຕ້ອງໃຊ້ເວລາດຳເນີນການຢ່າງໜ້ອຍ 1 ປີ.