ສື່ ສປ.ຈີນ ຕັ້ງວົງວິຈານການປະທ້ວງສີຜິວ ໃນ ສ.ອາເມຣິກາ ວ່າພົບພໍ້ກັບໂຕເອງແລ້ວ ຫຼັງຈາກວິຈານແຕ່ຊາດອື່ນ

ລາຍງານ 1 ມິຖຸນາ  2020, ທີ່ຜ່ານມາລັດຖະບານຈີນເຄີຍສະແດງຄວາມບໍ່ພໍໃຈກັບກະແສວິພາກວິຈານ ຈາກລັດຖະບານຂອງບັນດາປະເທດຕາເວັນຕົກ ໂດຍສະເພາະຢ່າງຍິ່ງລັດຖະບານ ສ.ອາເມຣິກາ ຕໍ່ກັບບັນຫາການແກ້ໄຂເຫດການປະທ້ວງຮຽກຮ້ອງປະຊາທິປະໄຕໃນຮົງກົງ.

ແຕ່ຂະນະນີ້ໄດ້ເກີດເຫດຄວາມວຸ້ນວາຍໄປທົ່ວປະເທດ ສ.ອາເມຣິກາ ອັນເນື່ອງມາຈາກການໂຮມຊຸມນຸມປະທ້ວງ ເນື່ອງຈາກເລື່ອງຄວາມບໍ່ເປັນທຳຕໍ່ກັບຊາວຜິວສີ ແລະ ເຊື້ອຊາດອັນເກີດຈາກການກະທຳຂອງເຈົ້າໜ້າທີ່ຕຳຫຼວດຜິວຂາວ ທີ່ຈັບກຸມຊາຍຜິວສີ ນັ້ນກໍ່ຄືທ້າວ ຈອສ ຟລອຍ ໃນເມືອງມິນນິແອໂພລິສ ລັດມິນນິໂຊຕາ ຈົນເສຍຊີວິດ ໂດຍເຫດເກີດເມື່ອວັນຈັນ (25 ພຶດສະພາ) ທີ່ຜ່ານມາ, ຕໍ່ກັບບັນຫານີ້ ໂຄສົກລັດຖະບານຈີນ ແລະ ສື່ທາງການຈີນໄດ້ອອກມາວິພາກວິຈານລັດຖະບານ ສ.ອາເມຣິກາເຊັ່ນກັນ ພ້ອມກັບເຜີຍແຜ່ວິດີໂອການກະທຳຂອງເຈົ້າໜ້າທີ່ຕຳຫຼວດຮົງກົງໃນເຫດການຊຸມນຸມປະທ້ວງ ວ່າມີຄວາມອົດທົນອົດກັ້ນຫຼາຍກວ່າການກະທຳຂອງເຈົ້າໜ້າທີ່ຕຳຫຼວດ ສ.ອາເມຣິກາ ໃນການຄວບຄຸມສະຖານະການການປະທ້ວງ.

ໂດຍທ່ານ ຮູ ຊີຈິນ ບັນນາທິການຂອງໜັງສືພິມ Global Times ກ່າວວ່າ ນັກການເມືອງ ສ.ອາເມຣິກາ ທີ່ເຄີຍກ່າວເຖິງເຫດການປະທ້ວງທີ່ຮຸນແຮງໃນຮົງກົງ ບັດນີ້ໄດ້ເຫັນເຫດການແບບດຽວກັນເກີດຂຶ້ນໃນປະເທດຂອງຕົນເອງແລ້ວ, ໃນຂະນະທີ່ບົດບັນນາທິການໜັງສືພິມ China Daily ເຊິ່ງເປັນກະບອກສຽງຂອງພັກຄອມມູນິດຈີນ ກ່າວວ່າ ເຫດຄວາມຮຸນແຮງທີ່ເກີດຂຶ້ນ ແລະ ກຳລັງແຜ່ລາມໄປທົ່ວປະເທດ ສ.ອາເມຣິການັ້ນ ນັກການເມືອງ ສ.ອາເມຣິກາ ຄວນປະຕິບັດໜ້າທີ່ ແລະ ຊ່ວຍກັນແກ້ໄຂບັນຫາພາຍໃນປະເທດ ແທນການສ້າງບັນຫາໃໝ່ ແລະ ໄປສ້າງຄວາມຫຍຸ້ງຍາກໃນປະເທດອື່ນ.

HTML tutorial