ຈີນວ່າການຈຳແນກສີຜິວຍັງຝັງຮາກເລິກໃນສັງຄົມ ສ.ອາເມຣິກາ ພ້ອມຮຽກຮ້ອງໃຫ້ແກ່ໄຂດ້ວຍຄວາມເທົ່າທຽມ

ລາຍງານ 1 ມິຖຸນາ 2020, ທ່ານ ຈ້າວ ລີຈ້ຽນ ໂຄສົກກະຊວງການຕ່າງປະເທດຈີນ ກ່າວໃນຕອນໜຶ່ງຂອງການຖະແຫຼງປະຈຳວັນຈັນນີ້ ກ່ຽວກັບສະຖານະການການປະທ້ວງສີຜິວໃນ ສ.ອາເມຣິກາ ທີ່ຍັງທະວີຄວາມຮຸນແຮງ ໂດຍມີຊະນວນເຫດມາຈາກການເສຍຊີວິດຂອງທ້າວ ຈອສ ຟລອຍ ຄົນຜິວສີ ອາຍຸ 46 ປີ ທີ່ລັດມິນນິໂຊຕາ ວ່າການເລືອກປະຕິບັດທາງເຊື້ອຊາດ ແລະ ສີຜິວເປັນບັນຫາທີ່ຝັ່ງເລິກໃນ ສ.ອາເມຣິກາ ມາຍາວນານ.

ດ້ວຍເຫດນີ້, ລັດຖະບານຈີນຈຶ່ງຫວັງເປັນຢ່າງຍິ່ງວ່າ ລັດຖະບານ ສ.ອາເມຣິກາ ພາຍໃຕ້ການນຳຂອງທ່ານ ໂດໂນ ທຣຳ ຈະດຳເນີນການໂດຍໃຊ້ມາດຕະການທີ່ຈຳເປັນຕາມກອບຂອງກົດໝາຍ ເພື່ອແກ້ໄຂການໃຊ້ອຳນາດຂອງຕຳຫຼວດໃນປະເທດ ເພື່ອປົກປ້ອງ ແລະ ຮັກສາໄວ້ເຊິ່ງຜົນປະໂຫຍດອັນຊອບທຳຕາມກົດໝາຍ ຂອງບັນດາກຸ່ມຊົນຊາດຊົນເຜົ່າໃນ ສ.ອາເມຣິກາ ທີ່ມີເປັນຈຳນວນຫຼາຍ.

ຂະນະດຽວກັນ, ທ່ານ ຈ້າວ ລີຈ້ຽນ ກ່າວເຖິງສະຖານະການການປະທ້ວງສີຜິວໃນ ສ.ອາເມຣິກາ ວ່າຍິ່ງເຮັດໃຫ້ເຫັນເຖິງຄວາມສອງມາດຕະຖານ ດ້ານນະໂຍບາຍຂອງລັດຖະບານ ສ.ອາເມຣິກາ ທີ່ຮຽກກຸ່ມຜູ້ປະທ້ວງໃນຮົງກົງ ທີ່ມີເປົ້າໝາຍຊັເຈນໃນເລື່ອງການແບ່ງແຍກດິນແນວ່າ ນັກສູ້, ແຕ່ເມື່ອກ່າວເຖິງຜູ້ປະທ້ວງທີ່ຮຽກຮ້ອງຄວາມເທົ່າທຽມທາງສີຜິວພາຍໃນປະເທດຜັດໃຊ້ຄຳວ່າ ຜູ້ກໍ່ເຫດຈະລາຈົນ ແລະ ຍັງວິຈານການປະຕິບັດໜ້າທີ່ຂອງຕຳຫຼວດຮົງກົງໃນການຄວບຄຸມສະຖານະການປະທ້ວງ ທັງທີ່ເປັນການດຳເນີນງານຕາມກົດໝາຍ, ໃນຂະນະທີ່ຫຼາຍສິບລັດຂອງ ສ.ອາເມຣິກາ ເອງກໍ່ຍັງໄດ້ສົ່ງກອງກຳລັງປ້ອງກັນຊາດລົງພື້ນທີ່ຄວບຄຸມສະຖານະການເຊັ່ນກັນ.