ກອງທັບ ສ.ອາເມຣິກ ສະແດງຄວາມຮັກຫອມປະຊາຊົນ ຖອນກຳລັງຈາກນະຄອນຫຼວງວໍຊິງຕັນ

ລາຍງານ 6 ມິຖຸນາ 2020, ກະຊວງປ້ອງກັນປະເທດ ສ.ອາເມຣິກາ ເປີດເຜີຍເມື່ອວັນສຸກ (5 ມິຖຸນາ) ທີ່ຜ່ານມາ ວ່າກະຊວງປ້ອງກັນປະເທດໄດ້ເລີ່ມເຄື່ອນກຳລັງພົນ 900 ຄົນ ທີ່ເດີນທາງມາຈາກຖານທັບຟອດ ແບຣກ ໃນລັດນໍແຄໂຣໄລນາ ແລະ ຖານທັບຟອດ ດຣຳ ໃນລັດນິວຟອກ ກັບໄປຍັງຖານທີ່ຕັ້ງແລ້ວ ພາຍຫຼັງກ່ອນໜ້ານັ້ນພຽງວັນດຽວ ເຈົ້າໜ້າທີ່ປະມານ 700 ຄົນສັງກັດກອງພົນສົ່ງກຳລັງທາງອາກາດທີ 82 ເດີນທາງກັບໄປຍັງຖານທັບຟອດ ແບຣກ.

ເຊິ່ງກອງທັບ ສ.ອາເມຣິກາເຄື່ອນກຳລັງປະມານ 1,600 ຄົນຈາກຖານທັບທັງສອງແຫ່ງ ໃຫ້ມາເສີມກຳລັງຕາມຖານທັບທີ່ຢູ່ຮອບນອກຂອງນະຄອນຫຼວງວໍຊິງຕັນ ເມື່ອວັນພຸດທີ່ຜ່ານມາ ທ່າມກາງສະຖານະການການປະທ້ວງ ແລະ ເຫດຈະລາຈົນທາງສີຜິວທີ່ເຄັ່ງຕຶງ ແລະ ຮຸນແຮງໃນຫຼາຍພື້ນທີ່ ຈາກການເສຍຊີວິດຂອງທ້າວ ຈອສ ຟລອຍ ຄົນຜິວສີທີ່ເມືອງມິນແອໂພລິສ ໃນລັດມິນນິໂຊຕາ ເຊິ່ງຖືກຕຳຫຼວດຜິວຂາວໃຊ້ຫົວເຂົ່າກົດໃສ່ຄໍຈົນຂາດລົມຫາຍໃຈ ລະຫວ່າງການຈັບກຸມເມື່ອວັນທີ 25 ພຶດສະພາ ທີ່ຜ່ານມາ.

ເຖິງຢ່າງໃດກໍ່ຕາມ, ກະຊວງປ້ອງກັນປະເທດ ສ.ອາເມຣິກາຢືນຢັນວ່າ ທະຫານທັງ 1,600 ຄົນເຫຼົ່ານີ້ບໍ່ໄດ້ປາກົດຕົວໃນເຂດໃຈກາງນະຄອນຫຼວງວໍຊິງຕັນ ແລະ ບໍ່ຫຍຸ້ງກ່ຽວກັບພາລະກິດດ້ານຄວາມໝັ້ນຄົງ, ແຕ່ທະຫານສັງກັດກົມທະຫານຮາບທີ 3 ເຊິ່ງໂດຍປົກກະຕິປະຈຳການຢູ່ຖານທັບຟອດ ໄມເອີ ໃນລັດເວີຈິເນຍ ຢູ່ໃກ້ກັບນະຄອນຫຼວງວໍຊິງຕັນ ແລະ ເປັນທະຫານທີ່ຊາວອາເມຣິກາຂ້ອນຂ້າງຄຸ້ນຕາ ຈາກການຜັດປ່ຽນເວນຍາມອາຮັກຂາສຸສານທະຫານນິລະນາມ ໄດ້ຮັບຄຳສັ່ງໃຫ້ຢູ່ໃນສະຖານະພ້ອມປະເຊີນກັບສະຖານະການສຸກເສີນພາຍໃນ 30 ນາທີ.

ການເຄື່ອນໄຫວດັ່ງກ່າວຂອງກອງທັບ ສ.ອາເມຣິກາ ເກີດຂຶ້ນໃນເວລາດຽວກັບທີ່ມີລາຍງານວ່າ ທ່ານ ມາກ ເອສເປີ ລັດຖະມົນຕີກະຊວງປ້ອງກັນປະເທດ ແລະ ທ່ານ ພົນເອກ ມາກ ມິວລີ ປະທານຄະນະເສນາທິການທະຫານຮ່ວມ ສ.ອາເມຣິກາ ປະຕິເສດເຂົ້າຮ່ວມປະຊຸມກັບຄະນະກຳມາທິການດ້ານອາວຸດຂອງປະທານສະພາຜູ້ແທນປະຊາຊົນ ໃນວັນອັງຄານ 9 ມິຖຸນານີ້, ສ່ວນທ່ານ ໄຣອັນ ແມັກຄາທີ ເລຂາທິການກອງທັບບົກ ຍົກເລີກກຳນົດການເຂົ້າພົບກັບຄະນະກຳມາທິການຊຸດດຽວກັນ ເມື່ອວັນສຸກ ທີ່ຜ່ານມາດ້ວຍ.

ທ່າມກາງການວິເຄາະຂອງຫຼາຍຝ່າຍ ວ່າກະຊວງປ້ອງກັນປະເທດ ສ.ອາເມຣິກາ ກຳລັງພະຍາຍາມສຸດຄວາມສາມາດ ເພື່ອກອບກູ້ພາບລັກຂອງຕົນເອງໃນສາຍຕາປະຊາຊົນ ພາຍຫຼັງທີ່ທ່ານ ພົນເອກ ມາກ ມິວລີ ແລະ ທ່ານ ມາກ ເອັສເປີ ຍ່າງຕາມຫຼັງທ່ານ ໂດໂນ ທຣຳ ປະທານປະເທດ ສ.ອາເມຣິກາ ອອກຈາກທຳນຽບຂາວໄປຍັງໂບສເຊັນຈອນ ບໍ່ດົນຫຼັງຈາກມີການສະຫຼາຍການຊຸມນຸມ ແລະ ເຫດການນີ້ຍິ່ງເພີ່ມຄວາມເຄັ່ງຕຶງຢ່າງໜັກລະຫວ່າງທ່ານ ໂດໂນ ທຣຳ ແລະ ກະຊວງປ້ອງກັນປະເທດ ທີ່ຄັດຄ້ານການທີ່ຜູ້ນຳ ສ.ອາເມຣິກາ ຕ້ອງການໃຫ້ທະຫານເປັນຜູ້ຍຸຕິການຊຸມນຸມປະທ້ວງຄັ້ງນີ້.