ສັງຄົມ ສ.ອາເມຣິກາຮັບບໍ່ໄດ້ຕໍ່ການກະທຳຂອງຕຳຫຼວດ ທີ່ຊຸກຜູ້ປະທ້ວງສູງອາຍຸລົ້ມຫົວຟາດພື້ນຈົນເລືອດອອກຫູ

ລາຍງານ 6 ມິຖຸນາ 2020, ສືບເນື່ອງມາຈາກມີວິດີໂອທີ່ຕຳຫຼວດ ສ.ອາເມຣິກາ 2 ຄົນໃນເມືອງບັບຟາໂລ ເຊິ່ງເປັນເມືອງໃຫຍ່ອັນດັບ 2 ຂອງລັດນິວຢອກ ມີສ່ວນກ່ຽວຂ້ອງກັບການຊຸກຜູ້ປະທ້ວງເພດຊາຍ ອາຍຸ 75 ປີ ລົ້ມລົງຫົວຟາດພື້ນຢ່າງຮຸນແຮງຈົນເລືອດອອກຫູ ຫຼັງຈາກທີ່ຊາຍຄົນດັ່ງກ່າວໄດ້ຢ່າງເຂົ້າໄປສົນທະນາບາງຢ່າງກັບເຈົ້າໜ້າທີ່ ເມື່ອວັນພະຫັດທີ່ຜ່ານມາ ແລະ ຕໍ່ມາຫ້ອງການຕຳຫຼວດເມືອງບັບຟາໂລ ໄດ້ສັ່ງພັກວຽກເຈົ້າໜ້າທີ່ທັງສອງໂດຍບໍ່ມີກົນດ ແລະ ບໍ່ໄດ້ຮັບຄ່າຕອບແທນ ພ້ອມທັງຄັ້ງຄະນະປະຕິບັດງານພິເສດສືບສວນສອບສວນບັນຫາດັ່ງກ່າວທັງໝົດ.

ຕໍ່ມາສື່ທ້ອງຖິ່ນຫຼາຍແຫ່ງລາຍງານວ່າ ເຈົ້າໜ້າທີ່ທີ່ຖືກພັກວຽກທັງສອງສັງກັດຢູ່ໜ່ວຍບຸກໂຈມຕີທາງຍຸດທະສາດຕໍ່ເຫດການບໍ່ສະຫງົບ ແລະ ຈະລາຈົນ ປະຈຳຫ້ອງການຕຳຫຼວດບັບຟາໂລ, ຂະນະທີ່ເຈົ້າໜ້າທີ່ໃນສັງກັດໜ່ວຍດຽວກັນອີກ 57 ຄົນ ພ້ອມໃຈກັນຍື່ນໃບລາອອກຕໍ່ຜູ້ບັນຊາ ເພື່ອປະທ້ວງການສັ່ງພັກວຽກເຈົ້າໜ້າທີ່ທັງສອງຄົນ ທີ່ປະຕິບັດຕາມໜ້າທີ່.

ໃນດ້ານຂອງທ່ານ ໄບຣອນ ບຣາວ ເຈົ້າເມືອງບັບຟາໂລ ກ່າວວ່າສະຖານະການທີ່ເກີດຂຶ້ນບໍ່ເໜືອຄວາມຄາດໝາຍຂອງຕົນ ທີ່ມີແຜນສຳຮອງໄວ້ແລ້ວຄືການປະສານຂໍຄວາມຊ່ວຍເຫຼືອໄປຍັງຫ້ອງການຕຳຫຼວດລັດນິວຢອກ ໃຫ້ຈັດສັນກຳລັງພົນເຂົ້າມາທົດແທນຊົ່ວຄາວ ແລະ ກ່າວວ່າໂດຍສ່ວນຕົວຕີລາຄາວ່າ ການຂໍລາອອກຂອງເຈົ້າໜ້າທີ່ທັງ 57 ຄົນ ຖືເປັນແຮງກົດດັນຈາກສະຫະພາບຕຳຫຼວດໃນພື້ນທີ່.

ໃນເວລາດຽວກັນທ່ານ ແອນດຣູ ຄູໂອໂມ ເຈົ້າຄອງລັດນິວຢອກ ກ່າວວ່າຕົນຮັບບໍ່ໄດ້ກັບຂໍ້ອ້າງທີ່ວ່າ “ເຮັດຕາມໜ້າທີ່ ແລະ ຜູ້ສູງອາຍຸໃນວິດີໂອມີພຶດຕິກຳຮຸນແຮງ” ເພາະຕົນບໍ່ເຫັນພາບແບບນັ້ນຂອງຜູ້ໄດ້ຮັບບາດເຈັບໃນວິດີໂອ ແລະ ມີການເປີດເຜີຍວ່າຜູ້ບາດເຈັບມີອາການສາຫັດ.

ຈາກເຫດການດັ່ງກ່າວ ໄດ້ເຮັດໃຫ້ເກີດກະແສວິພາກວິຈານຕໍ່ກັບການໃຊ້ອຳນາດຂອງຕຳຫຼວດໃນ ສ.ອາເມຣິກາ ເພີ່ມຂຶ້ນເປັນທະວີຄຸນ ເນື່ອງຈາກເກີດຂຶ້ນບໍ່ດົນພາຍຫຼັງການເສຍຊີວິດຂອງທ້າວ ຈອສ ຟລອຍ ຄົນຜິວສີທີ່ເມືອງມິນນິແອໂພລິສ ໃນລັດມິນນິໂຊຕາ ເຊິ່ງຖືກຕຳຫຼວດຜິວຂາວໃຊ້ຫົວເຂົ່າກົດໃສ່ຄໍຈົນຂາດລົມຫາຍໃຈ ລະຫວ່າງທຳການຈັບກຸມເມື່ອວັນທີ 25 ພຶຶດສະພາ ທີ່ຜ່ານມາ.