ສ.ອາເມຣິກາ ຂວ້ຳບາດບໍລິສັດການບິນ ໃນປະເທດໄທ ໂດຍໃຫ້ເຫດຜົນສະໜັບສະໜູນອີຣານ

Mahan Air / AFP PHOTO / MOHAMMED HUWAIS
Mahan Air / AFP PHOTO / MOHAMMED HUWAIS

ສຳນັກຂ່າວຕ່າງປະເທດລາຍງານເມື່ອວັນທີ 14 ກັນຍາ 2018 ທີ່ຜ່ານມາວ່າ: ກະຊວງການເງິນຂອງສະຫະລັດ ອາເມຣິກາ ອອກຖະແຫຼງການວ່າ: ບໍລິສັດ My Aviation Co.Ltd., ທີ່ມີສຳນັກງານໃຫຍ່ຢູ່ທີ່ນະຄອນຫຼວງບາງກອງ ປະເທດໄທ ໄດ້ໃຫ້ບໍລິການດ້ານການຂົນສົ່ງແກ່ສາຍການບິນ Mahan Air ຂອງອີຣານ ເຊິ່ງລວມເຖິງການຈອງການຂົນສົ່ງສິນຄ້າ ແລະ ຈອງປີ້ຜູ້ໂດຍສານ, ເຊິ່ງຈາກຂໍ້ມູນໃນເວັບໄຊທ໌ຂອງສາຍການບິນ Mahan air ແມ່ນມີຖ້ຽວບິນສູ່ນະຄອນຫຼວງບາງກອງ ອາທິດລະ 6 ຖ້ຽວ.

ຖະແຫຼງການລະບຸອີກວ່າ Mahan Air ເປັນສາຍການບິນເອກະຊົນຂອງອີຣານ ທີ່ຖືກລັດຖະບານອາເມຣິກາຂວໍ້າບາດຢູ່ແລ້ວ “ເພາະນຳນັກຮົບ ແລະ ວັດສະດຸໄປຍັງຊີຣີທຸກອາທິດ ເພື່ອສະໜັບສະໜູນລັດຖະບານຊີຣີ ພາຍໃຕ້ການນຳຂອງທ່ານ ບາຊາ ອັນ-ອັສຊາດ ທີ່ມີສ່ວນຮ່ວມໃນການກໍ່ຄວາມຊົ່ວຮ້າຍໃນປະເທດ ແລະ ເຮັດໃຫ້ປະຊາຊົນຜູ້ບໍລິສຸດຫຼາຍລ້ານຄົນກາຍເປັນຜູ້ພັດຖິ່ນ”.

ຄຳສັ່ງຂວໍ້າບາດຈະມີຜົນໃຫ້ຊັບສິນຂອງບໍລິສັດ My Aviation Co.Ltd., ໃນສະຫະລັດ ອາເມຣິກາ ຖືກອາຍັດ ແລະ ຫ້າມພົນລະເມືອງອາເມຣິກາດຳເນີນທຸລະກິດຮ່ວມກັບບໍລິສັດດັ່ງກ່າວນີ້, ເຊິ່ງຄຳສັ່ງດັ່ງກ່າວຖືກປະກາດຫຼັງໂມງລັດຖະການຂອງວັນສຸກທີ່ຜ່ານມາ ແລະ ໃນເບື້ອງຕົ້ນຍັງບໍ່ມີຄວາມເຫັນຈາກບໍລິສັດດັ່ງກ່າວ.

US Treasury Secretary Steven Mnuchin / AFP PHOTO / STR

ທ່ານ ສະຕີເວນ ມະນູຊິນ ລັດຖະມົນຕີກະຊວງການເງິນຂອງສະຫະລັດ ອາເມຣິກາກ່າວວ່າ ບໍລິສັດ My Aviation Co.Ltd., ບໍ່ສົນໃຈຕໍ່ຄຳເຕືອນຫຼາຍຄັ້ງນັບບໍ່ຖ້ວນຂອງສະຫະລັດ ອາເມຣິກາ ທີ່ມີທັງການປະກາດຢ່າງເປີດເຜີຍ ແລະ ສົ່ງຜ່ານແບບສອງຝ່າຍໄປຍັງລັດຖະບານໄທ ໃຫ້ຕັດຄວາມສຳພັນກັບສາຍການບິນ Mahan Air, ການຂວໍ້າບາດຄັ້ງນີ້ ຖືເປັນການເຕືອນວ່າ ສະຫະລັດ ອາເມຣິກາ ຕ້ອງການຮັບປະກັນວ່າອຸດສາຫະກຳການບິນຈະຢຸດໃຫ້ບໍລິການແກ່ ຫຼື ສ້າງຜົນກຳໄລຈາກສາຍການບິນທີ່ກ່ຽວຂ້ອງກັບຜູ້ກໍ່ການຮ້າຍ.