ມະຫາພາຍຸໄຕ້ຝຸ່ນມັງຄຸດ ພັດເກາະລູຊອນ ຟິລິບປິນເສຍຫາຍຢ່າງໜັກໜ່ວງ

AFP PHOTO / TED ALJIBE
AFP PHOTO / TED ALJIBE

ສຳນັກຂ່າວຕ່າງປະເທດລາຍານ 16 ກັນຍາ 2018 ວ່າ: ພາຍຫຼັງ “ມະຫາພາຍຸໄຕ້ຝຸ່ນມັງຄຸດ” ຂຶ້ນຝັ່ງທີ່ແຂວງຄາກາຢັນ ເກາະລູຊອນ ທາງພາກເໜືອຂອງຟິລິບປິນ ເມື່ອວັນເສົາທີ່ຜ່ານມາ ດ້ວຍຄວາມໄວສົມສູງສຸດໃກ້ຈຸດສູນກາງ 255 ກິໂລແມັດຕໍ່ຊົ່ວໂມງ ແລະ ມີລັດສະໝີທຳລາຍລ້າງກວ້າງເຖິງ 900 ກິໂລແມັດ ຈັດຢູ່ໃນລະດັບ 5 ເຊິ່ງເປັນຂັ້ນສູງສຸດຕາມມາດຕາວັດພາຍຸ ແລະ ຖືເປັນພາຍຸໝຸນທີ່ມີຄວາມໄວລົມຮຸນແຮງທີ່ສຸດໃນໂລກປະຈຳປີນີ້ອີກດ້ວຍ.

ລາຍງານຂອງສຳນັກງານປ້ອງກັນ ແລະ ບັນເທົາສາທາລະນະໄພແຫ່ງຊາດໃນນະຄອນຫຼວງມະນິລາລະບຸວ່າ: ພາຍຸໄຕ້ຝຸ່ນມັງຄຸດ ເຄື່ອນຕົວອອກຈາກຟິລິບປິນແລ້ວ ເມື່ອກາງເດິກຂອງວັນເສົາ ທີ່ຜ່ານມາ ຕາມເວລາທ້ອງຖິ່ນ ເຖິງແມ່ນວ່າຄວາມໄວລົມສູງສຸດໃກ້ຈຸດສູນກາງຂອງພາຍຸຈະຫຼຸດລົງເຫຼືອ 145 ກິໂລແມັດຕໍ່ຊົ່ວໂມງ ແຕ່ມີທິດທາງທີ່ພາຍຸຈະສະສົມກຳລັງແຮງເພີ່ມຂຶ້ນອີກລະຫວ່າງເຄື່ອນຕົວຜ່ານທະເລຈີນໃຕ້ ໂດຍຈຸດໝາຍຕໍ່ໄປຂອງພາຍຸໄຕ້ຝຸ່ນມັງຄຸດຄື ເກາະຮົງກົງ, ເກາະມາເກົ໊າ ຕໍ່ເນື່ອງໄປເຖິງເກາະໄຫຼຫຼຳ ແລະ ບັນດາມົນທົນທີ່ຢູ່ແຄມຝັ່ງທາງພາກໃຕ້ຂອງຈີນ ຕະຫຼອດຮອດບາງສ່ວນໃນພາກເໜືອຂອງຫວຽດນາມ.

ໃນສ່ວນຂອງຄວາມເສຍຫາຍທີ່ເກີດຂຶ້ນຢູ່ເກາະລູຊອນນັ້ນຍັງບໍ່ທັນມີຂໍ້ມູນທີ່ຊັດເຈນ, ເຊິ່ງອິດທິພົນຂອງພາຍຸໄຕ້ຝຸ່ນມັງຄຸດ ໄດ້ເຮັດໃຫ້ນ້ຳຖ້ວມກະທັນຫັນ ແລະ ດິນເຊາະເຈື່ອນໃນຫຼາຍແຂວງເທິງເກາະລູຊອນ, ຂະນະທີ່ປະຊາຊົນຫຼາຍກວ່າ 87,000 ຄົນຕ້ອງອົບພະຍົບ ແຕ່ທາງການປະເມີນວ່າ ປະຊາຊົນກອນຫຼາຍກວ່າ 4.2 ລ້ານຄົນເທິງເກາະລູຊອນຢູ່ໃນພື້ນທີ່ສ່ຽງທີ່ຕ້ອງປະເຊີນກັບຜົນກະທົບໂດຍກົງຈາກພາຍຸຫົວດັ່ງກ່າວ, ນອກຈາກນັ້ນຍັງເກີດກະແສໄຟຟ້າດັບເປັນວົງກວ້າງ ເຊິ່ງໜ່ວຍງານທີ່ກ່ຽວຂ້ອງກຳລັງດຳເນີນການແກ້ໄຂ ແລະ ປະເມີນຄວາມເສຍຫາຍເພື່ອໃຫ້ການຊ່ວຍເຫຼືອໃນຂັ້ນຕໍ່ໄປ.

AFP PHOTO / TED ALJIBE
AFP PHOTO / TED ALJIBE
AFP PHOTO / TED ALJIBE
AFP PHOTO / NOEL CELIS