ອີຣານປະນາມ ສ.ອາເມຣິກາ ວ່າເປັນຜູ້ກໍ່ການຮ້າຍທາງເສດຖະກິດ, ຂະນະທີ່ ສ.ອາເມຣິກາ ກໍ່ປະນາມອີຣານ ວ່າເປັນຜູ້ສະໜັບສະໜູນຫຼັກຂອງກຸ່ມກໍ່ການຮ້າຍ

AFP PHOTO / Bryan R. Smith
AFP PHOTO / Bryan R. Smith

ສຳນັກຂ່າວຕ່າງປະເທດລາຍງານເມື່ອວັນທີ 25 ກັນຍາ 2018 ທີ່ຜ່ານມາວ່າ: ທ່ານ ຮັສຊັນ ໂຣຮານີ ປະທານປະເທດອີຣານ ກ່າວຖະແຫຼງຕໍ່ກອງປະຊຸມສະມັດຊາໃຫຍ່ແຫ່ງສະຫະປະຊາຊາດ ເມື່ອວັນອັງຄານ ວ່າອີຣານບໍ່ຕ້ອງການເຈລະຈາກັບລັດຖະບານທີ່ລະເມີດກົດໝາຍ ແລະ ບໍ່ຮັກສາພັນທະລະຫວ່າງປະເທດ, ຂະນະດຽວກັນຍັງເປັນສະຖານະການທີ່ຂັດແຍ່ງກັນຫຼາຍ ເມື່ອລັດຖະບານສະຫະລັດ ອາເມຣິກາ ພາຍໃຕ້ການນຳພາຂອງທ່ານ ໂດໂນ ທຣຳ ຍື່ນຂໍສະເໜີເຈລະຈາກັບອີຣານ ແຕ່ໃນເວລາດຽວກັນຜັດບໍ່ເຄີຍປິດບັງວ່າຕ້ອງການໂຄ່ນລົ້ມອຳນາດລັດຖະບານອີຣານຄະນະດຽວກັນທີ່ຕົນເອງຕ້ອງການຢາກປຶກສາຫາລື ດ້ວຍການໃຊ້ມາດຕະການຂວໍ້າບາດທີ່ຖືເປັນການກໍ່ການຮ້າຍທາງເສດຖະກິດ.

AFP PHOTO / Bryan R. Smith
AFP PHOTO / Bryan R. Smith

ຂະນະດຽວກັນ, ທ່ານ ຮັສຊັນ ໂຣຮານີ ກ່າວຢ້ຳຈຸດຢືນຂອງອີຣານຕໍ່ສະຫະລັດ ອາເມຣິກາ ໃນບັນຫາດັ່ງກ່າວເຊັ່ນເດີມ ນັ້ນກໍ່ຄືການບໍ່ມີສົງຄາມ, ບໍ່ມີມາດຕະການຂວໍ້າບາດ, ບໍ່ມີການຂົ່ມຂູ່ຄຸກຄາມທຸກຮູບແບບ ແລະ ຂໍພຽງຄູ່ກໍລະນີປະຕິບັດຕາມຫຼັກນິຕິທຳລະຫວ່າງປະເທດເທົ່ານັ້ນ, ເຖິງຢ່າງໃດກໍ່ຕາມ ຜູ້ນຳອີຣານກ່າວວ່າ ລັດຖະບານສະຫະລັດ ອາເມຣິກາ ມີກອບຄວາມຄິດກ່ຽວກັບສາຍພົວພັນລະຫວ່າງປະເທດທີ່ຕ້ອງໃຊ້ອຳນາດ ເພື່ອຮັກສາຜົນປະໂຫຍດຂອງຕົນເອງໃຫ້ໄດ້ຫຼາຍທີ່ສຸດ ໂດຍບໍ່ຈຳເປັນຕ້ອງຄຳນຶງເຖິງຄວາມຖືກຕ້ອງ.

UN Photo

ການກ່າວຖະແຫຼງຂອງທ່ານ ຮັສຊັນ ໂຣຮານີ ເກີດຂຶ້ນພຽງບໍ່ພໍເທົ່າໃດຊົ່ວໂມງ ຕໍ່ຈາກທ່ານ ໂດໂນ ທຣຳ ທີ່ກ່າວວ່າແນວຄິດໂລກນິຍົມ ເຊິ່ງເປັນການສົ່ງເສີມຄວາມເປັນສາກົນໃຫ້ກັບກົນໄກທາງເສດຖະກິດນັ້ນ ເປັນສັດຕູຂອງຄວາມຮັກຊາດ, ທີ່ຢ້ຳເຕືອນແນວຄິດ “ອາເມຣິກາຕ້ອງມາກ່ອນ” ເຊິ່ງຜູ້ນຳສະຫະລັດ ອາເມຣິກາຢືນຢັນວ່າຄືການຮັກສາຜົນປະໂຫຍດຂອງປະເທດໃຫ້ໄດ້ຫຼາຍທີ່ສຸດ ທັງໃນດ້ານຄວາມໝັ້ນຄົງ ແລະ ການຄ້າ ໂດຍທ່ານ ໂດໂນ ທຣຳ ເຊື່ອມໂຍງບັນຫານີ້ກັບການທີ່ສະຫະລັດ ອາເມຣິກາ ຖອນຕົວອອກຈາກຂໍ້ຕົກລົງນິວເຄຼຍອີຣານ ແລະ ປະຕິຍານປາຣີສ ວ່າດ້ວຍການປ່ຽນແປງຂອງສະພາບດິນຟ້າອາກາດ ຕະຫຼອດຮອດການເຕືອນວ່າ ສະຫະລັດ ອາເມຣິກາ ຈະລົງໂທດສະມາຊິກອົງການສົນທິສັນຍາອາກລັງຕິກເໜືອ (NATO) ທີ່ຍັງຄົງບໍ່ຍອມເພີ່ມສັດສ່ວນງົບປະມານປ້ອງກັນປະເທດ ແລະ ການເດີນໜ້າມາດຕະການກົດດັນທາງການຄ້າຕໍ່ຈີນ.

ນອກຈາກນີ້, ທ່ານ ໂດໂນ ທຣຳ ກ່າວເຖິງອີຣານວ່າ ຢູ່ພາຍໃຕ້ການບໍລິຫານຂອງລັດຖະບານຜະເດັດການທີ່ສໍ້ລາດບັງຫຼວງ ແລະ ຊົນຊັ້ນປົກຄອງຂອງອີຣານ ຍັງຄວາມຄວາມວຸ້ນວາຍ ແລະ ທຳລາຍລ້າງໄປທົ່ວທຸກພູມມິພາກ ພ້ອມທັງຮຽກຮ້ອງໃຫ້ປະຊາຄົມໂລກຮ່ວມກັນໂດດດ່ຽວອີຣານ ເພື່ອເພີ່ມແຮງກົດດັນໃຫ້ກັບລັດຖະບານອີຣານ ເຊິ່ງເປັນຜູ້ສະໜັບສະໜູນຫຼັກຂອງກຸ່ມກໍ່ການຮ້າຍໃນຕາເວັນອອກກາງ ແລະ ທ່ານ ໂດໂນ ທຣຳ ຍັງກ່າວເຕືອນວ່າ ຕໍ່ຈາກນີ້ສະຫະລັດ ອາເມຣິກາ ຈະຊ່ວຍເຫຼືອສະເພາະປະເທດທີ່ຖືເປັນພັນທະມິດເທົ່ານັ້ນ ແລະ ກ່າວເຖິງສານອາຍາລະຫວ່າງປະເທດ ວ່າເປັນສານທີ່ໝົດເຊິ່ງຄວາມຍຸຕິທຳ ເຊິ່ງທ່ານ ໂດໂນ ທຣຳ ແລະ ທ່ານ ຮັສຊັນ ໂຣຮານີ ຕ່າງກໍ່ປະຕິເສດທີ່ຈະປຶກສາຫາລືກັນນອກຮອບກອງປະຊຸມສະມັດຊາໃຫຍ່ ສະຫະປະຊາຊາດ ໃນຄັ້ງນີ້.