ເຫດແຜ່ນດິນໄຫວ ແລະ ສຶນາມິ ຢູ່ສຸລາເວສີ,​ ອິນໂດເນເຊຍ ມີຜູ້ເສຍຊີວິດແລ້ວກວ່າ 800 ຄົນ

AFP PHOTO / BAY ISMOYO
AFP PHOTO / BAY ISMOYO

ສຳນັກຂ່າວຕ່າງປະເທດລາຍງານ 30 ກັນຍາ 2018 ວ່າ: ສະມາຄົມກາແດງອິນໂດເເນເຊຍ ອອກຖະແຫຼງການວ່າ ຂະບວນການຄົ້ນຫາຜູ້ສູນຫາຍ ແລະ ຜູ້ປະສົບໄພພິບັດແຜ່ນດິນໄຫວ 7.5 ຣິກເຕີ ແລະ ເກີດຄື້ນຍັກສຶນາມິສູງປະມານ 3 ແມັດ ພັດເຂົ້າຝັ່ງເກາະສຸລາເວສີ ເມື່ອຕອນຫົວຄ່ຳຂອງວັນສຸກ ທີ່ຜ່ານມາຕາມເວລາທ້ອຖິ່ນ ຍັງຄົງດຳເນີນໄປຢ່າງຕໍ່ເນື່ອງ ພ້ອມທັງຄາດການວ່າ ປະຊາຊົນຫຼາຍກວ່າ 1.6 ລ້ານຄົນໄດ້ຮັບຜົນກະທົບຈາກໄພພິບັດຄັ້ງນີ້.

ເຖິງຢ່າງໃດກໍ່ຕາມ, ທຸກພາກສ່ວນມີຄວາມເປັນຫ່ວງວ່າ ຈຳນວນຜູ້ເສຍຊີວິດຈະເພີ່ມຂຶ້ນອີກຫຼາຍ ເນື່ອງຈາກຈຳນວນຜູ້ເສຍຊີວິດ 832 ຄົນ ເປັນສະຖິຕິສະເພາະທີ່ເມືອງປາລູ ເມືອງເອກຂອງແຂວງສຸລາເວສີກາງເທົ່ານັ້ນ ແຕ່ຍັງບໍ່ມີລາຍງານຈາກເມືອງດອງກາລາ ເຊິ່ງເປັນເມືອງໃຫຍ່ອີກແຫ່ງໜຶ່ງທີ່ຢູ່ບໍ່ໄກຈາກເມືອງປາລູ ແລະ ມີປະຊາກອນອາໄສຢູ່ປະມານ 300,000​ ຄົນ ໂດຍເຈົ້າໜ້າທີ່ຍັງບໍ່ສາມາດເຂົ້າສູ່ເມືອງດອງກາລາໄດ້ ເນື່ອງຈາກລະບົບພື້ນຖານໂຄງລ່າງເສຍຫາຍຢ່າງໜັກ.

ໃນເວລາດຽວກັນ, ສື່ທ້ອງຖິ່ນຫຼາຍແຫ່ງລາຍງານວ່າ ໜ່ວຍກູ້ໄພສາມາດຊ່ວຍເຫຼືອແມ່ຍິງຄົນໜຶ່ງ ອອກມາຈາກໃຕ້ຊາກໂຮງແຮມໂຣອາໂຣອາ ທີ່ຫັກພັງທັບ ອັນໄດ້ເພີ່ມຄວາມຫວັງໃນການພົບຜູ້ຮອດຊີວິດ, ໃນດ້ານຂອງທ່ານ ໂກ ເຈ ຟຣີ ເຈົ້າຂອງໂຮງແຮມແຫ່ງນີ້ ກ່າວກັບສື່ມວນຊົນວ່າ ໜ້າຈະມີຜູ້ຕິດຢູ່ພາຍໃຕ້ອາຄານປະມານ 60 ຄົນ ຂະນະທີ່ເຈົ້າໜ້າທີ່ຕຳຫຼວດຕ້ອງເຂົ້າຄວບຄຸມເຫດຈະລາຈົນເພື່ອຍາດແຍ່ງວັດຖຸສິ່ງຂອງ ແລະ ການປຸ້ນສະດົມຕາມຮ້ານຄ້າຫຼາຍແຫ່ງອີກດ້ວຍ.

ນອກເໜືອກຈາກຄວາມເປັນຫ່ວງຂອງທຸກຝ່າຍທີ່ມີຕໍ່ສະຖານະການຂອງຜູ້ສູນຫາຍ ເຊິ່ງຍັງບໍ່ມີຈຳນວນທີ່ແນ່ນອນ ເລີ່ມມີຂໍ້ສົງໄສຈາກສັງຄົມຫຼາຍຂຶ້ນ ກ່ຽວກັບປະສິດທິພາບຂອງລະບົບເຕືອນໄພສຶນາມິໃນປະເທດ ພາຍຫຼັງມີລາຍງານວ່າກົມອຸຕຸນິຍົມວິທະຍາ ແລະ ທໍລະນີຟິຊິກແຫ່ງຊາດອິໂດເນເຊຍ ປະກາດໃຫ້ລະວັງ ແລະ ເຕືອນໄພການເກີດສຶນາມິ ແຕ່ຍົກເລີກພາຍໃນໄລຍະເວລາ 34 ນາທີ ເກີດຄຳຖາມຕາມມາທັນທີວ່າ ໄວເກີນໄປຫຼືບໍ່ ເຊິ່ງກົມອຸຕິນິຍົມວິທະຍາ ແລະ ທໍລະນີຟີຊິກອິນໂດເນເຊຍກ່າວວ່າ ເຈົ້າໜ້າທີ່ດຳເນີນການຕາມຂັ້ນຕອນທຸກປະການ ໂດຍປະເມີນທິດທາງການເກີດສຶນາມິພາຍໃນໄລຍະເວລາທີ່ຄຳເຕືອນຍັງມີຜົນບັງຄັບໃຊ້ ແຕ່ຍອມຮັບການຂາດຂໍ້ມູນພື້ນຖານຂອງເມືອງປາລູ ຈຶ່ງຕ້ອງວິເຄາະ ແລະ ຕັດສິນໃຈພາຍໃຕ້ຂໍ້ຈຳກັດດ້ານຂໍ້ມູນ.

AFP PHOTO / BAY ISMOYO
AFP PHOTO / BAY ISMOYO
AFP PHOTO / BAY ISMOYO
AFP PHOTO / BAY ISMOYO
AFP PHOTO / BAY ISMOYO
AFP PHOTO / ADEK BERRY
AFP PHOTO / ADEK BERRY
AFP PHOTO / Azwar
AFP PHOTO / Azwar
AFP PHOTO / ADEK BERRY
AFP PHOTO / ADEK BERRY