ສ.ອາເມຣິກາ ປະກາດຈະທຳລາຍຂີປະນາວຸດແບບໃໝ່ຂອງລັດເຊຍ ກ່ອນທີ່ມັນຈະຖືກໃຊ້ງານຈິງ

ສຳນັກຂ່າວຕ່າງປະເທດລາຍງານ 3 ຕຸລາ 2018 ວ່າ: ທ່ານ ນາງ ເຄ ເບລີ ຮັດຊິສັນ ເອກອັກຄະລັດຖະທູດສະຫະລັດ ອາເມຣິກາ ປະຈຳອົງການສົນທິສັນຍາອາກລັງຕິກເໜືອ (NATO) ກ່າວເມື່ອວັນອັງຄານ ທີ່ຜ່ານມາວ່າ: ລັດຖະບານສະຫະລັດ ອາເມຣິກາພົບວ່າລັດເຊຍກຳລັງດັກຊຸ້ມພັດທະນາລະບົບຂີປະນາວຸດນຳວິຖີແບບພື້ນສູ່ພື້ນ ພາຍໃຕ້ລະຫັດ “9M729” ເຊິ່ງຖືເປັນການລະເມີດສົນທິສັນຍາອາວຸດນິວເຄຼຍໄລຍະການຍິງລະດັບກາງ (INF) ທີ່ລົງນາມຮ່ວມກັນເມື່ອປີ 1987 ຫ້າມທັງສອງປະເທດຜະລິດ ແລະ ທົດສອບຂີປະນາວຸດທີ່ມີໄລຍະການຍິງໄກລະຫວ່າງ 500-5,500 ກິໂລແມັດ.

ທ່ານ ນາງ ເຄ ເບລີ ຮັດຊິສັນ ກ່າວຕໍ່ໄປອີກວ່າ ເມື່ອໃດກໍ່ຕາມທີ່ລະບົບດັ່ງກ່າວມີປະສິດທິພາບພຽງພໍ ໃນການໂຈມຕີສະຫະລັດ ອາເມຣິກາ ແລະ ພັນທະມິດ NATO ລັດຖະບານສະຫະລັດ ອາເມຣິກາຈະດຳເນີນການກຳຈັດລະບົບຂີປະນາວຸດນັ້ນກ່ອນທີ່ມັນຈະມີໂອກາດໄດ້ໃຊ້ງານຈິງ ເພື່ອບໍ່ໃຫ້ເປັນອັນຕະລາຍຕໍ່ສະຫະລັດ ອາເມຣິກາ ແລະ ພັນທະມິດ, ເຖິງຢ່າງໃດກໍ່ຕາມ ທ່ານ ນາງ ເຄ ເບລີ ຮັດຊິສັນ ກ່າວວ່າລັດຖະບານສະຫະລັດ ອາເມຣິກາ ຍັງຄົງຢຶດໝັ້ນໃນການຜ່ອນຄາຍຄວາມຂັດແຍ່ງກັບລັດເຊຍ ດ້ວຍການເຈລະຈາຢ່າງສັນຕິວິທີຕາມຂະບວນການທາງການທູດ ແລະ ເປັນໄປຕາມກອບຂອງ INF.

ເຊິ່ງນອກເໜືອຈາກສົນທິສັນຍາ INF ແລ້ວ ຕໍ່ມາໃນປີ 2010 ເຊິ່ງເປັນປີທີ່ຜູ້ນຳສະຫະລັດ ອາເມຣິກາ ແລະ ລັດເຊຍພາຍໃຕ້ການນຳຂອງທ່ານປະທານປະເທດ ບາຣັກ ໂອບາມາ ແລະ ທ່ານປະທານປະເທດ ເດິມິທຣີ ທັງສອງປະເທດໄດ້ລົງນາມຮ່ວມກັນໃນສົນທິສັນຍາສັນຕິພາບສອງຝ່າຍ ວ່າດ້ວຍການຫຼຸດຈຳນວນອາວຸດນິວເຄຼຍ ທີ່ຮຽກໂດຍຫຍໍ້ວ່າ: New Start ເຊິ່ງສົນທິສັນຍາມີຜົນບັງຄັບໃຊ້ຢ່າງເປັນທາງການເມື່ອເດືອນກຸມພາ 2011 ແລະ ຈະໝົດອາຍຸໃນປີ 2021.

ຂະນະທີ່ກະຊວງການຕ່າງປະເທດລັດເຊຍ ອອກຖະແຫຼງການເຕືອນ ຖ້ອຍຖະແຫຼງຂອງຜູ້ແທນທາງການທູດສະຫະລັດ ອາເມຣິກາ ປະຈຳ NATO ວ່າ: ສິ່ງທີ່ກ່າວມານັ້ນຖືເປັນອັນຕະລາຍ ແລະ ມີຄວາມສ່ຽງ ແຕ່ລັດຖະບານລັດເຊຍຍິນດີອະທິບາຍ ແລະ ຊີ້ແຈງຂໍ້ສົງໄສຂອງສະຫະລັດ ອາເມຣິກາຕໍ່ກັບບັນຫານີ້ ເຊິ່ງເກີດຂຶ້ນໃນເວລາດຽວກັນກັບທີ່ທ່ານ ເຢນ ສະໂຕເທນເບິກ ເລຂາທິການ NATO ປະກາດກຳນົດການຊ້ອມຮົບໃນຊື່ Trident Juncture 18 ທີ່ນອກແວ ໂດຍການເຝິກຊ້ອມພາກສະໜາມຈະເກີດຂຶ້ນໃນລະຫວ່າງວັນທີ 25 ຕຸລາ – 7 ພະຈິກ 2018 ນີ້ ແລະ ການຊ້ອມຖານບັນຊາການລະຫວ່າງວັນທີ 13-24 ພະຈິກ 2018 ໂດຍມີເຈົ້າໜ້າທີ່ຈາກ 29 ປະເທດສະມາຊິກ NATO ເຂົ້າຮ່ວມປະມານ 45,000 ຄົນ ຖືເປັນການເຝິກຊ້ອມກຳລັງພົນຄັ້ງຍິ່ງໃຫຍ່ທີ່ສຸດຂອງ NATO ນັບຕັ້ງແຕ່ການລົ້ມສະຫຼາຍຂອງສະຫະພາບໂຊວຽດ ເມື່ອປີ 1991.