ທ່ານ ຫງວຽນ ຟູ ຈ້ອງ ຂຶ້ນເປັນປະທານປະເທດຄົນໃໝ່ຂອງຫວຽດນາມ

(Photo by - / Vietnam News Agency / AFP)

ສຳນັກຂ່າວຕ່າງປະເທດລາຍງານ 23 ຕຸລາ 2018 ວ່າ: ສະພາແຫ່ງຊາດຫວຽດນາມ ມີມະຕິໃນກອງປະຊຸມ ແຕ່ງຕັ້ງທ່ານ ຫງວຽນ ຟູ ຈ້ອງ ກຳມະການກົມການເມືອງສູນກາງພັກ ເລຂາທິການໃຫຍ່ ຄະນະບໍລິຫານງານສູນກາງພັກຄອມມູນິດຫວຽນາມ ໃຫ້ດຳລົງຕຳແໜ່ງປະທານປະເທດຄົນທີ 9 ຂອງປະເທດ ແທນທ່ານ ເຈິ່ນ ດ້າຍ ກວາງ ທີ່ເຖິງແກ່ກຳເມື່ອວັນທີ 21 ກັນຍາ ທີ່ຜ່ານມາ, ຂະນະທີ່ທ່ານ ນາງ ດັງ ຖິ ຫງັອກ ທິງ ເຊິ່ງປະຕິບັດໜ້າທີ່ຮັກສາການໃນຕຳແໜ່ງປະທານປະເທດຜ່ານມາ ຍັງຄົງຢູ່ໃນຕຳແໜ່ງຮອງປະທານປະເທດ ແລະ ທ່ານນາຍົກລັດຖະມົນຕີຍັງຄົງເປັນທ່ານ ຫງວຽນ ຊວນ ຟຸກ.

ທ່ານ ຫງວຽນ ຊວນ ຟຸກ ນາຍົກລັດຖະມົນຕີຫວຽດນາມ. (Photo by Nhac NGUYEN / AFP)

ເຖິງແມ່ນວ່າບົດບາດໜ້າທີ່ຂອງຕຳແໜ່ງປະທານປະເທດ ຈະເປັນໄປໃນດ້ານພິທີການ ແຕ່ການທີ່ທ່ານ ຫງວຽນ ຟູ ຈ້ອງ ອາຍຸ 74 ປີ ນັ່ງຄວບສອງຕຳແໜ່ງທັງປະທານປະເທດ ແລະ ເລຂາທິການໃຫຍ່ພັກຄອມມູນິດຫວຽດນາມ ທີ່ຢູ່ໃນຕຳແໜ່ງມາຕັ້ງແຕ່ປີ 2011 ທ່ານ ຫງວຽນ ຟູ ຈ້ອງ ຈຶ່ງສ້າງປະຫວັດສາດເປັນຜູ້ນຳຫວຽດນາມຄົນທຳອິດທີ່ຄວບສອງຕຳແໜ່ງສຳຄັນທາງການເມືອງ ນັບຕັ້ງແຕ່ສະໄໝອະດີດປະທານ ໂຮ່ ຈີ ມິນ.

ເຊິ່ງທ່ານ ຫງວຽນ ຟູ ຈ້ອງ ຈົບການສຶກສາດ້ານວິທະຍາສາດຈາກສະຫະພາບໂຊວຽດ ເມື່ອປີ 1963 ຫຼັງຈາກນັ້ນໄດ້ສະໝັກເຂົ້າເປັນສະມາຊິກພັກຄອມມູນິດຫວຽດນາມເມື່ອປີ 1967 ຈົນໄດ້ຮັບຄັດເລືອກໃຫ້ເປັນໜຶ່ງໃນຄະນະກຳມະການກົມການເມືອງ ໃນປີ 1997 ແລະ ເຄີຍດຳລົງຕຳແໜ່ງເລຂາທິການພັກນະຄອນຫຼວງຮາໂນຍ ໃນລະຫວ່າງປີ 2000 ເຖິງ 2006.

(Photo by – / Vietnam News Agency / AFP)
(Photo by Nhac NGUYEN / AFP)
(Photo by Nhac NGUYEN / AFP)