ສຳນັກຂ່າວຕ່າງປະເທດລາຍງານ 23 ຕຸລາ 2018 ວ່າ: ທ່ານ ສີ ຈິ້ນ ຜິງ ປະທານປະເທດຈີນ ລົງຢ້ຽມຢາມເມືອງຈູ່ໄຫ, ມົນທົນກວາງຕຸ້ງ ທາງພາກໃຕ້ຂອງປະເທດຈີນ ເພື່ອເປັນປະທານໃນພິທີເປີດຂົວຂ້າມທະເລທີ່ຍາວທີ່ສຸດໃນໂລກ ດ້ວຍໄລຍະທາງ 55 ກິໂລແມັດ, ຊ່ວຍຫຼຸດໄລຍະເວລາໃນການເດີນທາງລະຫວ່າງເກາະລັນເຕົາຂອງຮົງກົງກັບເມືອງຈູ່ໄຫ ມົນທົນກວາງຕຸ້ງ ແລະ ເຂດປົກຄອງພິເສດມາກາວ ຈາກເດີມ 3 ຊົ່ວໂມງ ເຫຼືອພຽງ 30 ນາທີ.
ເຊິ່ງໂຄງສ້າງຫຼັກຂອງຂົວເປັນຮູບຊົງຄ້າຍຄືຕົວອັກສອນ “Y” ມີຄວາມຄົງທົນຕໍ່ແຜ່ນດິນໄຫວຮຸນແຮງສູງສຸດ 8 ຣິກເຕີ, ອຸໂມງລອດໃຕ້ທະເລ ແລະ ເກາະທຽມຂະໜາດໃຫຍ່ເຊື່ອກັບຂົວຫຼັກ, ໂດຍໂຄງການດັ່ງກ່າວໄດ້ເລີ່ມກໍ່ສ້າງເມື່ອປີ 2009 ດ້ວຍມູນຄ່າມະຫາສານເຖິງ 15,730 ລ້ານຢວນ ຕາມແຜນຍຸດທະສາດຂອງລັດຖະບານຈີນໃນການພັດທະນາເຂດດັ່ງກ່າວຄື: ອ່າວກວາງຕຸ້ງ, ຮົງກົງ ແລະ ມາກາວ ໃຫ້ເປັນເຂດ Greater Bay Area ໃຫ້ເປັນລະບົບນິເວດທາງເສດຖະກິດທີ່ມີຄວາມສົມບູນແບບ ໂດຍການຂັບເຄື່ອນດ້ວຍລະບົບການຄົມມະນາຄົມຕ່າງໆທີ່ມີການເຊື່ອມໂຍງກັນ.
ເຖິງຢ່າງໃດກໍ່ຕາມ, ໂຄງການດັ່ງກ່າວແມ່ນມີການດຳເນີນການຊ້າກວ່າກຳນົດຫຼາຍຂັ້ນຕອນ ທີ່ລວມເຖິງງົບປະມານບານປາຍ ເຊິ່ງເປັນສັນຍານຂອງການສໍ້ລາດບັງຫຼວງ ແລະ ການເສຍຊີວິດຂອງແຮງງານກໍ່ສ້າງຫຼາຍຄົນໃນລະຫວ່າງປະຕິບັດໜ້າທີ່ ແຕ່ກໍ່ບໍ່ເປັນອຸປະສັກ ເພາະຂົວຮົງກົງ-ຈູ່ໄຫ-ມາກາວ ພ້ອມເປີດໃຫ້ບໍລິການແກ່ປະຊາຊົນທົ່ວໄປນັບຕັ້ງແຕ່ວັນພຸດ 24 ຕຸລາ 2018 ເປັນຕົ້ນໄປ.
