ຈີນ-ອາຊຽນ ເປີດສາກຊ້ອມຮົບທາງທະເລຮ່ວມກັນ ຄັ້ງທຳອິດ ຢ່າງເປັນທາງການ

(Photo by STR / AFP) / China OUT

ສຳນັກຂ່າວຕ່າງປະເທດລາຍງານເມື່ອວັນທີ 22 ຕຸລາ 2018 ທີ່ຜ່ານມາວ່າ: ຈີນ ແລະ ປະເທດສະມາຊິກອາຊຽນທັງ 10 ປະເທດ ໄດ້ເລີ່ມການເຝິກຊ້ອມຮົບທາງທະເລຮ່ວມກັນ ເປັນຄັ້ງທຳອິດ ເມື່ອວັນຈັນ ທີ່ຜ່ານມາ ເພື່ອຜ່ອນຄາຍບັນຍາກາດຄວາມເຄັ່ງຕຶງໃນພູມມິພາກ, ໂດຍມີເຮືອຮົບ 8 ລຳໄດ້ແລ່ນອອກຈາກທ່າເຮືອເມືອງຈ້ານຈຽງ ມົນທົນກວາງຕຸ້ງ ພາກໃຕ້ຂອງປະເທດຈີນ ໂດຍມີທະຫານ 1,200 ຄົນເຂົ້າຮ່ວມ.

(Photo by STR / AFP) / China OUT

ການຂະຫຍາຍພື້ນທີ່ອ້າງກຳມະສິດເໜືອດິນແດນໃນທະເລຈີນໃຕ້ຂອງຈີນ ໄດ້ສ້າງຄວາມຂັດແຍ່ງມາຍາວນານກັບຫຼາຍປະເທດໃນອາຊຽນ ທີ່ມີການອ້າງກຳມະສິດທັບຊ້ອນ ລວມທັງກັບສະຫະລັດ ອາເມຣິກາ ມະຫາອຳນາດທາງທະເລໃນພື້ນທີ່ດັ່ງກ່າວມາຍາວນານ.

ກອງທັບເຮືອຈີນ ແລະ ກອງທັບເຮືອຈາກ 10 ປະເທດອາຊຽນ ຕົກລົງໃຫ້ການຊ້ອມຮົບຮ່ວມລະຫວ່າງວັນທີ 22-28 ຕຸລາ ເປັນສ່ວນໜຶ່ງຂອງການສົ່ງເສີມສະຖຽນລະພາບ ແລະ ຜ່ອນຄາຍຄວາມເຄັ່ງຕຶງທົ່ວເຂດນ່ານນ້ຳທີ່ມີຄວາມຂັດແຍ່ງກັນ.

ກອງທັບເຮືອສິງກະໂປ ເຊິ່ງຮ່ວມຊ້ອມຮົບຄັ້ງນີ້ ພ້ອມທັງກອງທັບເຮືອດບຣູໄນ, ໄທ, ຫວຽດນາມ ແລະ ຟິລິບປິນ ຕ່າງກໍ່ສົ່ງເຮືອເຂົ້າຮ່ວມ, ສ່ວນກຳປູເຈຍ, ອິນໂດເນເຊຍ, ລາວ, ມາເລເຊຍ ແລະ ມຽນມາ ສົ່ງຄະນະຜູ້ສັງເກດການເຂົ້າຮ່ວມ, ຄາດວ່າການເຝິກຊ້ອມຄັ້ງນີ້ຈະລວມເຖິງ ປະຕິບັດການຄົ້ນຫາ ແລະ ກູ້ໄພຮ່ວມ ແລະ ການເຝິກຊ້ອມການສື່ສານ.

ທ່ານພົນຕີ ລິວ ເຊືອນ ຮົງ ຜູ້ບັນຊາການກອງທັບເຮືອສິງກະໂປ ກ່າວໃນພິທີເປີດການຊ້ອມຮົບຮ່ວມວ່າ ການຮ່ວມມືໃນພູມມິພາກກໍ່ໃຫ້ເກີດປະໂຫຍດດ້ານຄວາມໝັ້ນຄົງ ແລະ ການເຕີບໃຫຍ່ຂະຫຍາຍຕົວທາງເສດຖະກິດ, ສ່ວນກະຊວງປ້ອງກັນປະເທດຈີນ ອອກຖະແຫຼງການເມື່ອວັນອາທິດ ທີ່ຜ່ານມາວ່າ ການຊ້ອມຮົບຄັ້ງນີ້ຈະຊ່ວຍສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ແລະ ຊ່ວຍສ້າງສາຍພົວພັນທາງການທະຫານ ລະຫວ່າງຈີນກັບປະເທດອາຊຽນ ເປັນການຮັດແໜ້ນການຮ່ວມມືດ້ານຄວາມໝັ້ນຄົງທາງທະເລ ແລະ ເສີມສ້າງຂີດຄວາມສາມາດໃນການຕອບສະໜອງຮ່ວມຕໍ່ໄພຮຸກຮານດ້ານຄວາມໝັ້ນຄົງ.

(Photo by STR / AFP) / China OUT
(Photo by STR / AFP) / China OUT