ຜູ້ນຳລັດເຊຍກ່າວ ພ້ອມຕອບໂຕ້ ສ.ອາເມຣິກາ ຫາກຖອນຕົວຈາກສົນທິສັນຍານິວເຄຼຍ

(Photo by Sergei CHIRIKOV / POOL / AFP)

ສຳນັກຂ່າວຕ່າງປະເທດລາຍງານ 25 ຕຸລາ 2018 ວ່າ: ທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວເມື່ອວັນພຸດ ທີ່ຜ່ານມາວ່າ ຫາກສະຫະລັດ ອາເມຣິກາ ຖອນຕົວອອກຈາກສົນທິສັນຍາອາວຸດນິວເຄຼຍໄລຍະການຍິງລະດັບກາງ (INF) ແລະ ບໍ່ສາມາດຕໍ່ອາຍຸສົນທິສັນຍາສັນຕິພາບວ່າດ້ວຍການຫຼຸດຈຳນວນອາວຸດນິວເຄຼຍໃນຊື່ “New Start” ເຊິ່ງຈະຄົບກຳນົດອາຍຸການມີຜົນບັງຄັບໃຊ້ 10 ປີ ໃນປີ 2021 ຈະເປັນການຊຸກດັນໃຫ້ທັງສອງປະເທດກັບເຂົ້າສູ່ສະໜາມການແຂ່ງຂັນດ້ານອາວຸດອີກຄັ້ງ ແລະ ເອີຣົບຈະເປັນທະວີບທີ່ຕ້ອງປະເຊີນໜ້າກັບຄວາມສ່ຽງ ໃນເລື່ອງນີ້ຫຼາຍທີ່ສຸດຢ່າງຫຼີກລ້ຽງບໍ່ໄດ້.

ຂະນະດຽວກັນ, ທ່ານ ປູຕິນ ກ່າວອີກວ່າ ເມື່ອໃດກໍ່ຕາມທີ່ສະຫະລັດ ອາເມຣິກາຖອນຕົວອອກຈາກການເປັນພາຄີຂອງ INF ແລ້ວນຳລະບົບຂີປະນາວຸດທີ່ມີໄລຍະການຍິງນອກເໜືອຈາກທີ່ຄວບຄຸມໃນສົນທິສັນຍາຄືລະຫວ່າງ 500 ເຖິງ 5,500 ກິໂລແມັດ ມາຕິດຕັ້ງເພີ່ມເຕີມໃນດິນແດນແຫ່ງໃດກໍ່ຕາມຂອງເອີຣົບ ລັດເຊຍຈະມີມາດຕະການຕອບໂຕ້ຕາມຄວາມເໝາະສົມ ເຊິ່ງທ່ານ ປູຕິນ ຢືນຢັນວ່າລັດເຊຍບໍ່ໄດ້ເປັນຝ່າຍລະເມີດຂໍ້ຕົກລົງກ່ອນ ແລະ ກ່າວເຖິງການທີ່ລັດຖະບານສະຫະລັດ ອາເມຣິການຳລະບົບທຳລາຍຂີປະນາວຸດຊຸດໃຫຍ່ມາຕິດຕັ້ງໃນຣູມານີ ເຊິ່ງມີໄລຍະການຍິງໃນເກີນກວ່າລະບຸໄວ້ໃນຂໍ້ຕົກລົງ ແລະ ລະບົບສາມາດຄວບຄຸມໄດ້ຈາກລະບົບຄອມພິວເຕີທາງໄກ.

ການຖະແຫຼງດັ່ງກ່າວຂອງຜູ້ນຳລັດເຊຍ ຖືເປັນຄຳຕອບໂຕ້ຢ່າງມີຄວາມໝາຍ ທີ່ຈະບໍ່ເຈລະຈາກັບສະຫະລັດ ອາເມຣິກາໃນເລື່ອງນີ້ ເກີດຂຶ້ນພາຍຫຼັງທີ່ທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດປະຈຳທຳນຽບຂາວ ເຂົ້າພົບປະຫາລືກັບທ່ານ ປູຕິນ ເມື່ອວັນອັງຄານ ທີ່ຜ່ານມາ ເຊິ່ງທ່ານ ຈອນ ໂບຕັ້ນ ຍອມຮັບວ່າມີຄວາມເປັນໄປໄດ້ໜ້ອຍຫຼາຍ ທີ່ທ່ານ ໂດໂນ ທຣຳ ຈະປ່ຽນໃຈກັບມາທົບທວນ ເນື້ອໃນຂອງ INF ທີ່ລົງນາມຮ່ວມກັບລັດເຊຍເມື່ອເດືອນທັນວາ 1987 ເຊິ່ງເປັນໄລຍະປາຍສົງຄາມເຢັນ.

ໃນດ້ານຂອງທ່ານ ເຢນ ສະໂຕນເທນເບີກ ເລຂາທິການອົງການສົນທິສັນຍາອາກລັງຕິກເໜືອ (NATO) ກ່າວວ່າ NATO ມີຄວາມເຊື່ອໝັ້ນເຊັ່ນດຽວກັບສະຫະລັດ ອາເມຣິກາ ວ່າລັດເຊຍເປັນຝ່າຍລະເມີດຂໍ້ຕົກລົງ INF ກ່ອນ ແຕ່ໂດຍສ່ວນຕົວຍັງບໍ່ເຊື່ອວ່າລັດຖະບານລັດເຊຍ ຈະນຳລະບົບຫົວຮົບນິວເຄຼຍມາຕິດຕັ້ງໃນເອີຣົບເພື່ອປະຈັນໜ້າກັບສະຫະລັດ ອາເມຣິກາ. ອີກຢ່າງໜຶ່ງ NATO ມີກຳນົດການເຝິກຊ້ອມຮົບໃນຊື່ Trident Juncture 18 ທີ່ນອກເວ ໂດຍການເຝິກຊ້ອມພາກສະໜາມຈະຈັດຂຶ້ນໃນລະຫວ່າງວັນທີ 25 ຕຸລາ – 7 ພະຈິກ 2018 ນີ້ ແລະ ການເຝິກຊ້ອມຖານບັນຊາການຈະຈັດຂຶ້ນໃນລະຫວ່າງວັນທີ 13-24 ພະຈິກ 2018 ໂດຍມີເຈົ້າໜ້າທີ່ຈາກທັງ 29 ປະເທດສະມາຊິກ NATO ເຂົ້າຮ່ວມລວມກັນປະມານ 45,000 ຄົນ ຖືເປັນການເຝິກຊ້ອມກຳລັງພົນຄັ້ງໃຫຍ່ທີ່ສຸດຂອງ NATO ນັບຕັ້ງແຕ່ການລົ້ມສະຫຼາຍຂອງສະຫະພາບໂຊວຽດ ເມື່ອປີ 1991.