ແຈ້ງຢ່າງເປັນທາງການ ນັກທຸລະກິດຊາວໄທ ປະທານເລສເຕີຊິຕີ້ ເສຍຊີວິດຈາກເຫດຍົນຕົກ

(Photo by Paul ELLIS / AFP)

ສຳນັກຂ່າວຕ່າງປະເທດລາຍງານ 29 ຕຸລາ 2018 ວ່າ: ຈາກເຫດຍົນເຮລິຄັອບແຕສ່ວນຕົວຂອງທ່ານ ວິໄຊ ສຣີວັດທະນະປຣະພາ ມະຫາເສດຖີນັກທຸລະກິດຊາວໄທ ເຈົ້າຂອງສະໂມສອນບານເລສເຕີຊິຕີ້ ທີ່ປະສົບອຸປະຕິເຫດຍົນຕົກບໍລິເວນເດີ່ນຈອດລົດຂອງສະໜາມເຕະບານ King Power ຢູ່ປະເທດອັງກິດ ເມື່ອຄືນວັນເສົາ ທີ່ຜ່ານມາຕາມເວລາທ້ອງຖິ່ນ.

ຫຼ້າສຸດທາງສະໂມສອນເລສເຕີຊິຕີ້ ໄດ້ອອກຖະແຫຼງການຢ່າງເປັນທາງການແຈ້ງຂ່າວການສູນເສຍ ທ່ານ ວິໄຊ ສຣີວັດທະນະປຣະພາ ປະທານສະໂມສອນ ໃນໂສກອະນາດຕະກຳດັ່ງກ່າວແລ້ວ ໂດຍມີເນື້ອໃນໃຈຄວາມວ່າ:

(Photo by Ben STANSALL / AFP)

“ຖືເປັນຄວາມໂສກເສົ້າທີ່ສຸດສະເທືອນໃຈ ປຽບດັ່ງດວງໃຈໄດ້ແຕກສະຫຼາຍ ພວກເຮົາຢືນຢັນວ່າ: ທ່ານ ວິໄຊ ສຣີວັດທະນະປຣະພາ ປະທານຂອງພວກເຮົາ ເປັນໜຶ່ງໃນຜູ້ເສຍຊີວິດຢ່າງໜ້າເສົ້າເມື່ອຕອນຄ່ຳຂອງວັນເສົາ ເມື່ອເຮລິຄັອບແຕທີ່ບັນທຸກທ່ານ ແລະ ຄົນອື່ນໆອີກ 4 ຄົນ ຕົກນອກສະໜາມ King Power ໂດຍບໍ່ມີຜູ້ໃດໃນ 5 ຄົນເທິງຍົນລອດຊີວິດ, ຄວາມຫ່ວງໃຍທຳອິດຂອງທຸກຄົນໃນສະໂມສອນຄື ຄອບຄົວສຣີວັດທະນະປຣະພາ ແລະ ຄອບຄົວຂອງຜູ້ທີ່ຢູ່ເທິງຍົນທັງໝົດໃນຊ່ວງເວລາແຫ່ງການສູນເສຍອັນເກີນກວ່າຈະບັນຍາຍໄດ້, ສຳລັບທ່ານ ວິໄຊ ໂລກໄດ້ສູນເສຍບຸລຸດທີ່ຍິ່ງໃຫຍ່ ຜູ້ທີ່ປ່ຽມລົ້ນໄປດ້ວຍນ້ຳໃຈ ຜູ້ທີ່ມີຊີວິດເພື່ອຄວາມຮັກ ບໍ່ຈະວ່າເປັນຜູ້ອຸທິດເພື່ອຄອບຄົວ ແລະ ຜູ້ອື່ນທີ່ທ່ານເປັນຜູ້ນຳໄດ້ຢ່າງສຳເລັດ ແລະ ເລສເຕີຊິຕີ້ ເປັນຄອບຄົວໜຶ່ງພາຍໃຕ້ການນຳພາຂອງທ່ານດ້ວຍຄວາມເປັນຄອບຄົວນີ້ ພວກເຮົາໂສກເສົ້າເສຍໃຈຕໍ່ການຈາກໄປຂອງທ່ານ ແລະ ຈະຮັກສາການດຳເນີນງານຕາມວິໄສທັດເພື່ອສະໂມສອນທີ່ຂະນະນີ້ເປັນຕຳນານຂອງທ່ານໄປແລ້ວ”.

ສຳລັບຜູ້ເສຍຊີວິດທັງ 5 ຄົນປະກອບມີ: ທ່ານ ວິໄຊ ສຣີວັດທະນະປຣະພາ, ພະນັກງານຂອງທ່ານ ວິໄຊ 2 ຄົນ, ນັກບິນ 2 ຄົນ.