ສານຟິລິບປິນສັ່ງຈັບພັນລະຍາ ອະດີດປະທານປະເທດ ຂໍ້ຫາສໍ້ລາດບັງຫຼວງ

(Photo by Romeo GACAD / AFP)

ສຳນັກຂ່າວຕ່າງປະເທດລາຍງານ 9 ພະຈິກ 2018 ວ່າ: ສານອາຍາຂອງຟິລິບປິນ ມີຄຳຕັດສິນຕາມການຮ້ອງຟ້ອງຂອງຄະນະກຳມະການປ້ອງກັນ ແລະ ປາບປາມການສໍ້ລາດບັງຫຼວງແຫ່ງຊາດ ທີ່ລວມເຖິງການອອກໝາຍຈັບທ່ານ ນາງ ອີເມວດດາ ມາກອສ ພັນລະຍາອະດີດປະທານປະເທດ ເຊິ່ງປັດຈຸບັນດຳລົງຕຳແໜ່ງສະມາຊິກສະພາເຂດ 2 ແຂວງຮີລາກັງອີໂລໂຄສ ທາງພາກເໜືອຂອງເກາະລູຊອນ ຖານມີຄວາມຜິດຈິງໃນຄະດີສໍ້ລາດບັງຫຼວງລວມ 7 ຂໍ້ຫາ ໂດຍສານຕັດສິນໃຫ້ທ່ານ ນາງ ອີເມວດາ ມາກອສ ຮັບໂທດຕັດອິດສະຫຼະພາບບໍ່ໜ່ອຍກວ່າ 6 ປີ 1 ເດືອນ ແລະ ສູງສຸດຄື 11 ປີ.

(Photo by Ted ALJIBE / AFP)

ເຖິງຢ່າງໃດກໍ່ຕາມ, ສານໄດ້ຍົກຟ້ອງທ່ານ ນາງ ອີເມວດາ ມາກອສ ໃນອີກ 3 ຂໍ້ຫາ ທີ່ໄອຍະການຮ້ອງຟ້ອງທ່ານ ນາງ ມາຕັ້ງແຕ່ປີ 1991 ຈາກການໃຊ້ຕຳແໜ່ງທາງການເມືອງຄ້ຳປະກັນບັນຊີທະນາຄານໃນສະວິດຫຼາຍບັນຊີ ໃນສະໄໝລັດຖະບານພາຍໃຕ້ການນຳຂອງທ່ານປະທານປະເທດ ເຟິດິນານ ມາກອສ ສາມີຂອງທ່ານ ນາງ ທີ່ໄດ້ລ່ວງລັບໄປດົນແລ້ວ, ແຕ່ໄດ້ດຳເນີນຄະດີກັບທ່ານ ນາງ ໃນຂໍ້ຫາໃຊ້ມູນລະນິທິ 7 ແຫ່ງທີ່ສ້າງຕັ້ງໃນສະວິດເປັນສະຖານຟອກເງິນ ທີ່ຍັກຍອກໄປຈາກຄັງເງິນແຫ່ງຊາດ ໂດຍມີມູນຄ່າຄວາມເສຍຫາຍສູງເຖິງ 200 ລ້ານໂດລາສະຫະລັດ ນອກຈາກນີ້ ສານຍັງຕ້ອງການໃຫ້ທ່ານ ນາງ ອີເມວດາ ມາກອສ ເຂົ້າມາຊີ້ແຈງກັບສານດ້ວຍຕົນເອງ ວ່າເພາະເຫດໃດຈຶ່ງບໍ່ມາຮັບຟັງຄຳຕັດສິນຂອງສານໃນມື້ນີ້.

ຂະນະທີ່ຝ່າຍໄອຍະການໃຫ້ຂໍ້ມູນວ່າ ຈິງຢູ່ທີ່ຄຳຕັດສິນຂອງສານເປັນການເຮັດໃຫ້ທ່ານ ນາງ ຂາດຄຸນສົມບັດທາງການເມືອງໂດຍອັດຕະໂນມັດ ແລະ ອາດຕ້ອງຖອນຕົວຈາກການລົງສະໝັກຮັບເລືອກຕັ້ງຊິງຕຳແໜ່ງເຈົ້າແຂວງຮີລາກັງອີໂລໂຄສ ທີ່ຈະມີການເລືອກຕັ້ງໃນປີໜ້າ ແຕ່ພະນັກງານສືບສວນຈະຍັງຖືວ່າທ່ານ ນາງ ຢູ່ໃນຕຳແໜ່ງສະມາຊິກສະພາ ຈົນກວ່າຄຳຕັດສິນຂອງສານຈະຖືເປັນທີ່ສິ້ນສຸດ ໝາຍຄວາມວ່າ ໄອຍະການຄາດການວ່າທ່ານ ນາງ ອີເມວດາ ມາກອສ ຈະຍື່ນອຸທອນພ້ອມທັງໃຫ້ການປະກັນຕົນ.

ເຊິ່ງໃນສະໄໝລັດຖະບານພາຍໃຕ້ການນຳຂອງທ່ານ ເຟິດິນານ ມາກອສ ທີ່ຄອງອຳນາດໃນລະຫວ່າງປີ 1970-1986 ທ່ານ ນາງ ອິເມວດາ ມາກອສເຊິ່ງປັດຈຸບັນ ອາຍຸ 89 ປີ ໄດ້ດຳລົງຕຳແໜ່ງຫຼາຍຕຳແໜ່ງໃນສະໄໝນັ້ນ ລວມທັງເຈົ້າຄອງນະຄອນຫຼວງມະນິລາ.