ອົງການນິລະໂທດສະກຳສາກົນ ຖອດຖອນລາງວັນກຽດຕິຍົດຈາກທ່ານ ນາງ ອອງ ຊານ ຊູຈີ

ສຳນັກຂ່າວຕ່າງປະເທດລາຍງານ 13 ພະຈິກ 2018 ວ່າ: ອົງການນິລະໂທດສະກຳສາກົນ (Amnesty International) ເຊິ່ງມີສຳນັກງານໃຫຍ່ຢູ່ໃນນະຄອນຫຼວງລອນດອນ ປະເທດອັງກິດ ໄດ້ອອກຖະແຫຼງການເມື່ອວັນຈັນ ທີ່ຜ່ານມາ ເລື່ອງການຖອດຖອນລາງວັນມະໂນທຳ ກັບຄືນຈາກທ່ານນາງ ອອງ ຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ເນື່ອງຈາກພິຈາລະນາແລ້ວວ່າທ່ານ ນາງ ອອງ ຊານ ຊູຈີ ບໍ່ແມ່ນບຸກຄົນທີ່ຈະສາມາດເປັນສັນຍາລັກແຫ່ງຄວາມຫວັງ, ຄວາມກ້າຫານ ແລະ ການປົກປ້ອງສິດທິມະນຸດໄດ້ອີກຕໍ່ໄປ ເຊິ່ງ Amnesty ໄດ້ມອບລາງວັນໃຫ້ແກ່ທ່ານ ນາງ ເມື່ອປີ 2009 ເຊິ່ງເປັນຊ່ວງທີ່ທ່ານ ນາງ ຍັງຄົງຖືກກອງທັບສັ່ງກັກບໍລິເວນຢູ່ພາຍໃນເຮືອນພັກທີ່ນະຄອນຢ່າງກຸ້ງ ກ່ອນໄດ້ຮັບອິດສະຫຼະພາບໃນປີຕໍ່ມາ.

ການເຄື່ອນໄຫວດັ່ງກ່າວຂອງ Amnesty ເກີດຂຶ້ນພຽງບໍ່ພໍເທົ່າໃດວັນ ກ່ອນທີ່ມຽນມາ ແລະ ບັງກະລາເທດຈະເລີ່ມຂະບວນການຍ້າຍຄືນຜູ້ລີ້ໄພຊາວໂຣຮິງຢາປະມານ 2,260 ຄົນ ຈາກຄ່າຍໃນເມືອງຄັອກ ບາຊາ ທີ່ຢູ່ທາງພາກຕາເວັນອອກຂອງບັງກະລາເທດ ໃຫ້ເດີນທາງກັບພູມລຳເນົາ ຄືລັດຍະໄລ່ ທີ່ຢູ່ທາງພາກຕາເວັນຕົກຂອງມຽນມາ ໃນວັນພະຫັດທີ 15 ພະຈິກນີ້ ຫາກຂະບວນການເປັນໄປດ້ວຍດີ ຈະຖືເປັນຄາລາວານຊາວໂຣຮິງຢາກຸ່ມທຳອິດ ທີ່ເດີນທາງກັບມາຍັງມຽນມາ ພາຍຫຼັງລີ້ໄພຂ້າມຊາຍແດນເນື່ອງຈາກສະຖານະການຄວາມຮຸນແຮງໃນລັດຍະໄຂ່ ເມື່ອເດືອນສິງຫາ ປີທີ່ຜ່ານມາ ແລະ ເປັນໄປຕາມຂໍ້ຕົກລົງສອງຝ່າຍທີ່ລົງນາມຮ່ວມກັນຕັ້ງແຕ່ເດືອນມັງກອນ ປີນີ້ ແລະ ບັນລຸຂໍ້ຕົກລົງສຸດທ້າຍຮ່ວມກັນເມື່ອເດືອນທີ່ຜ່ານມາ.

ເຖິງຢ່າງໃດກໍ່ຕາມ, ມີລາຍງານວ່າຊາວໂຣຮິງຢາທີ່ຢູ່ໃນຈຳນວນລາຍຊື່ກຸ່ມທຳອິດທີ່ຈະຕ້ອງເດີນທາງກັບ ໄດ້ຫຼົບໜີອອກຈາກຄ້າຍໜຶ່ງໄປຍັງອີກຄ້າຍໜຶ່ງໃນເມືອງຄັອກ ບາຊາ ເພື່ອຫຼີກລ້ຽງການຖືກບັງຄັບໃຫ້ເດີນທາງກັບ, ໃນດ້ານຂອງທ່ານ ວິນ ມະຢັດ ເອ ລັດຖະມົນຕີກະຊວງສັງຄົມ ແລະ ການຕັ້ງຖິ່ນຖານຂອງມຽນມາ ກ່າວເຖິງລາຍງານດັ່ງກ່າວວ່າ ສະຖານະການໃນຕອນນີ້ຂຶ້ນຢູ່ກັບບັງກະລາເທດເປັນສຳຄັນ ແຕ່ມຽນມາມີຄວາມພ້ອມເຕັມທີ່ໃນເລື່ອງນີ້, ຂະນະທີ່ສຳນັກງານຂ້າຫຼວງໃຫຍ່ຜູ້ລີ້ໄພແຫ່ງສະຫະປະຊາຊາດ ສະເໜີວ່າຄວນມີການໃຫ້ຊາວໂຣຮິງຢາໄດ້ຮັບຮູ້ເຖິງເງື່ອນໄຂດ້ານສະພາບແວດລ້ອມ ໃນມຽນມາກ່ອນຕັດສິນໃຈດ້ວຍຕົນເອງວ່າ ພ້ອມເດີນທາງກັບແລ້ວຫຼືຍັງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube