ທາງການມຽນມາກ່າວວ່າ ທ່ານ ນາງ ຊູຈີ ຖືກຕາເວັນຕົກກັ່ນແກ້ງ ເພື່ອໃຫ້ເສື່ອມເສຍກຽດສັກສີ

ສຳນັກຂ່າວຕ່າງປະເທດລາຍງານ 13 ພະຈິກ 2018 ວ່າ: ທ່ານ ອອງ ຮະລາ ຕຸນ ລັດຖະມົນຕີກະຊວງຂ່າວສານມຽນມາ ຖະແຫຼງວ່າໂດຍສ່ວນຕົວແມ່ນມີຄວາມເສຍໃຈ ແລະ ຜິດຫວັງເປັນຢ່າງຍິ່ງ ຕໍ່ການທີ່ອົງການນິລະໂທດສະກຳສາກົນ (Amnesty International) ໄດ້ຖອດຖອນລາງວັນທູດມະໂນທຳ ທີ່ເຄີຍມອບໃຫ້ແກ່ທ່ານ ນາງ ອອງ ຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ (ຜູ້ນຳສູງສຸດດ້ານພຶດຕິໄນຂອງມຽນມາ) ເມື່ອປີ 2009, ເຖິງຢ່າງໃດກໍ່ຕາມ ການທີ່ Amnesty  ເລືອກທີ່ຈະດຳເນີນການເຊັ່ນນັ້ນ ເປັນການຢ້ຳໃຫ້ເຫັນວ່າທ່ານ ນາງ ອອງ ຊານ ຊູຈີ ໄດ້ຮັບການປະຕິບັດຢ່າງບໍ່ເປັນທຳຈາກຕາເວັນຕົກ ແລະ ມີແຕ່ຈະຍິ່ງເຮັດໃຫ້ປະຊາຊົນມຽນມາເຫັນອົກເຫັນໃຈ ແລະ ສະໜັບສະໜູນທ່ານ ນາງຫຼາຍຂຶ້ນກວ່າເກົ່າ.

ຂະນະທີ່ທ່ານ ມຽວ ຢຸ້ນ ໂຄສົກພັກສັນນິບາດແຫ່ງຊາດເພື່ອປະຊາທິປະໄຕ (NLD) ທີ່ເປັນພັກການເມືອງພາຍໃຕ້ການນຳພາຂອງທ່ານ ນາງ ອອງ ຊານ ຊູຈີ ກ່າວວ່າ Amnesty ບໍ່ໄດ້ພຽງແຕ່ທຳລາຍສັກສີຂອງທ່ານ ນາງ ອອງ ຊານ ຊູຈີ ແຕ່ຍັງລວມເຖິງສະມາຊິກພັກ NLD ທັງມວນ ແລະ ກ່າວອີກວ່າໂດຍສ່ວນຕົວແມ່ນໄດ້ຕີລາຄາວ່າເປັນທິດສະດີສົມຄົບຄິດ ເນື່ອງຈາກ Amnesty  ເປັນໜຶ່ງໃນອົງກອນທີ່ສະໜັບສະໜູນຊາວເບງກາລີ ເຊິ່ງໝາຍເຖິງຊາວໂຣຮິງຢາຫຼາຍກວ່າ 700,000 ຄົນ ທີ່ລີ້ໄພໄປອາໄສຍັງຄ່າຍພັກເຊົາຊົ່ວຄາວໃນບັງກະລາເທດຕັ້ງແຕ່ເດືອນສິງຫາ ປີທີ່ຜ່ານມາ, ແຕ່ກຸ່ມທຳອິດປະມານ 2,500 ຄົນ ແມ່ນໄດ້ກຽມເດີນທາງກັບມາຍັງລັດຍະໄຂ່ຂອງມຽນມາໃນວັນພະຫັດ 15 ພະຈິກນີ້ ຕາມຂໍ້ຕົກລົງລະຫວ່າງສອງປະເທດ.

ໃນດ້ານຂອງປະຊາຊົນໃນນະຄອນຢ່າງກຸ້ງກ່າວກັບນັກຂ່າວ AFP ວ່າ: ຮູ້ຂ່າວແລ້ວແຕ່ບໍ່ໄດ້ໃຫ້ຄວາມສຳຄັນ, ທ່ານ ຂິ່ນ ໝ່ອງ ເອ ອາຍຸ 50 ປີ ກ່າວວ່າການຖອດຖອນລາງວັນແບບນີ້ເປັນການກະທຳແບບເດັກນ້ອຍ ເມື່ອບໍ່ໄດ້ດັ່ງໃຈ ຫຼື ບໍ່ສາມາດລວມກຸ່ມກັນໄດ້ອີກຕໍ່ໄປກໍ່ເກັບເຄື່ອງຫຼິ້ນນັ້ນກັບຄືນ, ສ່ວນທ່ານ ຮະເຕ ຮະເຕ ອາຍຸ 60 ປີກ່າວວ່າປະຊາຊົນມຽນມາບໍ່ໄດ້ຕ້ອງການລາງວັນຈາກ Amnesty.

ກ່ອນໜ້ານັ້ນ, ຄະນະກຳມະການລາງວັນໂນເບວນອກເວ ເຊິ່ງເປັນຜູ້ພິຈາລະນາລາງວັນໂນເບວສາຂາສັນຕິພາບມາຕັ້ງແຕ່ປີ 1900 ອອກຖະແຫຼງການເມື່ອເດືອນສິງຫາ ທີ່ຜ່ານມາວ່າ ກົດລະບຽບຂອງການພິຈາລະນາ ແລະ ມອບລາງວັນໃຫ້ແກ່ບຸກຄົນ ຫຼື ໜ່ວຍງານໃດໃນໂລກນີ້ຍັງບໍ່ປ່ຽນແປງ ໝາຍຄວາມວ່າຄະນະກຳມະການບໍ່ມີນະໂຍບາຍຖອດຖອນລາງວັນຄືນຈາກບຸກຄົນ ຫຼື ໜ່ວຍງານທີ່ເຄີຍໄດ້ຮັບລາງວັນໄປແລ້ວ, ໂດຍທ່ານ ນາງ ອອງ ຊານ ຊູຈີ ໄດ້ຮັບລາງວັນໂນເບວສາຂາສັນຕິພາບປະຈຳປີ 1991 ຈາກການຕໍ່ສູ້ເພື່ອຮຽກຮ້ອງປະຊາທິປະໄຕ ແລະ ເສລີພາບທາງການເມືອງໃນມຽນມາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube