ພັນລະຍາ ອະດີດຜູ້ນຳຟິລິບປິນ ຂຶ້ນສານຟັງຂໍ້ກ່າວຫາຄະດີສໍ້ລາດບັງຫຼວງ

(Photo by Ted ALJIBE / AFP)

ສຳນັກຂ່າວຕ່າງປະເທດລາຍງານເມື່ອວັນທີ 16 ພະຈິກ 2018 ທີ່ຜ່ານມາວ່າ: ທ່ານ ນາງ ອິເມວດາ ມາກອສ ພັນລະຍາອະດີດປະທ່ານປະເທດຟິລິບປິນ ໄດ້ເດີນທາງໄປຍັງສານອາຍາຄະດີສໍ້ລາດບັງຫຼວງ ເມື່ອວັນສຸກ ທີ່ຜ່ານມາ ເພື່ອຮັບຟັງຂໍ້ກ່າວຫາໂດຍຄະນະກຳມະການປ້ອງກັນ ແລະ ປາບປາມການສໍ້ລາດບັງຫຼວງແຫ່ງຊາດ ທີ່ເປັນໂຈດຍື່ນຟ້ອງທ່ານ ນາງ ມາຕັ້ງແຕ່ປີ 1991 ໃນຄະດີສໍ້ລາດບັງຫຼວງ 7 ຂໍ້ຫາ ເຊິ່ງສານພິຈາລະນາໄວ້ແລ້ວໃຫ້ທ່ານ ນາງ ອິເມວດາ ມາກອສ ຮັບໂທດຕັດອິດສະຫຼະພາບໃນແຕ່ລະຂໍ້ຫາບໍ່ໜ້ອຍກວ່າ 6 ປີ 1 ເດືອນ ແລະ ສູງສຸດຄື 11 ປີ ໝາຍຄວາມວ່າຫາກສານພິພາກສາວ່າທ່ານ ນາງ ມີຄວາມຜິດຈິງໃນທຸກຂໍ້ຫາ ທ່ານ ນາງ ອາດຕ້ອງຮັບໂທດຈຳຄຸກສູງສຸດເຖິງ 77 ປີ.

(Photo by Ted ALJIBE / AFP)

ເຊິ່ງທ່ານ ນາງ ອິເມວດາ ມາກອສ ອາຍຸ 89 ປີ ກ່າວຕໍ່ສານວ່າ ໃນມື້ທີ່ມີການປະກາດຄຳຕັດສິນພ້ອມການອອກໝາຍຈັບທ່ານ ນາງ ເມື່ອອາທິດທີ່ຜ່ານມານັ້ນ ທ່ານ ນາງ ບໍ່ສະບາຍຈຶ່ງບໍ່ສາມາດເດີນທາງມາຮັບຟັງຄຳພິພາກສາຂອງສານໄດ້ດ້ວຍຕົນເອງ ໂດຍໄດ້ສະແດງເອກະສານຕົວຈິງຂອງໂຮງໝໍວ່າ ທ່ານ ນາງ ມີອາກາດປ່ວຍຊຳເຮື້ອຫຼາຍໂລກທັງໂລກເບົາຫວານ, ໂລກຫົວໃຈ ແລະ ອາການທີ່ກ່ຽວຂ້ອງກັບລະບົບປະສາດ, ເຖິງຢ່າງໃດກໍ່ຕາມ ຜູ້ພິພາກສາຕັ້ງຄຳຖາມວ່າ ໃນເມື່ອມີອາກາດປ່ວຍຮຸນແຮງ ແລ້ວເຫດໃດຈຳເລີຍຈຶ່ງສາມາດເດີນທາງໄປເຂົ້າຮ່ວມງານລ້ຽງວັນເກີດຂອງລູກສາວ ທີ່ຈັດຂຶ້ນໃນວັນດຽວກັນໄດ້ ທ່ານ ນາງ ອິເມວດາ ມາກອສ ກ່າວວ່າເຫັນແກ່ຄຳຮ້ອງຂໍທັງນ້ຳຕາຂອງລູກສາວ.

ເຖິງຢ່າງໃດກໍ່ຕາມ, ສານໄດ້ອະນຸມັດໃຫ້ປະກັນຕົວຈຳເລີຍໃນວົງເງິນ 150,000 ເປໂຊ ຫ້າມອອກນອກປະເທດ ແລະ ຕ້ອງເດີນທາງມາຂຶ້ນສານເອງທຸກຄັ້ງຕໍ່ຈາກນີ້, ຂະນະດຽວກັນ ສານຈະຍັງຄົງຖືວ່າທ່ານ ນາງ ອິເມວດາ ມາກອສ ຢູ່ໃນຕຳແໜ່ງສະມາຊິກສະພາເຂດ 2 ແຂວງຮີລາກັງອີໂລໂຄສ ທີ່ຢູ່ທາງພາກເໜືອຂອງເກາະລູຊອນ ແລະ ຈະຍັງບໍ່ຕັດສິດຈາກການລົງສະໝັກຮັບເລືອກຕັ້ງຊິງຕຳແໜ່ງເຈົ້າແຂວງຮີລາກັງອີໂລໂຄສ ທີ່ຈະມີການເລືອກຕັ້ງໃນປີໜ້າ.

ທ່ານ ນາງ ອິເມວດາ ມາກອສ ເປັນພັນລະຍາຂອງອະດີດປະທານປະເທດ ເຟິດິນານ ມາກອສ ຜູ້ນຳຜະເດັດການຂອງຟິລິບປິນທີ່ປົກຄອງປະເທດຕັ້ງແຕ່ປີ 1970 ຈົນຖືກປະຊາຊົນລຸກຮືຂຶ້ນໂຄ່ນລົ້ມອຳນາດເມື່ອປີ 1986 ຫຼັງຈາກນັ້ນຄອບຄົວມາກອສຕ້ອງໄດ້ລີ້ໄພໄປຍັງເກາະຮາວາຍ ພ້ອມຊັບສິນທີ່ສໍ້ລາດບັງຫຼວງໄປຈາກຄັງແຜ່ນດິນ ເຊິ່ງມີການປະເມີນວ່າຫຼາຍເຖິງ 10,000 ລ້ານໂດລາສະຫະລັດ.