ປ.ທຣຳ ຍົກເລີກພົບປະນອກຮອບກອງປະຊຸມ G20 ກັບ ທ່ານ ປູຕິນ ດ້ວຍເຫດຄວາມເຄັ່ງຕຶງຢູ່ທະເລອາຊັອບ

ສຳນັກຂ່າວຕ່າງປະເທດລາຍງານ 30 ພະຈິກ 2018 ວ່າ: ພຽງບໍ່ພໍເທົ່າໃດຊົ່ວໂມງພາຍຫຼັງການສະແດງທ່າທີເຖິງຄວາມບໍ່ແນ່ນອນ ວ່າການພົບປະຫາລືນອກຮອບກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ລະຫວ່າງຜູ້ນຳສະຫະລັດ ອາເມຣິກາ ກັບ ຜູ້ນຳລັດເຊຍ ອາດເກີດຂຶ້ນໄດ້ ເຖິງແມ່ນວ່າຈະມີສະຖານະການຄວາມເຄັ່ງຕຶງໃນອາທິດນີ້ ທີ່ທະເລອາຊັອບ ທີ່ຕັ້ງຢູ່ລະຫວ່າງແຫຼມໄຄຣເມຍ ກັບ ແຜນດິນໃຫຍ່ລັດເຊຍ, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງຂໍ້ຄວາມໃນ Twitter ເມື່ອວັນພະຫັດ ທີ່ຜ່ານມາ ກ່ອນເດີນທາງໄປຍັງນະຄອນບົວໂນສໄອເຣສ ປະເທດອາກຊັງຕິນ ທີ່ຈະເປັນເຈົ້າພາບໃນການຈັດກອງປະຊຸມວ່າ ທ່ານພ້ອມເປັນຢ່າງຍິ່ງໃນການພົບປະຫາລືກັບທ່ານ ວະລາດິເມຍ ປູຸຕິນ ປະທານປະເທດລັດເຊຍ ເມື່ອສະຖານະການດີຂຶ້ນ.


ຕໍ່ມາທ່ານ ເດິມິຕຣີ ເປສຄັອບ ໂຄສົກທຳນຽບເຄຣມລິນ (ທຳນຽບປະທານປະເທດລັດເຊຍ) ກ່າວເຖິງການຍົກເລີກກຳນົດການຢ່າງກະທັນຫັນຂອງທ່ານ ໂດໂນ ທຣຳ ພຽງວ່າ: ຜູ້ນຳລັດເຊຍຈະໃຊ້ເວລາຢ່າງເປັນປະໂຫຍດໃນການພົບປະຫາລືກັບຜູ້ນຳປະເທດອື່ນ ໃນລະຫວ່າງການປະຊຸມຄັ້ງນີ້, ແຕ່ກ່າວອີກວ່າການທີ່ສະຫະລັດ ອາເມຣິກາ ເປັນຝ່າຍຍົກເລີກການພົບປະຫາລືກັນຄັ້ງນີ້ ອາດມີຜົນກະທົບຕໍ່ການປະຊຸມສອງຝ່າຍຮ່ວມກັບລັດເຊຍໃນບັນຫາສຳຄັນອື່ນໆຢ່າງບໍ່ມີກຳນົດ.

ໃນດ້ານຂອງທ່ານ ນາງ ຊາຣາ ແຊນເດີ ໂຄສົກຂອງທຳນຽບຂາວ ກ່າວຍອມຮັບວ່າຜູ້ນຳສະຫະລັດ ອາເມຣິກາຕັດສິນໃຈຍົກເລີກການພົບປະຫາລືຢ່າງບໍ່ເປັນທາງການກັບທ່ານ ປູຕິນ ນອກຮັບກອງປະຊຸມ G20 ຕາມຄຳແນະນຳຂອງທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດ, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ແລະ ທ່ານ ພົນເອກ ຈອນ ເຄລີ ຫົວໜ້າຄະນະເຈົ້າໜ້າທີ່ປະຈຳທຳນຽບຂາວ.

ເຊິ່ງບໍ່ອາດປະຕິເສດໄດ້ວ່າ ສະຖານະການທີ່ທະເລອາຊັອບ ເຊິ່ງເປັນສ່ວນໜຶ່ງຂອງທະເລນຳ ແລະ ເປັນພື້ນທີ່ທາງຍຸດທະສາດສຳຄັນໃນບໍລິເວນນັ້ນ ໄດ້ສ້າງຄວາມເຄັ່ງຕຶງໃຫ້ກັບກອງປະຊຸມຄັ້ງນີ້ຢ່າງຫຼີກລ້ຽງບໍ່ໄດ້ ທັງທີ່ຄວນຈະເປັນການພົບປະຫາລືກັນກ່ຽວກັບສະຖານະການດ້ານເສດຖະກິດ ແລະ ການຄ້າໂລກເປັນສຳຄັນ, ຂະນະທີ່ຄວາມພະຍາຍາມຂອງອູແກຣນໃນການສ້າງຄວາມອັບອາຍໃຫ້ກັບທ່ານ ປູຕິນ ໃນກອງປະຊຸມຄັ້ງນີ້ບໍ່ສຳເລັດຜົນ ເມື່ອບໍ່ມີບໍລິສັດໂຄສະນາແຫ່ງໃດໃນອາກຊັງຕິນ ຮັບເຮັດປ້າຍໂຄສະນາປະທ້ວງລັດເຊຍເລື່ອງໄຄຣເມຍ ແລະ ສະຖານະການທີ່ທະເລອາຊັອບ ແລ້ວນຳໄປຕິດຕັ້ງໜ້າສະຖານທີ່ຈັດກອງປະຊຸມ.