ເຢຍລະມັນປະຕິເສດຄຳຂໍຂອງອູແກຣນ ທີ່ຈະໃຫ້ NATO ຄຸ້ມຄອງ

ສຳນັກຂ່າວຕ່າງປະເທດລາຍງານ 30 ພະຈິກ 2018 ວ່າ: ທ່ານ ນາງ ອັງເກລາ ແມເຄິ ນາຍົກລັດຖະມົນຕີເຢຍລະມັນ ກ່າວເມື່ອວັນພະຫັດ ທີ່ຜ່ານມາ ກ່ອນເດີນທາງໄປຍັງນະຄອນຫຼວງບົວໂນສໄອເຣສ ປະເທດອາກຊັງຕິນ ເພື່ອເຂົ້າຮ່ວມກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ວ່າແນ່ນອນຄວາມຂັດແຍ່ງລະຫວ່າງລັດເຊຍ ກັບ ອູແກຣນຈາກເຫດການທີ່ທະເລອາຊັອບ ເມື່ອຕົ້ນອາທິດນີ້ ເປັນກໍລະນີທີ່ເຄັ່ງຕຶງ ແຕ່ລັດຖະບານອູແກຣນຕ້ອງມີເຫດຜົນຫຼາຍກວ່ານີ້, ໂດຍທ່ານ ນາງ ອັງເກລາ ແມເຄິ ກ່າວວ່າມາດຕະການທາງທະຫານບໍ່ແມ່ນທາງອອກທີ່ເໝາະສົມ ແຕ່ຕ້ອງເປັນການເຈລະຈາຕາມຫຼັກການທູດ ແລະ ທ່ານ ນາງ ຢືນຢັນວ່າເອີຣົບຍັງຄົງປຶກສາຫາລືເປັນກາຍພາຍໃນກ່ຽວກັບມາດຕະການກົດດັນທາງເສດຖະກິດຕໍ່ລັດເຊຍ ທີ່ໃຊ້ມາຕັ້ງແຕ່ວິກິດໄຄຣເມຍ ເມື່ອປີ 2014.

Ukrainain seviceman attends a military drills near Urzuf village not far from the city of Mariupol, eastern Ukraine on November 29, 2018. (Photo by Sega VOLSKII / AFP)

ທ່າທີດັ່ງກ່າວຂອງທ່ານ ນາງ ອັງເກລາ ແມເຄິ ເຊິ່ງຖືເປັນຜູ້ນຳເອີຣົບໂດຍພຶດຕິໄນ ເກີດຂຶ້ນພາຍຫຼັງສະພານິຕິບັນຍັດແຫ່ງຊາດອູແກຣນ ອະນຸມັດຄຳຮ້ອງຂອງທ່ານ ເປໂຕຣ ໂປໂຣເຊນໂກ ປະທານປະເທດອູແກຣນ ໃນການປະກາດກົດໄອຍະການເສິກ ຢ່າງໜ້ອຍ 30 ວັນ ນັບຕັ້ງແຕ່ວັນທີ 28 ພະຈິກ ທີ່ຜ່ານມາ ຄວບຄຸມພື້ນທີ່ທັງໝົດຕາມເຂດຊາຍແດນເບື້ອງຕາເວັນອອກຂອງປະເທດທີ່ຕິດກັບລັດເຊຍ ແລະ ຮຽກຮ້ອງຂໍການສະໜັບສະໜູນທາງທະຫານຈາກອົງການສົນທິສັນຍາອາລັງຕິກເໜືອ (NATO) ທັງທີ່ປະເທດອູແກຣນບໍ່ໄດ້ເປັນສະມາຊິກ ໃນການສົ່ງເຮືອຮົບເຂົ້າສູ່ທະເລອາຊັອບ ທີ່ຢູ່ລະຫວ່າງແຫຼມໄຄຣເມຍກັບແຜ່ນດິນໃຫຍ່ລັດເຊຍ.

ໃນດ້ານຂອງທ່ານ ເຢນ ສະໂຕນເທນເບິກ ເລຂາທິການ NATO ບໍ່ສະແດງທ່າທີໃດ ພາຍຫຼັງຄຳກ່າວຂອງຜູ້ນຳເຢຍລະມັນ ເຊັ່ນດຽວກັບບັນດາຜູ້ນຳຫຼາຍປະເທດໃນເອີຣົບ ລວມເຖິງທ່ານ ເອມມານູເອວ ມາຄຣົງ ຜູ້ນຳປະເທດຝຣັ່ງ ແລະ ສະຫະພາບເອີຣົບ (EU) ພຽງອອກຖະແຫຼງນາມປະນາມສະຖານະການທີ່ເກີດຂຶ້ນ, ຂະນະທີ່ທຳນຽບເຄຣມລິນ (ທຳນຽບປະທານປະເທດລັດເຊຍ) ກ່າວວ່າການເຄື່ອນໄຫວຂອງທ່ານ ເປໂຕຣ ໂປໂຣເຊນໂກ ຕໍ່ສະຖານະການໃນທະເລອາຊັອບເປັນພຽງການຫາສຽງ ກ່ອນການເລືອກຕັ້ງຜູ້ນຳອູແກຣນຄັ້ງຕໍ່ໄປທີ່ຈະຈັດຂຶ້ນໃນເດືອນມີນາ 2019 ທີ່ລັດເຊຍຕີລາຄາວ່າມີທ່າອ່ຽງສູງທີ່ທ່ານ ເປໂຕຣ ໂປໂຣເຊນໂກ ຈະເປັນຝ່າຍປະລາໄຊ ໃຫ້ແກ່ທ່ານ ນາງ ຢູເລຍ ທິໂມເຊນໂກ ອະດີດນາຍົກລັດຖະມົນຕີອູແກຣນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube