ຜູ້ນຳ ສ.ອາເມຣິກາ ອອກຄຳສັ່ງສ້າງຕັ້ງ ສູນບັນຊາການອະວະກາດ

ສຳນັກຂ່າວຕ່າງປະເທດລາຍງານເມື່ອວັນທີ 18 ທັນວາ 2018 ທີ່ຜ່ານມາວ່າ: ທ່ານ  ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງນາມໃນບົດບັນທຶກເຖິງທ່ານ ພົນເອກ ເຈມ ແມັດທິສ ລັດຖະມົນຕີກະຊວງປ້ອງກັນປະເທດ ເມື່ອວັນອັງຄານ ທີ່ຜ່ານມາ ເປັນຄຳສັ່ງໃຫ້ມີການຈັດຕັ້ງສູນບັນຊາການອະວະກາດ ເຊິ່ງເປັນຄົນລະສ່ວນກັບແຜນຍຸດທະສາດວ່າດ້ວຍການຈັດຕັ້ງກອງກຳລັງອະວະກາດ ເຊິ່ງຈະເປັນກອງກຳລັງແຫ່ງທີ 6 ໃນສັງກັດຂອງກອງທັບສະຫະລັດ ອາເມຣິກາ ພາຍໃນປີ 2020 ຫຼື ກ່ອນຄົບວາລະການດຳລົງຕຳແໜ່ງຜູ້ນຳສະຫະລັດ ອາເມຣິກາສະໄໝທຳອິດຂອງທ່ານ ໂດໂນ ທຣຳ.

ສຳລັບສູນບັນຊາການອະວະກາດຈະຖືເປັນສູນບັນຊາການທາງທະຫານແຫ່ງທີ 11 ຂອງກະຊວງປ້ອງກັນປະເທດສະຫະລັດ ອາເມຣິກາ ເກີດຂຶ້ນທ່າມກາງຄວາມເປັນຫ່ວງວ່າດາວທຽມຂອງສະຫະລັດ ອາເມຣິກາກຳລັງຕົກເປັນເປົ້າຖືກໂຈມຕີໂດຍຈີນ ແລະ ລັດເຊຍ ໂດຍເບື້ອງຕົ້ນມີການປະເມີນງົບປະມານຂອງສູນບັນຊາການອະວະກາດໄວ້ທີ່ 800 ລ້ານໂດລາສະຫະລັດ ພາຍໃນໄລຍະເວລາ 5 ປີຕໍ່ໜ້ານີ້ ເຊິ່ງທຳນຽບຂາວຄິດໄລ່ຄ່າໃຊ້ຈ່າຍສ່ວນນີ້ໄວ້ໃນແຜນງົບປະມານປີ 2020 ອີກດ້ວຍ, ຂະນະທີ່ເຈົ້າໜ້າທີ່ປະຕິບັດງານໃນໄລຍະທຳອິດ ຈະມີປະມານ 600 ຄົນທັງທະຫານ ແລະ ພົນລະເຮືອນ ເຊິ່ງຈະຍ້າຍມາຈາກສຳນັກງານດ້ານອະວະກາດທີ່ສ່ວນໃຫຍ່ຢູ່ພາຍໃຕ້ສັງກັດກອງທັບອາກາດ ແລະ ຕັ້ງເປົ້າເພີ່ມເປັນຢ່າງໜ້ອຍ 1,000 ຄົນ ພາຍໃນໄລຍະເວລາ 5 ປີຕໍ່ຈາກນີ້.

ໃນມື້ດຽວກັນທ່ານ ໄມ ເພນ ຮອງປະທານປະເທດສະຫະລັດ ອາເມຣິກາ ໄດ້ລົງພື້ນທີ່ສູນອະວະກາດເຄນເນດີ ເທິງເກາະເມີຣິດ ແຄມຝັ່ງທະເລເບື້ອງຕາເວັນອອກຂອງລັດຟໍຣິດາ ເພື່ອຕິດຕາມຄວາມຄືບໜ້າຂອງການກຽມສົ່ງຈະຫຼວດຄັ້ງຫຼ້າສຸດຂອງສະເປສເອັກ ໃນການປ່ອຍດາວທຽມສື່ສານລຸ້ນໃໝ່ໃຫ້ກັບກອງທັບອາກາດສະຫະລັດ ອາເມຣິກາ, ເຖິງຢ່າງໃດກໍ່ຕາມ ກະຊວງປ້ອງກັນປະເທດສະຫະລັດ ອາເມຣິກາໄດ້ສະເໜີເລື່ອງໄປຍັງທຳນຽບຂາວ ເພື່ອຂໍການສະໜັບສະໜູນດ້ານງົບປະມານເພີ່ມເຕີມອີກ 1,500 ລ້ານໂດລາສະຫະລັດ ໃນການພັດທະນາໂຄງການລະບົບດາວທຽມ GPS ລຸ້ນທີ 3 ທີ່ມີເປົ້າໝາຍສົ່ງຂຶ້ນສູ່ຊັ້ນບັນຍາກາດໂລກໃນອີກບໍ່ພໍເທົ່າໃດປີຂ້າງໜ້າ.

- Advertisement -