ຂະບວນການປະທ້ວງຕໍ່ຕ້ານລັດຖະບານຝຣັ່ງ ທະວີຄວາມຮຸນແຮງຂຶ້ນອີກຄັ້ງ (ວິດີໂອ)

(Photo by CHARLY TRIBALLEAU / AFP)

ສຳນັກຂ່າວຕ່າງປະເທດລາຍງານ 6 ມັງກອນ 2019 ວ່າ: ການປະທ້ວງຕໍ່ຕ້ານລັດຖະບານຝຣັ່ງ ໃນນາມແນວຮ່ວມເສື້ອກັກເຫຼືອງ ທີ່ແກ່ຍາວມາຕັ້ງແຕ່ເດືອນພະຈິກ 2018 ຍັງຄົງເກີດຂຶ້ນຢ່າງເນື່ອງນິດລຽນຕິດຈົນກ້າວເຂົ້າສູ່ປີ 2019 ໂດຍຈຳນວນຜູ້ເຂົ້າຮ່ວມການໂຮມຊຸມນຸມທົ່ວປະເທດຕາມການປະເມີນຂອງກະຊວງປ້ອງກັນຄວາມສະຫງົບຝຣັ່ງ ມີປະມານ 12,000 ຄົນ ໃນຈຳນວນນີ້ປະມານ 4,000 ຄົນຢູ່ນະຄອນຫຼວງປາຣີສ ເພີ່ມຂຶ້ນເລັກໜ້ອຍຈາກຊ່ວງຄຣິສມາສ  ເຖິງແມ່ນວ່າສະຖານະການຢູ່ນະຄອນຫຼວງໃນວັນເສົາທຳອິດ ຂອງເດືອນມັງກອນ ເລີ່ມດ້ວຍການເດີນຂະບວນຢ່າງສະຫງົບໄປຕາມເສັ້ນທາງຂອງກຸ່ມຜູ້ປະທ້ວງຫຼາຍພັນຄົນ ແຕ່ສະຖານະການໄດ້ທະວີຄວາມຮຸນແຮງ ເມື່ອຕຳຫຼວດຕັ້ງດ່ານສະກັດຢູ່ບໍລິເວນຂົວຂ້າມແມ່ນ້ຳແຊນ ເຊິ່ງເປັນເສັ້ນທາງສັນຈອນສາຍຫຼັງເຂົ້າສູ່ສູນກາງທາງລັດຖະການ ທີ່ລວມເຖິງສະພາ ແລະ ທຳນຽບລັດຖະບານ.

Yellow vest “Gilets Jaunes” march along Rue Quatre September in Paris on January 5, 2019 (Photo by Olivier MORIN / AFP)

ເຊິ່ງຈາກລາຍງານຂອງສຳນັກງານຕຳຫຼວດນະຄອນຫຼວງປາຣີສຢືນຢັນວ່າ ກຸ່ມຜູ້ປະທ້ວງໄດ້ດຶກແກວ່ງສິ່ງຂອງທີ່ລວມເຖິງລະເບີດໄຟເຂົ້າໃສ່ເຈົ້າໜ້າທີ່ກ່ອນ, ຕຳຫຼວດປາບຈະລາຈົນຈຶ່ງຈຳເປັນຕ້ອງຕອບໂຕ້ດ້ວຍການຍິງແກັດນ້ຳຕາ, ເຖິງຢ່າງໃດກໍ່ຕາມ ກຸ່ມຜູ້ປະທ້ວງບາງສ່ວນສາມາດເຂົ້າເຖິງດ້ານໜ້າປະຕູທາງເຂົ້າສຳນັກງານໂຄສົກລັດຖະບານ ສົ່ງຜົນໃຫ້ທ່ານ ເບນຈາມິນ ກຣີໂວ ໂຄສົກຄະນະລັດຖະມົນຕີ ແລະ ຄະນະຕ້ອງອົບພະຍົບຜ່ານທາງອອກສຸກເສີນ, ຂະນະທີ່ຕຳຫຼວດ ແລະ ກຸ່ມຜູ້ປະທ້ວງປະທະກັນຢ່າງໜັກໜ່ວງ ຈາກການທີ່ມີຄວາມພະຍາຍາມທຳລາຍປະຕູເພື່ອບຸກເຂົ້າໄປພາຍໃນອາຄານ.

(Photo by Bertrand GUAY / AFP)

ໃນເວລາດຽວກັນ ກຸ່ມຜູ້ປະທ້ວງອີກບາງສ່ວນ ໄດ້ປະປົນກັບນັກທ່ອງທ່ຽວຢູ່ບໍລິເວນຊັອງເຊລີເຊ ສົ່ງຜົນໃຫ້ການຄວບຄຸມສະຖານະການຂອງເຈົ້າໜ້າທີ່ຍາກລຳບາກຂຶ້ນຕື່ມ ແຕ່ໃນທີ່ສຸດຕຳຫຼວດກໍ່ສາມາດຄວບຄຸມສະຖານະການທີ່ຊັອງເຊລີເຊໄດ້ ໂດຍໃຊ້ລົດສີດນ້ຳແຮງດັນສູງ ແລະ ຈັບກຸມຜູ້ປະທ້ວງຫຼາຍສິບຄົນ ທີ່ຈູດໄຟເຜົາທຳລາຍຊັບສິນສາທາລະນະ ແລະ ລົດຫຼາຍສິບຄັນທີ່ຈອດໄວ້ແຄມທາງ, ຂະນະທີ່ທ່ານ ເອມມາມູເອວ ມາຄຣົງ ປະທານປະເທດຝຣັ່ງ ປະນາມສະຖານະການການປະທ້ວງທີ່ເກີດຂຶ້ນ ແລະ ກ່າວຢ້ຳວ່າລັດຖະບານພ້ອມທີ່ຈະເຈລະຈາຕະຫຼອດເວລາ ເພາະເປັນຝ່າຍຍອມປະຕິບັດຕາມຄຳຮຽກຮ້ອງຂອງຜູ້ປະທ້ວງມາແລ້ວຫຼາຍຢ່າງ ໂດຍສະເພາະການຍົກເລີກຂຶ້ນພາສີນ້ຳມັນ, ການເພີ່ມຄ່າແຮງຂັ້ນຕ່ຳ ແລະ ການຫຼຸດພາສີສຳລັບພົນລະເມືອງໃນໄວກະສຽນ.