ການພົບປະລະຫວ່າງຜູ້ນຳ ສ.ອາເມຣິກາ – ເກົາຫຼີເໜືອ ຄັ້ງທີ 2 ອາດເກີດຂຶ້ນທີ່ປະເທດຫວຽດນາມ

US President Donald Trump (R) gestures as he and North Korea's leader Kim Jong Un / AFP PHOTO / SAUL LOEB

ສຳນັກຂ່າວຕ່າງປະເທດລາຍງານ 13 ມັງກອນ 2019 ໂດຍອ້າງຈາກການລາຍງານຂອງສື່ໃຫຍ່ຫຼາຍແຫ່ງໃນເກົາຫຼີໃຕ້ວ່າ: ສຳນັກຂ່າວ Yonhap ແລະ ສື່ໃຫຍ່ຂອງຍີ່ປຸ່ນລວມເຖິງໜັງສືພິມໂຢມິອຸຣິ ວ່າລັດຖະບານສະຫະລັດ ອາເມຣິກາ ສະເໜີໄປຍັງລັດຖະບານເກົາຫຼີເໜືອ ເລື່ອງການຈັດກອງປະຊຸມສຸດຍອດ ຄັ້ງທີ 2 ລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກັບ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໃນກາງເດືອນກຸມພາ ນີ້ ແລະແນະນຳວ່າຫວຽດນາມຄືປະເທດທີ່ເໝາະສົມທີ່ສຸດໃນການຂໍໃຊ້ເປັນສະຖານທີ່ຈັດງານ ເຖິງແມ່ນວ່າຍັງບໍ່ມີການລະບຸຊື່ເມືອງຢ່າງຊັດເຈນ ແຕ່ຫຼາຍຝ່າຍເຊື່ອວ່າ ອາດຈະເປັນນະຄອນຫຼວງຮ່າໂນ້ຍ ສອດຄ່ອງກັບລາຍງານຂອງ The Straits Times ສື່ໃຫຍ່ຂອງປະເທດສິງກະໂປອີກດ້ວຍ.

ເຖິງຢ່າງໃດກໍ່ຕາມ, ເກົາຫຼີເໜືອ ແລະ ຫວຽດນາມຍັງບໍ່ສະແດງທ່າທີຕໍ່ການລາຍງານດັ່ງກ່າວ, ຂະນະທີ່ໂຢມິອຸຣິລາຍງານອີກວ່າ: ຄະນະຂອງທ່ານ ໂດໂນ ທຣຳ ໃຫ້ຄວາມສົນໃຈຂໍໃຊ້ສະຖານທີ່ໃນກຸ່ມປະເທດອາຊີຕາເວັນອອກສຽງໃຕ້ ວ່າເປັນສະຖານທີ່ໆເໝາະສົມສຳລັບການຈັດກອງປະຊຸມທີ່ສຸດ ໂດຍປະເທດທີ່ມີການຄາດໝາຍໄວ້ກ່ອນໜ້ານີ້ມີໄທ, ອິນໂດເນເຊຍ ແລະ ສິງກະໂປ ເຊິ່ງເປັນເຈົ້າພາບຈັດກອງປະຊຸມຄັ້ງທຳອິດ ເມື່ອເດືອນມິຖຸນາ 2018 ທີ່ຜ່ານມາ, ສ່ວນສະຖານທີ່ນອກພູມມິພາກອາຊີຕາເວັນອອກສຽງໃຕ້ມີມົງໂກລີ ແລະ ບ້ານປັນມຸນຈອມ ຊາຍແດນລະຫວ່າງສອງເກົາຫຼີ.