ຈີນປະສົບຄວາມສຳເລັດເບື້ອງຕົ້ນ ໃນການທົດລອງປູກພືດເທິງດວງຈັນ (ວິດີໂອ)

ສຳນັກຂ່າວຊິນຫົວຂອງທາງການຈີນລາຍງານເມື່ອວັນທີ 15 ມັງກອນ 2019 ທີ່ຜ່ານມາວ່າ: ແນວພັນຝ້າຍທີ່ຖືກສົ່ງຂຶ້ນໄປທົດລອງປູກເທິງດວງຈັນ ດ້ວຍຍານອະວະກາດສາງເອີ-4 ມີການຈະເລີນເຕີບໃຫຍ່.

ພາລະກິດດັ່ງກ່າວນີ້, ເກີດຂຶ້ນຫຼັງຈາກທີ່ຍານອະວະກາດ ສາງເອີ-4 ລົງຈອດຢູ່ດ້ານມືດຂອງດວງຈັນ ແລະ ຖືເປັນພາລະກິດບຸກເບີກການທົດລອງທາງຊີວະຄັ້ງທຳອິດເທິງດວງຈັນ.

ຄະນະນັກວິທະຍາສາດຈາກມະຫາວິທະຍາໄລສົງຊິ້ງໄດ້ໃຫ້ຂໍ້ມູນວ່າ: ນອກຈາກແນວພັນຝ້າຍແລ້ວ ຍານສາງເອີ-4 ຍັງໄດ້ບັນທຸກແນວພັນມັນຝຣັ່ງ ແລະ ຕົ້ນອະຣາບິດັອບຊິສ (Arabidopsis) ຂຶ້ນໄປພ້ອມ ລວມເຖິງໄຂ່ແມງບູດ ແລະ ຢີສເພື່ອສ້າງຊີວະວົງຈອນຂະໜາດນ້ອຍ.

ເຊິ່ງພາບຖ່າຍທີ່ຖືກສົ່ງຈາກຍານມາຍັງໂລກ ເປັນຫຼັກຖານທີ່ສະແດງໃຫ້ເຫັນວ່າ ຕົ້ນຝ່າຍສາມາດຈະເລີນເຕີບໃຫຍ່ໄດ້ຈິງ, ເຖິງຢ່າງໃດກໍ່ຕາມ ຍັງບໍ່ມີພາບການເຕີບໃຫຍ່ຂອງສິ່ງມີຊີວິດຊະນິດອື່ນໆ ແຕ່ກໍ່ຕ້ອງຕິດຕາມກັນຕໍ່ໄປ.