ມາເລເຊຍ ຍົກເລີກໂຄງການລົດໄຟຄວາມໄວສູງກັບຈີນ ເພື່ອຫຼຸດຜ່ອນພາລະໜີ້ສິນຂອງປະເທດ

ສຳນັກຂ່າວຕ່າງປະເທດລາຍງານ 26 ມັງກອນ 2019 ວ່າ: ໃນໄລຍະຫຼາຍເດືອນທີ່ຜ່ານມາ ລັດຖະບານຊຸດໃໝ່ຂອງມາເລເຊຍ ພາຍໃຕ້ການນຳພາຂອງທ່ານນາຍົກລັດຖະມົນຕີ ດຣ.ມະຫາເທ ໂມຮຳໝັດ ໄດ້ຍົກເລີກໂຄງການໃຫຍ່ໆຫຼາຍໂຄງການ ທີ່ໄດ້ລົງນາມໃນລັດຖະບານຊຸດກ່ອນໜ້ານີ້ ເພື່ອຫຼຸດຕົວເລກໜີ້ສິນມະຫາສານຂອງປະເທດປະມານ 1 ພັນຕື້ຣິງກິດ (251 ຕື້ໂດລາ).

ທ່ານ ໂມຮຳເໝັດ ອັສມິນ ອາລີ ລັດຖະມົນຕີກະຊວງເສດຖະກິດມາເລເຊຍ ເປີດເຜີຍເມື່ອວັນເສົາ ທີ່ຜ່ານມາວ່າ: ທ່ານໄດ້ຕັດສິນໃຈເມື່ອ 2 ວັນກ່ອນ ໃນການຍົກເລີກໂຄງການກໍ່ສ້າງທາງລົດໄຟສາຍຕາເວັນອອກ ຫຼື ECRL (Eastern Coast Rail Link) ໄລຍະທາງ 688 ກິໂລແມັດມູນຄ່າງ 81 ຕື້ຣິງກິດ (19.6 ຕື້ໂດລາ) ທີ່ຈະເຊື່ອມຕໍ່ຝັ່ງຕາເວັນອອກ ແລະ ຝັ່ງຕາເວັນຕົກຂອງປະເທດ.

ລັດຖະບານມາເລເຊຍຊຸດທີ່ຜ່ານມາ ພາຍໃຕ້ການນຳຂອງທ່ານ ນາຈິບ ຣາຊັກ ມີສາຍພົວພັນອັນດີກັບຈີນ ໄດ້ລົງນາມຫຼາຍໂຄງການໃຫຍ່ໆທີ່ລັດຖະບານຈີນສະໜັບສະໜູນດ້ານການເງິນ ແຕ່ນັກວິຈານກ່າວວ່າ ຂໍ້ຕົກລົງໃນຫຼາຍໂຄງການບໍ່ມີຄວາມໂປ່ງໃສ, ທ່າມກາງຂ່າວລືວ່າເປັນຂໍ້ຕົກລົງເພື່ອແລກປ່ຽນກັບການຊ່ວຍເຫຼືອຊຳລະໜີ້ ການສໍ້ລາດບັງຫຼວງກອງທຶນ 1MDB ຂອງມາເລເຊຍ.

ຄະດີການສໍ້ລາດບັງຫຼວງກອງທຶນພັດທະນາເສດຖະກິດມາເລເຊຍໃນໄລຍະຍາວ ຫຼື 1MDB ເປັນປັດໄຈຫຼັກທີ່ເຮັດໃຫ້ພັກລັດຖະບານຂອງທ່ານ ນາຈິບ ຣາຊັກ ປະລາໄຊການເລືອກຕັ້ງ ເມື່ອເດືອນພຶດສະພາ ປີຜ່ານມາ ແລະ ເຮັດໃຫ້ ດຣ. ມະຫາເທ ໂມຮຳໝັດ ກັບຄືນສູ່ອຳນາດອີກຄັ້ງ.

ຫຼັງຈາກກັບຄືນສູ່ຕຳແໜ່ງນາຍົກ ດຣ. ມະຫາເທ ໂມຮຳໝັດ ກໍ່ໄດ້ສັ່ງທົບທວນຫຼາຍໂຄງການຂະໜາດໃຫຍ່ ທີ່ລົງນາມໂດຍທ່ານ ນາຈິບ ຣາຊັກ ຕະຫຼອດໄລຍະ 9 ປີທີ່ເປັນລັດຖະບານ, ພ້ອມຢ້ຳວ່າຈະກວດຫາເງື່ອນໄຂທີ່ບໍ່ເປັນທຳ ທີ່ກຳນົດໄວ້ໃນຂໍ້ຕົກລົງເຫຼົ່ານັ້ນ ລວມທັງບັນຫາອັດຕາດອກເບ້ຍສູງຈາກເງິນກູ້ຂອງຈີນ ທີ່ໃຊ້ສະໜັບສະໜູນໂຄງການ.

ເຊິ່ງລັດຖະມົນຕີກະຊວງເສດຖະກິດມາເລເຊຍບໍ່ໄດ້ເປີດເຜີຍວ່າ ລັດຖະບານມາເລເຊຍຕ້ອງຈ່າຍຄ່າເສຍຫາຍເທົ່າໃດ ໃນການຍົກເລີກໂຄງການ ECRL ໂດຍກ່າວວ່າຈະເປັນການພິຈາລະນາຂອງກະຊວງການເງິນ.

HTML tutorial