ກອງທັບຟິລິບປິນໂຈມຕີເຂດທີ່ໝັ້ນກຸ່ມກອງໂຈນອາບູ ໄຊຢາບ ທາງອາກາດ

(Photo by NICKEE BUTLANGAN / AFP)

ສຳນັກຂ່າວຕ່າງປະເທດລາຍງານ 31 ມັງກອນ 2019 ວ່າ: ທ່ານ ເດວຟິນ ລໍເຣນຊານາ ລັດຖະມົນຕີກະຊວງປ້ອງກັນປະເທດຟິລິບປິນ ຖະແຫຼງເມື່ອວັນພຸດ ທີ່ຜ່ານມາວ່າ: ກອງທັບຟິລິບປິນໄດ້ປະຕິບັດການໂຈມຕີທາງອາກາດຕໍ່ເປົ້າໝາຍຫຼາຍແຫ່ງຢູ່ເມືອງປາຕິກຸນ (Palikul) ໃນແຂວງຊູລູ ເຊິ່ງເປັນສ່ວນໜຶ່ງຂອງເກາະມິນດາເນົາ ເມື່ອວັນຄັງຄານທີ່ຜ່ານມາ ຫຼັງໄດ້ຮັບຂໍ້ມູນຂ່າວກອງຢືນຢັນວ່າເປັນເຂດທີ່ໝັ້ນຂອງກອງໂຈນອາບູ ໄຊຢາບ.

ເຖິງແມ່ນວ່າຍັງບໍ່ມີການເປີດເຜີຍຜົນຂອງການປະຕິບັດການຄັ້ງນີ້ ແຕ່ປະຕິບັດການດັ່ງກ່າວເກີດຂຶ້ນພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ທ່ານ ໂຣດຼິໂກ ດູເຕເຕ ລົງຢ້ຽມຢາມເມືອງໂຈໂລ ທີ່ເປັນເຂດເທດສະບານຂອງແຂວງຊູລູ ເພື່ອສຳຫຼວດໂບສຄາທໍລິກປະຈຳເມືອງ ທີ່ໄດ້ຮັບຄວາມເສຍຫາຍຢ່າງໜັກໜ່ວງຈາກເຫດລອບວາງລະເບີດ 2 ຄັ້ງຊ້ອນ ເມື່ອວັນທີ 27 ມັງກອນ ທີ່ຜ່ານມາ, ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 22 ຄົນ ແລະ ໄດ້ຮັບບາດເຈັບຫຼາຍກວ່າ 100 ຄົນ ແລະ ທ່ານ ໂຣດຼິໂກ ດູເຕເຕສັ່ງການໃຫ້ກອງທັບປາບປາມກຸ່ມອາບູ ໄຊຢາບ ໃຫ້ຮາບກ້ຽງໂດຍໄວ.

ເຊິ່ງກຸ່ມ IS ອອກມາຮັບອ້າງວ່າເປັນຜູ້ລົງມືກໍ່ເຫດ ແຕ່ລັດຖະບານຟິລິບປິນເຊື່ອວ່າເປັນສີມືຂອງກຸ່ມອາບູ ໄຊຢາບຫຼາຍກວ່າ ຫຼື ຢ່າງໜ້ອຍກຸ່ມອາຈັງ-ອາຈັງ ກໍ່ເປັນເຄືອຂ່າຍຂອງກຸ່ມອາບູ ໄຊຢາບ ແລະ ປະກາດເປັນພັນທະມິດກັບກຸ່ມ IS.

Belongings are seen inside a mosque in Zamboanga city on the southern island of Mindanao on January 30, 2019, after a grenade attack. (Photo by STR / AFP)

ນອກຈາກນີ້, ເມື່ອວັນພຸດ ທີ່ຜ່ານມາ ຍັງເກີດເຫດຄົນຮ້າຍແກວ່ງລະເບີດໃສ່ມັດສະຢິດແຫ່ງໜຶ່ງໃນເມືອງແຊມໂບອັງກາ ທາງພາກຕາເວັນຕົກສຽງໃຕ້ຂອງເກາະມິນດາເນົາ ມີຜູ້ເສຍຊີວິດຢ່າງໜ້ອຍ 2 ຄົນ ແລະ ໄດ້ຮັບບາດເຈັບອີກ 4 ຄົນ ພາຍຫຼັງເກີດເຫດຍັງບໍ່ມີກຸ່ມໃດອອກມາອ້າງຕົວວ່າຢູ່ເບື້ອງຫຼັງ, ຂະນະທີ່ຝ່າຍຄວາມໝັ້ນຄົງຕັ້ງຂໍ້ສົມມຸດວ່າ ກຸ່ມຄົນທີ່ກ່ຽວຂ້ອງກັບເລື່ອງນີ້ຕ້ອງການຮັກສາລະດັບຂອງສະຖານະການຄວາມບໍ່ສະຫງົບໃນພື້ນທີ່ ຫຼັງຈາກທີ່ມີການປະກາດຜົນການລົງປະຊາມະຕິຂອງປະຊາຊົນມິນດາເນົາ ເມື່ອວັນທີ 21 ມັງກອນ ທີ່ຜ່ານມາ ທີ່ສຽງສ່ວນໃຫຍ່ສະໜັບສະໜູນການສ້າງຕັ້ງເຂດປົກຄອງຕົນເອງແຫ່ງໃໝ່ໃນຊື່ “ບັງຊາໂມໂຣ” ພາຍໃນປີ 2022 ເຊິ່ງຈະລວມເອົາແຂວງຊູລູ ທີ່ເປັນເຂດທີ່ໝັ້ນຂອງກຸ່ມອາບູ ໄຊຢາບ ເຂົ້າເປັນສ່ວນໜຶ່ງຂອງເຂດປົກຄອງຕົນເອງດັ່ງກ່າວ.

– ເຫດລະເບີດທີ່ໂບສຄາທໍລິກ ໃນຟິລິບປິນມີຜູ້ເສຍຊີວິດແລ້ວ 20 ຄົນ, ກອງທັບພ້ອມຕອບໂຕ້ຢ່າງເຖິງທີ່ສຸດ