ປະຊາຊົນບຣາຊິນບໍ່ພໍໃຈ ເຂື່ອນແຕກແລ້ວແຕກອີກ ຮຽກຮ້ອງລັດໃຫ້ຈັບກຸມເຈົ້າຂອງໂຄງການ

(Photo by Miguel SCHINCARIOL / AFP)

ສຳນັກຂ່າວຕ່າງປະເທດລາຍງານເມື່ອວັນທີ 1 ກຸມພາ 2019 ທີ່ຜ່ານມາວ່າ: ສຳນັກງານປ້ອງກັນໄພພົນລະເຮືອນ ໃນລັດມີນັສເຊໄຣ ທາງພາກຕາເວັນອອກສຽງໃຕ້ຂອງບຣາຊິນ ລາຍງານຈຳນວນຜູ້ເສຍຊີວິດຈາກໄພພິບັດເຂື່ອນກັກເກັບສິ່ງເຫດເຫຼືອຈາກຂະບວນການສະກັດແຮ່ເຫຼັກ ຢູ່ບໍ່ເຫຼັກເຟເຊົາ ເຊິ່ງເປັນບໍ່ເຫຼັກຂະໜາດໃຫຍ່ໄດ້ແຕກ ເມື່ອວັນທີ 25 ມັງກອນ ທີ່ຜ່ານມາ ເພີ່ມເປັນຢ່າງໜ້ອຍ 110 ຄົນ ແຕ່ຍັງມີຜູ້ສູນຫາຍອີກ 238 ຄົນ.

(Photo by Mauro Pimentel / AFP)
(Photo by Miguel SCHINCARIOL / AFP)

ໃນດ້ານຜົນການກວດຄຸນນະພາບນ້ຳ ຂອງແມ່ນນ້ຳປາເຣົາເປບາ ເຊິ່ງຢູ່ລຸ່ມເຂື່ອນ ແລະ ເປັນເສັ້ນທາງນ້ຳສາຍສຳຄັນທີ່ປະຊາຊົນອາໄສຢູ່ໃນບໍລິເວນນັ້ນໃຊ້ໃນການດຳລົງຊີວິດ ໂດຍສຳນັກງານບໍລິຫານຈັດການນ້ຳແຫ່ງຊາດບຣາຊິນ ພົບວ່າມີປະລິມານແຮ່ເຫຼັກແມັກນີຊຽມ ແລະ ອະລູມິນຽມເກີນມາດຕະຖານຫຼາຍ, ຂະນະທີ່ປະຊາຊົນປະມານ 2,000 ຄົນຮວບຕົວກັນທີ່ສຳນັກງານຂອງບໍລິສັດວາເລ ເຊິ່ງເປັນບໍລິສັດດ້ານບໍ່ແຮ່ລາຍໃຫຍ່ທີ່ສຸດຂອງໂລກ ທີ່ເມືອງເບໂລໂອຣີຊອນຊີ ເຊິ່ງເປັນເມືອງເອກຂອງລັດມີນັສເຊໄຣ ເພື່ອປະທ້ວງ ແລະ ຮຽກຮ້ອງໃຫ້ພາກລັດດຳເນີນຄະດີກັບຜູ້ບໍລິຫານຂອງບໍລິສັດວາເລ ທີ່ລວມເຖິງການລົງໂທດຕັດອິດສະຫຼະພາບອີກດ້ວຍ.

ເຖິງຢ່າງໃດກໍ່ຕາມ, ສຳນັກງານໄອຍະການແຫ່ງລັດມີນັສເຊໄຣ ແມ່ນໄດ້ສັ່ງໃຫ້ອາຍັດເງິນ ແລະ ຊັບສິນຂອງບໍລິສັດວາເລແລ້ວ 3,000 ລ້ານໂດລາສະຫະລັດ ເພື່ອເປັນຄ່າຊົດເຊີຍຄວາມເສຍຫາຍທັງໝົດໃນເບື້ອງຕົ້ນ, ນອກນີ້ ລັດຖະບານບຣາຊິນກໍ່ໄດ້ປັບໃໝ ແລະ ຢຶດຊັບຂອງບໍລິສັດວາເລຕື່ມອີກ 92.5 ລ້ານໂດລາສະຫະລັດ ເນື່ອງຈາກເຫດເຂື່ອນແຕກຄັ້ງນີ້ ເກີດຂຶ້ນຍັງບໍ່ເຖິງ 4 ປີເຕັມ ພາຍຫຼັງເຫດເຂື່ອນໃນບໍ່ແຮ່ຂະໜາດໃຫຍ່ອີກແຫ່ງໜຶ່ງຂອງບໍລິສັດວາເລ ຢູ່ໃນລັດມີນັສເຊໄຣເຊັ່ນກັນ ແຕກເມື່ອເດືອນພະຈິກ 2015 ສົ່ງຜົນໃຫ້ມີຜູ້ເສຍຊີວິດ 19 ຄົນ.