UN ເຕືອນ ໂລກກຳລັງຕົກຢູ່ໃນຊ່ວງທົດສະວັດທີ່ຮ້ອນທີ່ສຸດ

(Photo by TANG CHHIN SOTHY / AFP)

ສຳນັກຂ່າວຕ່າງປະເທດລາຍງານ 7 ກຸມພາ 2019 ວ່າ: ອົງການອຸຕຸນິຍົມໂລກ (WMO) ເຊິ່ງເປັນອົງການຊຳນານພິເສດດ້ານສະພາບອາກາດໂລກ ພາຍໃຕ້ການຄຸ້ມຄອງຂອງສະຫະປະຊາຊາດ (UN) ອອກລາຍງານວ່າ: ອຸນຫະພູມສະເລ່ຍຂອງທົ່ວໂລກເມື່ອປີທີ່ຜ່ານມາຮ້ອນຂຶ້ນ 1.0 ອົງສາເຊ ເມື່ອທຽບກັບຍຸກກ່ອນການປະຕິວັດອຸດສາຫະກຳ ແລະ ຫາກສະຖານະການຍັງມີທິດທາງຄືດັ່ງກ່າວອີກຕໍ່ໄປ ອຸນຫະພູມສະເລ່ຍຂອງໂລກຈະສູງຂຶ້ນອີກປີລະ 1.5 ອົງສາເຊ ພາຍໃນໄລຍະອີກ 5 ປີຕໍ່ໜ້າ.

ຂະນະດຽວກັນ, ຊ່ວງໄລຍະລະຫວ່າງປີ 2014 ເຖິງ 2022 ຈະເປັນທົດສະຫວັດທີ່ສະພາບອາກາດໂລກຮ້ອນທີ່ສຸດນັບຕັ້ງແຕ່ WMO ເລີ່ມວິເຄາະອຸນຫະພູມໃນໂລກນັບຕັ້ງແຕ່ປີ 1807 ເປັນຕົ້ນມາ, ໂດຍປີ 2016 ຍັງຄົງສະຖິຕິເປັນປີທີ່ຮ້ອນທີ່ສຸດໃນຮອບທົດສະວັດນີ້ ເນື່ອງຈາກປາກົດອານເອວນີໂຢ ໃນປີນັ້ນມີຄວາມຮຸນແຮງກວ່າປົກກະຕິຫຼາຍ ຕໍ່ດ້ວຍປີ 2015, 2017 ແລະ 2018.

(Photo by JOSHUA LOTT / AFP)

ເຖິງຢ່າງໃດກໍ່ຕາມ, ສະຖານະການສະພາບອາກາດໂລກໃນປີນີ້ ມີທິດທາງຮຸນແຮງຕັ້ງແຕ່ຕົ້ນປີ ເມື່ອປາກົດວ່າເດືອນມີນາ ປີນີ້ ເປັນເດືອນທີ່ຮ້ອນທີ່ສຸດເປັນປະຫວັດສາດຂອງອົດສະຕຣາລີ, ໃນຂະນະທີ່ຊີກໂລກເໜືອຜັດປະເຊີນກັບປາກົດການລົມຂົ້ວໂລກ “ໂພລາ ອໍເທັກ” ຄັ້ງຮຸນແຮງທີ່ສຸດໃນຮອບ 5 ປີ ສົ່ງຜົນໃຫ້ອຸນຫະພູມໃນພື້ນທີ່ບາງສ່ວນຂອງພູມມິພາກມິດເວດ ໃນສະຫະລັດ ອາເມຣິກາຫຼຸດຕ່ຳລົງເຖິງ -53 ອົງສາເຊ.

ອີກຢ່າງໜຶ່ງ, ລາຍງານຂອງ WMO ສອດຄ່ອງກັບຂໍ້ມູນຂອງອົງການບໍລິຫານການບິນ ແລະ ອະວະກາດແຫ່ງຊາດສະຫະລັດ ອາເມຣິກາ (NASA) ແລະ ສຳນັກງານສະໜຸດສາດ ແລະ ບັນຍາກາດແຫ່ງຊາດສະຫະລັດ ອາເມຣິກາ ວ່າປີ 2018 ເປັນປີທີ່ສະພາບອາກາດຮ້ອນທີ່ສຸດເປັນອັບດັບ 4 ຂອງໂລກໃນຮອບທົດສະວັດ ໂດຍເມື່ອປີທີ່ຜ່ານມາປີດຽວເກີດໄພທຳມະຊາດລະດັບຮຸນແຮງ 14 ຄັ້ງ, ມີຜູ້ເສຍຊີວິດລວມກັນຢ່າງເປັນທາງການ 247 ຄົນ, ສ້າງຄວາມເສຍຫາຍໃຫ້ແກ່ເສດຖະກິດໂລກ 91,000 ລ້ານໂດລາສະຫະລັດ.