ສ.ອາເມຣິກາ ສັ່ງຊື້ລະບົບປ້ອງກັນທາງອາກາດຈາກອິດສະຣາແອນ

(Photo by DAVID BUIMOVITCH / AFP)

ສຳນັກຂ່າວຕ່າງປະເທດລາຍງານເມື່ອວັນທີ 7 ກຸມພາ 2019 ທີ່ຜ່ານມາວ່າ: ກະຊວງປ້ອງກັນປະເທດສະຫະລັດ ອາເມຣິກາ ອອກຖະແຫຼງການ ເລື່ອງການຈັດຊື້ລະບົບປ້ອງກັນທາງອາກາດ “Iron Dome” ລຸ້ນລັດສະໝີປ້ອງກັນໄລຍະສັ້ນຈຳນວນ 2 ຊຸດ ຈາກອິດສະຣາແອນ ເຊິ່ງເຕັກໂນໂລຊີດັ່ງກ່າວເປັນຄວາມກ້າວໜ້າດ້ານຄວາມໝັ້ນຄົງທາງທະຫານທີ່ອິດສະຣາແອນພັດທະນາຂຶ້ນເອງ ໂດຍໄດ້ຮັບການສະໜັບສະໜູນຈາກສະຫະລັດ ອາເມຣິກາ ແລະ ປະສິດທິພາບຂອງລະບົບລຸ້ນນີ້ຈະຊ່ວຍປ້ອງກັນເຂດທີ່ໝັ້ນ ແລະ ຊັບສິນຂອງສະຫະລັດ ອາເມຣິກາ ທີ່ຕົກເປັນເປົ້າໂຈມຕີທາງອ້ອມທັງຈາກຈະຫຼວດ ແລະ ລູກປືນໃຫຍ່ທີ່ມີໄລຍະລະຫວ່າງ 4-70 ກິໂລແມັດ.

ເຖິງແມ່ນວ່າຍັງບໍ່ຊັດເຈນກ່ຽວກັບກຳນົດການ ວ່າຈະມີການຕິດຕັ້ງລະບົບປ້ອງກັນທັງ 2 ຊຸດໃນສະຫະລັດ ອາເມຣິກາ ຫຼື ດິນແດນທີ່ຕັ້ງຂອງຖານທັບສະຫະລັດ ອາເມຣິກາເມື່ອໃດ ແລະ ລາຄາຂອງອຸປະກອນເຫຼົ່ານີ້, ແຕ່ກະຊວງປ້ອງກັນປະເທດສະຫະລັດ ອາເມຣິກາເປີດເຜີຍແຜນການໃຊ້ຈ່າຍງົບປະມານ 1,600 ລ້ານໂດລາສະຫະລັດ ພາຍໃນປີ 2024 ເພື່ອຍົກລະດັບຄວາມສາມາດດ້ານການປ້ອງກັນ.

ຂະນະທີ່ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ກ່າວເຖິງການຮ່ວມມືນີ້ວ່າ ລະບົບປ້ອງກັນຂີປະນາວຸດຂອງອິດສະຣາແອນນັ້ນ ເຂັ້ມແຂງສົມຊື່ ແລະ ສັດຕູທາງທະຫານບໍ່ຄວນທ້າທາຍປະສິດທິພາບຂອງລະບົບ Iron Dome ທີ່ຜະລິດໂດຍອິດສະຣາແອນ, ເຖິງຢ່າງໃດກໍ່ຕາມ ການເຄື່ອນໄຫວດັ່ງກ່າວ ເກີດຂຶ້ນກ່ອນທີ່ອິດສະຣາແອນຈະມີການເລືອກຕັ້ງທົ່ວໄປກ່ອນກຳນົດ ໃນວັນທີ 7 ເມສານີ້ ເຊິ່ງເປັນຜົນຈາກຄວາມຂັດແຍ່ງດ້ານນະໂຍບາຍຄວາມໝັ້ນຄົງກັບກຸ່ມຮາມາສ ລະຫວ່າງພັກລິຄຸດ ພາຍໃຕ້ການນຳຂອງທ່ານ ເບນຈາມິນ ເນທັນຢາຮູ ກັບ ພັກຮ່ວມລັດຖະບານ.