ຢືນຢັນປະຊຸມຜູ້ນຳ ສ.ອາເມຣິກາ-ເກົາຫຼີເໜືອ ຄັ້ງທີ 2 ຢູ່ຮ່າໂນ້ຍ, ສ.ອາເມຣິກາຍົກນະໂຍບາຍຈະຫຼວດແຫ່ງເສດຖະກິດ

ສຳນັກຂ່າວຕ່າງປະເທດລາຍງານເມື່ອວັນທີ 8 ກຸມພາ 2019 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລົງຂໍ້ຄວາມໃນ Twitter ວ່າ: ທ່ານ ສະຕີເຟນ ບີກັນ ທູດພິເສດດ້ານວຽກງານເກົາຫຼີເໜືອຂອງລັດຖະບານ ສ.ອາເມຣິກາ ສຳເລັດຢ້ຽມຢາມນະຄອນຫຼວງປຽງຢາງ ເມື່ອກາງອາທິດນີ້ ແລະ ເດີນທາງມາຍັງນະຄອນຫຼວງໂຊແລ້ວ ພ້ອມກັບຄວາມຄືບໜ້າເພີ່ມເຕີມຄັ້ງສຳຄັນຄື ການປຶກສາຫາລືກັບທ່ານ ຄິມ ຮະຢອກ-ຊອນ ທູດພິເສດດ້ານວຽກງານສະຫະລັດ ອາເມຣິກາຂອງລັດຖະບານເກົາຫຼີເໜືອ ແລະ ເຫັນດີຮ່ວມກັບເກົາຫຼີເໜືອ ກ່ຽວກັບກຳນົດການປະຊຸມສຸດຍອດລະຫວ່າງທ່ານ ກັບ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ທີ່ຈະຈັດຂຶ້ນລະຫວ່າງວັນທີ 27-28 ກຸມນີ ນີ້ ທີ່ນະຄອນຫຼວງຮ່າໂນ້ຍ ປະເທດຫວຽດນາມ.

US envoy for North Korea Stephen Biegun (C) (Photo by Ed JONES / AFP)

ຂະນະທີ່ແຫຼ່ງຂ່າວໃນລັດຖະບານ ສ.ອາເມຣິກາເປີດເຜີຍວ່າ ກ່ອນໜ້ານັ້ນທ່ານ ໂດໂນ ທຣຳ ຕ້ອງການປະຊຸມທີ່ດານັງ ເຊິ່ງເປັນໜຶ່ງໃນເມືອງສຳຄັນຂອງຫວຽດນາມ ແຕ່ມີລາຍງານວ່າຜູ້ນຳເກົາຫຼີເໜືອອາດຢ້ຽມຢາມນະຄອນຫຼວງຮ່າໂນ້ຍຢ່າງເປັນທາງການ ໃນໄລຍະກ່ອນການພົບປະກັບຜູ້ນຳ ສ.ອາເມຣິກາ ເຊິ່ງການປະຊຸມຄັ້ງທີ່ 2 ນີ້ ຫຼາຍຝ່າຍຫວັງວ່າຈະເປັນການຕໍ່ຍອດປະເດັນສຳຄັນຈາກການພົບປະຫາລືຄັ້ງປະຫວັດສາດ ເມື່ອເດືອນມິຖຸນາ ປີທີ່ຜ່ານມາ ທີ່ປະເທດສິງກະໂປ, ນອກຈາກນີ້, ທ່ານ ໂດໂນ ທຣຳ ໄດ້ກ່າວເຖິງການປ່ຽນແປງເກົາຫຼີເໜືອໃຫ້ກາຍເປັນຈະຫຼວດແຫ່ງເສດຖະກິດດ້ວຍ ແຕ່ຍັງບໍ່ໄດ້ລົງເລິກລາຍລະອຽດ.

- Advertisement -