ການປະທ້ວງຂັບໄລ່ລັດຖະບານໄຮຕິດຳເນີນໄປຢ່າງດຸເດືອດ ເພາະບັນຫາເສດຖະກິດ ແລະ ການສໍ້ລາດບັງຫຼວງ

ສຳນັກຂ່າວຕ່າງປະເທດລາຍງານເມື່ອວັນທີ 17 ກຸມພາ 2019 ທີ່ຜ່ານມາວ່າ: ທ່ານ ຊັອງ-ອັອງຣີ ຊັອງ ນາຍົກລັດຖະມົນຕີໄຮຕິ ຖະແຫຼງຜ່ານສະຖານນີໂທລະພາບແຫ່ງຊາດ ເມື່ອວັນອາທິດທີ່ຜ່ານມາ ປະກາດມາດຕະການສຸກເສີນເພື່ອບັນເທົາວິກິດເສດຖະກິດ ແລະ ການສໍ້ລາດບັງຫຼວງໃນເບື້ອງຕົ້ນ 9 ຂໍ້ ເຊິ່ງລວມເຖິງການຫຼຸດເງິນເດືອນປະທານປະເທດ, ນາຍົກລັດຖະມົນຕີ, ລັດຖະມົນຕີ ແລະ ສະມາຊິກສະພາທຸກຄົນ ຄົນລະ 30%, ການຍົກເລີກສິດທິພິເສດດ້ານການຊຳລະຄ່າສາທາລະນູປະໂພກ ແລະ ສິດທິໃນການເດີນທາງໄປທັດສະນະໃນຕ່າງປະເທດແບບບໍ່ຈຳກັດ ລວມທັງຈະມີການຫຼຸດຈຳນວນຄະນະຜູ້ຕິດຕາມ ເພື່ອຫວັງໃຫ້ສະຖານະການການປະທ້ວງຜ່ອນຄາຍລົງ.

(Photo by HECTOR RETAMAL / AFP)

ຂະນະດຽວກັນ, ທ່ານ ຊັອງ-ອັອງຣີ ຊັອງ ຍັງສະເໜີໃຫ້ມີການປະຊຸມລະຫວ່າງລັດຖະບານກັບຕົວແທນຜູ້ປະກອບທຸລະກິດ ແລະ ຟັງຄວາມຄິດເຫັນຈາກພາກປະຊາຊົນກ່ຽວກັບການປັບຂຶ້ນຄ່າແຮງຂັ້ນຕ່ຳ ພ້ອມທັງໃຫ້ຄຳໝັ້ນສັນຍາວ່າຈະເພີ່ມການກວດສອບການສໍ້ລາດບັງຫຼວງ ໃນບໍລິສັດ ປີໂຕຣຄາຣິເບ ເຊິ່ງເປັນລັດວິສາຫະກິດພະລັງງານຂອງໄຮຕິ, ນອກຈາກນີ້ ນາຍົກລັດຖະມົນຕີໄຮຕິຍັງກ່າວຮຽກຮ້ອງຝ່າຍຕໍ່ຕ້ານລັດຖະບານໃຫ້ຢຸດຕິການໂຮມຊຸມນຸມປະທ້ວງ ແລະ ການກໍ່ຈະລາຈົນ ເນື່ອງຈາກໄຮຕິຍັງຟື້ນຕົວໄດ້ບໍ່ຫຼາຍ ນັບຕັ້ງແຕ່ແຜ່ນດິນໄຫວຄັ້ງໃຫຍ່ ເມື່ອປີ 2010 ທີ່ກໍ່ໃຫ້ເກີດການລະບາດຂອງໂລກອະວິຫາ ສົ່ງຜົນກະທົບຕໍ່ເນື່ອງໄປເຖິງສະຖຽນລະພາບທາງເສດຖະກິດ ທີ່ກາຍເປັນປະເທດທຸກຍາກທີ່ສຸດໃນພູມມິພາກອາເມຣິກາ ຕາມການຈັດອັບດັບຂອງທະນາຄານໂລກ ໂດຍ 60% ຂອງປະຊາຊົນໄຮຕິເກືອບ 11 ລ້ານຄົນມີລາຍໄດ້ຕ່ຳກວ່າມື້ລະ 2 ໂດລາສະຫະລັດ.

Haitian President, Jovenel Moise(R) speaks with the Prime Minister of Haiti, Jean-Henry CÈant(L)(Photo by HECTOR RETAMAL / AFP)

ເຊິ່ງການປະທ້ວງຂັບໄລ່ລັດຖະບານໄຮຕິພາຍໃຕ້ການນຳຂອງທ່ານປະທານປະເທດ ໂຊເວເນວ ມອຍອິສ ທີ່ຂຶ້ນສູ່ອຳນາດເມື່ອປີ 2017 ແກ່ຍາວມາຕັ້ງແຕ່ວັນທີ 7 ກຸມພາ ທີ່ຜ່ານມາ, ເຊິ່ງຄວາມຮຸນແຮງຍັງບໍ່ມີທິດທາງທີ່ຈະຜ່ອນຄາຍລົງ ອັນໄດ້ສົ່ງຜົນໃຫ້ມີຜູ້ເສຍຊີວິດແລ້ວ 7 ຄົນ, ໂດຍການປະທ້ວງເປັນຜົນມາຈາກຄວາມບໍ່ພໍໃຈຂອງປະຊາຊົນຕໍ່ອັນຕາເງິນເຟີ້ທີ່ເພີ່ມສູງ ອັນເປັນຜົນມາຈາກການສໍ້ລາດບັງຫຼວງນັບຕັ້ງແຕ່ເຈົ້າໜ້າທີ່ລັດລະດັບສູງສຸດ ແລະ ລາຍງານເລື່ອງການຍັກຍອກເງິນເກືອບ 2,000 ລ້ານໂດລາສະຫະລັດ ຈາກກອງທຶນນ້ຳມັນທີ່ເວເນຊູເອລາຂາຍໃຫ້ໄຮຕິໃນລາຄາພິເສດຜ່ານປີໂຕຣຄາຣິເບ ລະຫວ່າງປີ 2016-2017.

ໃນດ້ານຂອງທ່ານ ໂຊເວເນວ ມອຍອິສ ປະທານປະເທດໄຮຕິ ຢືນຢັນບໍ່ລາອອກຈາກຕຳແໜ່ງກ່ອນກຳນົດ, ດ້ານສະຫະລັດ ອາເມຣິກາອົບພະຍົບເຈົ້າໜ້າທີ່ການທູດບາງສ່ວນກັບປະເທດ, ຂະນະທີ່ການາດາ ປິດສະຖານທູດປະຈຳນະຄອນຫຼວງປໍໂຕແປຣງເປັນການຊົ່ວຄາວ ແລະ ສົ່ງຍົນໄປຮັບປະຊາຊົນອອກຈາກໄຮຕິແລ້ວ.

(Photo by HECTOR RETAMAL / AFP)
(Photo by HECTOR RETAMAL / AFP)
(Photo by HECTOR RETAMAL / AFP)

- Advertisement -