ຜູ້ນຳກອງທັບເວເນຊູເອລາ ສັ່ງທຸກເຫຼົ່າທັບໃຫ້ກຽມພ້ອມຮັບມືກັບການຖືກຮຸກຮານ

ສຳນັກຂ່າວຕ່າງປະເທດລາຍງານ 20 ກຸມພາ 2019 ວ່າ: ທ່ານພົນເອກ ວະລາດິເມຍ ປະດຣິໂນ ໂລເປສ ລັດຖະມົນຕີກະຊວງປ້ອງກັນປະເທດເວເນຊູເອລາ ຖະແຫຼງເມື່ອວັນອັງຄານ ຢ້ຳຈຸດຢືນຂອງທຸກເຫຼົ່າທັບໃນການສະໜັບສະໜູນທ່ານປະທານປະເທດ ນິໂຄລັສ ມາດູໂຣ ໃນຖານະຜູ້ນຳທີ່ມີອຳນາດຢ່າງຊອບທຳພຽງໜຶ່ງດຽວ ແລະ ໄດ້ເນັ້ນໃຫ້ທະຫານທຸກຄົນຕື່ນຕົວຕະຫຼດເວລາ ເນື່ອງຈາກບ້ານເມືອງກຳລັງປະເຊີນກັບຄວາມສ່ຽງສູງຂອງການລ່ວງລ້ຳຊາຍແດນຈາກທຸກທິດທາງ.

Aerial view of the Tienditas Bridge, in the border between Cucuta, Colombia and Tachira, Venezuela, after Venezuelan military forces blocked it with containers on February 6, 2019. – (Photo by EDINSON ESTUPINAN / AFP)

ເຊິ່ງທ່ານພົນເອກ ປາດຣິໂນ ໄດ້ສັ່ງເພີ່ມກຳລັງເຈົ້າໜາ້ທີ່ ແລະ ອາວຸດຍຸດໂທປະກອນໃນການວາງກຳລັງຕະຫຼອດແນວຊາຍແດນທາງເບື້ອງຕາເວັນຕົກຂອງປະເທດ ທີ່ຕິດັບພາກຕາເວັນອອກຂອງໂກໂລມບີ  ໂດຍສະເພາະຂົວຂ້າມນ້ຳຈາກເມືອງກູກູຕາ ຂອງໂກໂລມບີ ທີ່ລັດຖະບານສະຫະລັດ ອາເມຣິກາລຳລຽງວັດຖຸສິ່ງຂອງບັນເທົາທຸກມາຕັ້ງໄວ້ຫຼາຍຂຶ້ນຢ່າງຕໍ່ເນື່ອງ ເພື່ອເພີ່ມແຮງກົດດັນທາງມະນຸດສະທຳແກ່ລັດຖະບານເວເນຊູເອລາ ພາຍໃຕ້ການນຳຂອງທ່ານ ນິໂຄລັສ ມາດູໂຣ.

ຂະນະທີ່ບຣາຊິນປະກາດເປັນປະເທດຫຼ້າສຸດໃນອາເມຣິກາລາຕິນ ທີ່ຮ່ວມສົ່ງມອບເຄື່ອງຊ່ວຍເຫຼືອ ເຖິງແມ່ນວ່າຍັງເກືອບບໍ່ມີຄວາມເປັນໄປໄດ້ທີ່ການຂົນສົ່ງວັດຖຸສິ່ງຂອງເຫຼົ່ານັ້ນຈະສາມາດຂ້າມແດນໄດ້, ແຕ່ທ່ານ ຮວນ ກວຍໂຕ ຜູ້ນຳຝ່າຍຄ້ານ ແລະ ປະທານສະພາແຫ່ງຊາດ ທີ່ສະຖາປະນາຕົນເອງຂຶ້ນມາເປັນຜູ້ນຳຮັກສາການ ຄູ່ຂະໜາດກັບທ່ານ ນິໂຄລັສ ມາດູໂຣ ໂດຍໄດ້ຮັບການສະໜັບສະໜູນຈາກຫຼາຍກວ່າ 50 ປະເທດ ໄດ້ຢືນຢັນວ່າ ມີອາສາສະໝັກ 1 ລ້ານຄົນຈະຮ່ວມກັນລຳລຽງເຄື່ອງຊ່ວຍເຫຼືອຂ້າມແດນມາແຈກຢາຍໃນວັນທີ 23 ກຸມພານີ້ ແລະ ຍັງຮຽກຮ້ອງໃຫ້ທະຫານລະດັບສູງໃນກອງທັບ ຍ້າຍມາຢູ່ຂ້າງຕົນ ພ້ອມທັງໃຫ້ຄຳໝັ້ນສັນຍາວ່າຈະນິລະໂທດໃຫ້, ສ່ວນສະຫະລັດ ອາເມຣິກາສະເໜີບອກວ່າຈະຍົກເລີກມາດຕະການຂວໍ້າບາດຕໍ່ທະຫານລະດັບສູງເປັນລາຍບຸກຄົນ.

ເຖິງຢ່າງໃດກໍ່ຕາມ, ຕໍ່ມາກອງທັບເວເນຊູເອລາປະກາດປິດຊາຍແດນທັງນ່ານຟ້າ ແລະ ນ່ານນ້ຳທີ່ເຊື່ອມຈອດກັບເກາະກືຣາເຊົາ ທີ່ຢູ່ຫ່າງຈາກຝັ່ງທາງເໜືອຂອງປະເທດພຽງ 65 ກິໂລແມັດເທົ່ານັ້ນ ເນື່ອງຈາກເກາະກືຣາເຊົາຖືເປັນປະເທດປົກຄອງຕົນເອງທີ່ຢູ່ພາຍໃຕ້ອະທິປະໄຕຂອງໂຮນລັງ ແລະ ເປັນພັນທະມິດກັບສະຫະລັດ ອາເມຣິກາ ທີ່ມີຄວາມເປັນໄປໄດ້ເຊັ່ນກັນວ່າອາດມີການປ່ຽນມາລຳລຽງວັດຖຸສິ່ງຂອງຜ່ານເສັ້ນທາງນີ້ເຂົ້າປະເທດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube