ປາກິດສະຖານຈະສົ່ງຊະເລີຍເສິກຄືນອິນເດຍ,​ ຂະນະທີ່ອິນເດຍໄດ້ຍິງ F-16 ປາກິດສະຖານຕົກ

ສຳນັກຂ່າວຕ່າງປະເທດລາຍງານ 1 ມີນາ 2019 ວ່າ: ທ່ານພົນຕີ ອາ.ຈີ.ເຄ ຄາປູ ໂຄສົກກອງທັບອາກາດອິນເດຍ ຖະແຫຼງເມື່ອວັນພະຫັດທີ່ຜ່ານມາວ່າ ອິນເດຍຮັບຊາບຄຳໝັ້ນສັນຍາຂອງປາກິດສະຖານ ໃນການປ່ອຍຕົວທ່ານ ອະພິນັນທານ ວານທາມັນ, ເຖິງຢ່າງໃດກໍ່ຕາມ ກອງທັບອິນເດຍຍັງຄົງຢູ່ໃນສະຖານະກຽມພ້ອມຂັ້ນສູງສຸດທັງທາງບົກ, ທາງທະເລ ແລະ ທາງອາກາດ ໂດຍສະເພາະຕາມແນວເສັ້ນແບ່ງຄວບຄຸມ (LOC) ທີ່ເປັນເຂດຢຸດຍິງໃນພູມມິພາກແຄສເມຍ ເນື່ອງຈາກການໄດ້ຮັບອິດຫຼະພາບຂອງທ່ານ ອະພິນັນທານ ເປັນທ່າທີທີ່ຈຳເປັນຂອງລັດຖະບານປາກິດສະຖານ ເພື່ອຫຼຸດຜ່ອນແຮງກົດດັນຈາກຂໍ້ກ່າວຫາຂອງປະຊາຄົມໂລກ ຕໍ່ການລະເມີດອະນຸສັນຍາເຈນີວາເທົ່ານັ້ນ.

ຂະນະທີ່ທ່ານ ນະເຣນທຣາ ໂມດີ ນາຍົກລັດຖະມົນຕີອິນເດຍ ຍັງບໍ່ສະແດງທ່າທີຕໍ່ບັນຫານັກບິນຊະເລີຍເສິກ ແຕ່ກ່າວວ່າປະຊາຊົນອິນເດຍທຸກຄົນ ຢູ່ຄຽງຂ້າງ ແລະ ສະໜັບສະໜູນກອງທັບ.

ໃນດ້ານຂອງທ່ານ ອິມຣານ ຂ່ານ ນາຍົກລັດຖະມົນຕີປາກິດສະຖານ ກ່າວວ່າການສົ່ງຕົວທ່ານ ອະພິນັນທານບໍ່ໄດ້ໝາຍຄວາມວ່າລັດຖະບານປາກິດສະຖານອ່ອນແອ ແຕ່ສະແດງເຖິງເຈດຕະນາອັນບໍລິສຸດຂອງປາກິດສະຖານ ໃນການພະຍາຍາມຜ່ອນຄາຍຄວາມຂັດແຍ່ງກັບອິນເດຍໂດຍສັນຕິວິທີ, ເຖິງແມ່ນວ່າທ່ານ ອິມຣານ ຂ່ານ ບໍ່ໄດ້ໃຫ້ຂໍ້ມູນຢ່າງຊັດເຈນວ່າ ທ່ານ ອະພິນັນທານຈະໄດ້ຮັບການປ່ອຍຕົວເມື່ອໃດ ນອກເໜືອຈາກກ່າວວ່າ ພາຍໃນວັນສຸກ ແຕ່ແຫຼ່ງຂ່າວລະດັບສູງຫຼາຍຄົນໃນລັດຖະບານ ແລະ ກອງທັບປາກິດສະຖານເປີດເຜີຍວ່າ ເຈົ້າໜ້າທີ່ຈະນຳຕົວທ່ານ ອະພິນັນທາ່ນ ໄປສົ່ງທີ່ຈຸດຜ່ານແດນວາກາ ໃນລະຫວ່າງຕອນທ່ຽງເຖິງບ່າຍໂມງ ຕາມເວລາທ້ອງຖິ່ນຂອງວັນສຸກທີ 1 ມີນານີ້.

ໃນເວລາດຽວກັນ, ກະຊວງພາຍໃນຂອງອິນເດຍໄດ້ສັ່ງຕັດສິດທິທາງການເມືອງຂອງພັກຈາມາອັດ-ອີ-ອິດສະລາມີ ເຊິ່ງເປັນພັກການເມືອງສະໜັບສະໜູນການແບ່ງແຍກດິນແດນໃນແຄສເມຍເປັນເວລາ 5 ປີ, ພາຍຫຼັງຈັບກຸມສະມາຊິກ ແລະ ຜູ້ສະໜັບສະໜູນໄດ້ລວມກັນຫຼາຍກວ່າ 300 ຄົນໃນອາທິດນີ້ ໂດຍພັກຈາມາອັດ-ອີ-ອິດສະລາມມີຖືເປັນໜຶ່ງໃນພັກການເມືອງເກົ່າແກ່ຂອງອິນເດຍ ສ້າງຕັ້ງຂຶ້ນໃນປີ 1942.

ເຊິ່ງການຕັດສິນໃຈຂອງປາກິດສະຖານເພື່ອປ່ອຍຕົວທ່ານ ອະພິນັນທ່ານ ທີ່ຖືກຄວບຄຸມຕົວເມື່ອວັນພຸດທີ່ຜ່ານມາ ພາຍຫຼັງຍົນຮົບທີ່ທ່ານ ອະພິນັນທານ ເປັນຜູ້ຂັບຖືກຍິງຕົກໃນເຂດແຄສເມຍຝັ່ງປາກິດສະຖານ.

ຍົນ F-16 ຂອງປາກິດສະຖານ ທີ່ກອງທັບອິນເດຍຍິງຕົກ
ຍົນ F-16 ຂອງປາກິດສະຖານ ທີ່ກອງທັບອິນເດຍຍິງຕົກ

ດ້ານກອງທັບອິນເດຍກໍ່ໄດ້ຍິງຍົນຂັບໄລ່ຂອງປາກິດສະຖານຕົກລຳໜຶ່ງດ້ວຍ ເຊິ່ງເກີດຂຶ້ນພຽງບໍ່ພໍເທົ່າໃດຊົ່ວໂມງພາຍຫຼັງທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວວ່າທ່ານຄາດຫວັງວ່າສະຖານະການຄວາມເຄັ່ງຕຶງໃນແຄສເມຍຄັ້ງນີ້ຈະຈົບດ້ວຍດີ, ແລະ ທ່ານ ວະລາດິເມຍ ປູຕິນ ປະທານປະເທດລັດເຊຍ ສົນທະນາທາງໂທລະສັບກັບນາຍົກລັດຖະມົນຕີອິນເດຍ, ສ່ວນທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຂອງຈີນ ກ່າວເຕືອນທັງອິນເດຍ ແລະ ປາກິດສະຖານວ່າ ຢ່າໃຫ້ບັນຫາດັ່ງກ່າວບານປາຍ.

ໂດຍຕົ້ນເຫດແຫ່ງຄວາມຂັດແຍ່ງຄັ້ງຫຼ້າສຸດເປັນຜົນມາຈາກເຫດການລະເບີດໂຈມຕີລົດເມໂດຍສານຂອງທະຫານອິນເດຍໃນແຄສເມຍ ເມື່ອວັນທີ 14 ກຸມພາ ທີ່ຜ່ານມາ ສົ່ງຜົນໃຫ້ທະຫານອິນເດຍເສຍຊີວິດຫຼາຍກວ່າ 40 ຄົນ ພາຍຫຼັງເກີດເຫດກຸ່ມອາອິສ-ອີ-ໂມຮຳເໝັດ ເຊິ່ງສະມາຊິກສ່ວນໃຫຍ່ທີ່ຖານທີ່ໝັ້ນໃນປາກິດສະຖານ ອອກມາຍອມຮັບວ່າເປັນຜູ້ຢູ່ເບື້ອງຫຼັງເຫດການໂຈມຕີດັ່ງກ່າວ ແລະ ກອງທັບອິນເດຍກໍ່ໄດ້ປະຕິບັດການໂຈມຕີທາງອາກາດຂ້າມເສັ້ນແບ່ງ LOC ເປັນຄັ້ງທຳອິດນັບຕັ້ງແຕ່ປີ 1971.