ເກົາຫຼີເໜືອເຝິກຊ້ອມຮົບແບບໂຈມຕີ ໂດຍມີຜູ້ນຳສູງສຸດຮ່ວມສັງເກດການ

ສຳນັກຂ່າວຕ່າງປະເທດລາຍງານ 5 ພຶດສະພາ 2019 ວ່າ: ສຳນັກຂ່າວກາງເກົາຫຼີ (KCNA) ກະບອກສຽງລັດຖະບານເກົາຫຼີເໜືອ ລາຍງານເມື່ອວັນເສົາທີ່ຜ່ານມາວ່າ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໄດ້ຮ່ວມສັງເກດການການຊ້ອມຮົບໂຈມຕີ ດ້ວຍການໃຊ້ອາວຸດນຳວິຖີພິໄສໄກ ຂອງກອງທັບປະຊາຊົນເກົາຫຼີ, ໂດຍການເຝິກຊ້ອມໄດ້ສ້າງຄວາມພໍໃຈເປັນຢ່າງຍິ່ງໃຫ້ແກ່ຜູ້ນຳເກົາຫຼີເໜືອ ເຊິ່ງໄດ້ກ່າວເນັ້ນໜັກໃຫ້ເຈົ້າໜ້າທີ່ທຸກຄົນຂອງກອງທັບປະຊາຊົນເກົາຫຼີ ກຽມພ້ອມຂັ້ນສູງສຸດເພື່ອປົກປ້ອງອະທິປະໄຕທາງການເມືອງ ແລະ ຫຼັກການເສດຖະກິດແບບເພິ່ງພາຕົນເອງ.

Photo: KCNA

ເຖິງຢ່າງໃດກໍ່ຕາມ, ຈາກການລາຍງານຂອງ KCNA ມີເນື້ອໃນສຳຄັນຂັດແຍ່ງກັບຂໍ້ມູນຈາກສຳນັກງານຄະນະເສນາທິການທະຫານຮ່ວມຂອງເກົາຫຼີໃຕ້ ທີ່ອອກຖະແຫຼງການໃນວັນດຽວກັນວ່າ ເກົາຫຼີເໜືອໄດ້ຍິງຂີປະນາວຸດຫຼາຍລູກ ຈາກຖານທັບໃນເມືອງວອນຊອນ ແຂວງຄັງວອນ ແຄມຝັ່ງທະເລເບື້ອງຕາເວັນອອກຂອງປະເທດ ໂດຍຂີປະນາວຸດດັ່ງກ່າວມີໄລຍະການຍິງລະຫວ່າງ 70-200 ກິໂລແມັດ ຖືເປັນຂີປະນາວຸດພິໄສໃກ້ ແລະ ວັດຖຸທັງໝົດຕົກລົງໃນເຂດທະເລຕາເວັນອອກ.

ຂະນະດຽວກັນ, ທຳນຽບປະທານປະເທດເກົາຫຼີໃຕ້ອອກຖະແຫຼງການສະແດງຄວາມເປັນຫ່ວງ ຕໍ່ສະຖານະການດັ່ງກ່າວ ໂດຍເຕືອນວ່າ ເປັນພຶດຕິກຳທີ່ລະເມີດຂໍ້ຕົກລົງຮ່ວມກັນລະຫວ່າງສອງເກົາຫຼີ ພ້ອມທັງຮຽກຮ້ອງໃຫ້ລັດຖະບານເກົາຫຼີເໜືອກັບຄືນສູ່ການເຈລະນາ 6 ຝ່າຍ ເພື່ອປົດອາວຸດນິວເຄຼຍຢູ່ແຫຼມເກົາຫຼີ ທີ່ໄດ້ຢຸດໄປຕັ້ງແຕ່ປີ 2009.

ໃນດ້ານຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລົງຂໍ້ຄວາມຜ່ານ Twitter ສະແດງຄວາມຄິດເຫັນກ່ຽວກັບບັນຫາດັ່ງກ່າວວ່າ ໂດຍສ່ວນຕົວຍັງມີຄວາມເຊື່ອໝັ້ນໃນຕົວທ່ານ ຄິມ ຈອງ-ອຶນ ຜູ້ນຳເກົາຫຼີເໜືອວ່າຈະບໍ່ຜິດສັນຍາ ແລະ ໝັ້ນໃຈວ່າລັດຖະບານສະຫະລັດ ອາເມຣິກາຈະສາມາດບັນລຸຂໍ້ຕົກລົງກັບອີກຝ່າຍໄດ້ໂດຍໄວທີ່ສຸດ, ສ່ວນຈີນ ແລະ ລັດເຊຍຍັງບໍ່ສະແດງທ່າທີ່ຢ່າງເປັນທາງການ.

ການເຄື່ອນໄຫວໃນຄັ້ງນີ້ ຖືເປັນການຍິງຂີປະນາວຸດຄັ້ງທຳອິດຂອງເກົາຫຼີເໜືອ ນັບຕັ້ງແຕ່ໄດ້ຢຸດຕິໄປຫຼັງການທົດລອງຂີປະນາວຸດຂ້າມທະວີບ ເມື່ອເດືອນພະຈິກ 2017 ຫຼັງຈາກນັ້ນລັດຖະບານເກົາຫຼີເໜືອປະກາດຄວາມສຳເລັດ ແລະ ການສິ້ນສຸດໂຄງການພັດທະນາດ້ານຂີປະນາວຸດທີ່ລວມເຖິງອາວຸດນິວເຄຼຍ ຕໍ່ດ້ວຍການພົບປະຫາລືຄັ້ງປະຫວັດສາດລະຫວ່າງຜູ້ນຳສະຫະລັດ ອາເມຣິກາ ກັບ ຜູ້ນຳສູງສຸດເກົາຫຼີເໜືອ ທີ່ສິງກະໂປ ເມື່ອເດືອນມິຖຸນາ 2018 ແລະ ໃນປີດຽວກັນຜູ້ນຳເກົາຫຼີເໜືອ ຍັງໄດ້ພົບປະຫາລືກັບທ່ານ ມູນ ແຈ-ອິນ ປະທານປະເທດເກົາຫຼີໃຕ້ເຖິງ 3 ຄັ້ງ ໜຶ່ງໃນນັ້ນລວມເຖິງການທີ່ຜູ້ນຳເກົາຫຼີໃຕ້ເດີນທາງຢ້ຽມຢາມນະຄອນຫຼວງປຽງຢາງ ເມື່ອເດືອນກັນຍາ 2018.

ແຕ່ເຖິງຢ່າງໃດກໍ່ຕາມ, ຜົນການພົບປະຫາລືຄັ້ງທີ 2 ລະຫວ່າງຜູ້ນຳສະຫະລັດ ອາເມຣິກາ ກັບຜູ້ນຳສູງສຸດເກົາຫຼີເໜືອ ທີ່ນະຄອນຫຼວງຮ່າໂນ້ຍ ປະເທດຫວຽດນາມ ເມື່ອເດືອນກຸມພາ ທີ່ຜ່ານມາ ກົງກັນຂ້າມຢ່າງຊັດເຈນ ກັບການພົບປະຫາລືກັນທີ່ສິງກະໂປ ໂດຍທັງສອງຝ່າຍຕ່າງກ່າວໂທດເຊິ່ງກັນ ແລະ ກັນ ວ່າເປັນຕົ້ນເຫດເຮັດໃຫ້ກອງປະຊຸມບໍ່ປະສົບຄວາມສຳເລັດ ແລະ ເກີດການກ່າວໂຈມຕີກັນ ແລະ ກັນ ລະຫວ່າງເຈົ້າໜ້າທີ່ລະດັບສູງຂອງລັດຖະບານທັງສອງປະເທດຈົນເຖິງປັດຈຸບັນ.

Photo: KCNA

Photo: KCNA

Photo: KCNA

Photo: KCNA

Photo: KCNA