ກຳປູເຈຍ ຊ້ອມຮົບຄັ້ງໃຫຍ່ ໂດຍກ່າວວ່າເພື່ອເພີ່ມຂີດຄວາມສາມາດໃນການປົກປ້ອງດິນແດນ (ວິດີໂອ)

ສຳນັກຂ່າວຕ່າງປະເທດລາຍງານ 10 ພຶດສະພາ 2019 ວ່າ: ກອງທັບກຳປູເຈຍ ປະສົບຄວາມສຳເລັດໃນການເຝິກຊ້ອມຮົບ ພາຍໃນລະຫັດ ຫະນຸມານຄຳ (Gloden Hanuman) ປະຈຳປີ 2019 ທີ່ສະໜາມບ້ານຕຣາປຽງເວງ, ເມືອງຈຳກິຣິ, ແຂວງກຳປົດ ໃນລະຫວ່າງວັນທີ 3-8 ພຶດສະພາ 2019 ທີ່ຜ່ານມາ, ພາຍໃຕ້ການນຳຂອງທ່ານ ພົນໂທ ຮຸນ ມາເນດ ຮອງຜູ້ບັນຊາການທະຫານສູງສຸດ ແລະ ຜູ້ບັນຊາການທະຫານກຳປູເຈຍ ເຊິ່ງເປັນລູກຊາຍຂອງສົມເດັດ ຮຸນ ເຊນ ນາຍົກລັດຖະມົນຕີກຳປູເຈຍ.

ໂດຍທ່ານ ພົນໂທ ຮຸນ ມາເນດ ກ່າວວ່າ ການເຝິກຊ້ອມທາງທະຫານປະຈຳປີ ມີຄວາມສຳຄັນຢ່າງຍິ່ງ ເພື່ອເພີ່ມຂີດຄວາມສາມາດ ແລະ ຄວາມຊ່ຽວຊານຂອງກອງກຳລັງທະຫານ ໃນການປົກປ້ອງດິນແດນ, ມີກຳລັງພົນຮ່ວມເຝິກຊ້ອມ 2,332 ຄົນ ລວມທັງອາວຸດໜັກຫຼາຍປະເພດເຊັ່ນ: ປືນໃຫຍ່, ຈະຫຼວດ BM-21 ແລະ RM-70, ລົດຕັງ, ລົດຫຸ້ມເກາະ ແລະ ເຮລິຄັອບແຕ.