ອີຣານ ປະຫານຊີວິດສາຍລັບ ຂອງ CIA

ສຳນັກຂ່າວຕ່າງປະເທດລາຍງານ 23 ມິຖຸນາ 2019 ໂດຍອ້າງອີງຈາກການລາຍງານຂອງສຳນັກຂ່າວ ISNA ສື່ເຄິ່ງທາງການຂອງລັດຖະບານອີຣານວ່າ ທາງການອີຣານໄດ້ປະຫານຊີວິດທ້າວ ຈາລັດ ຮາຈີ ຊາວາ ອະດີດຕົວແທນບໍລິສັດຮັບເໝົາ ທີ່ເປັນຄູ່ສັນຍາກັບສຳນັກງານການບິນຂອງກະຊວງປ້ອງກັນປະເທດອີຣານ ຖານລັກຂໍ້ມູນລັບທາງລັດຖະການໃຫ້ກັບລັດຖະບານສະຫະລັດ ອາເມຮິກາ ແລະ ສຳນັກຂ່າວກອງກາງສະຫະລັດ ອາເມຣິກາ (CIA).

ເຊິ່ງລາຍງານບໍ່ໄດ້ໃຫ້ຂໍ້ມູນຊັດເຈນວ່າ ການປະຫານຊີວິດ ຊາວາ ດ້ວຍການແຂວນຄໍນັ້ນເກີດຂຶ້ນເມື່ອໃດ ແຕ່ລະບຸວ່າເກີດຂຶ້ນຢູ່ຄຸກຣາຊາຢີ ຊາ ໃນເມືອງຄາຣັດ ເບື້ອງຕາເວັນຕົກຂອງນະຄອນຫຼວງເຕຫະຣານ ແລະ ຄຳພິພາກສາເປັນໄປຕາມມະຕິຊີ້ຂາດຂອງສານທະຫານ, ຂະນະດຽວກັນລາຍງານບໍ່ໄດ້ລະບຸອີກວ່າ ຊາວາ ຖືກຈັບແຕ່ເມື່ອໃດ ແຕ່ມີຂໍ້ມູນວ່າລັດຖະບານອີຣານໄດ້ຖອດຖອນໃບອະນຸຍາດຂອງ ຊາວາ ເມື່ອ 9 ປີກ່ອນ ແລະ ອະດີດພັນລະຍາຂອງ ຊາວາ ກໍ່ໄດ້ຮັບໂທດຕິດຄຸກ 15 ປີ ຖານສົມຮູ້ຮ່ວມຄິດໃນຂໍ້ຫາດຽວກັນ.

ຂະນະທີ່ສະຫະລັດ ອາເມຣິກາ ຍັງບໍ່ສະແດງທ່າທີຕໍ່ລາຍງານດັ່ງກ່າວ ທີ່ເກີດຂຶ້ນທ່າມກາງບັນຍາກາດໃນຕາເວັນອອກາງທີ່ເຄັ່ງຕຶງຢູ່ແລ້ວ ຈາກເຫດການໂຈມຕີເຮືອບັນທຸກນ້ຳມັນ 2 ຄັ້ງ ບໍລິເວນຊ່ອງແຄບຮໍມຸສ ໃນເດືອນນີ້ ແລະ ຍິ່ງເປັນການເພີ່ມທະວີຄວາມເຄັ່ງຕຶງຂຶ້ນຕື່ມ ເມື່ອກອງກຳລັງປະຕິວັດອີຣານຍິງໂດຣນສອດແນມຂອງສະຫະລັດ ອາເມຣິກາ ຕົກໃນອານາເຂດແຂວງຮໍມອສກັນ ທາງພາກໃຕ້ຂອງປະເທດ ໃກ້ກັບຊ່ອງແຄບຮໍມຸສ ໂດຍກອງກຳລັງປະຕິວັດອີຣານຢືນຢັນວ່າໂດຣນລະເມີດນ່ານຟ້າ ແລະ ມີພຶດຕິກຳສອດແນມຢ່າງຊັດເຈນ.

ໃນດ້ານກອງທັບສະຫະລັດ ອາເມຣິກາ ກໍ່ໄດ້ສະແດງຫຼັກຖານຂອງຕົນເອງ ເພື່ອລົບລ້າງຂໍ້ກ່າວຫາການລະເມີດນ່ານຟ້າອີຣານ, ໃນຂະນະດຽວກັນ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ເປີດເຜີຍວ່າຕົນໄດ້ສັ່ງການໃຫ້ກອງທັບສະຫະລັດ ອາເມຣິກາກຽມປະຕິບັດການໂຈມຕີທາງທະຫານຕໍ່ເປົ້າໝາຍ 3 ແຫ່ງໃນອີຣານ ແຕ່ໄດ້ຕັດສິນໃຈຖອນຄຳສັ່ງໃນໄລຍະເວລາ 10 ນາທີສຸດທ້າຍ ເນື່ອງຈາກເປັນຫ່ວງວ່າຈະມີຜູ້ເສຍຊີວິດຈຳນວນຫຼາຍ ແຕ່ກໍ່ຍັງກ່າວຢ້ຳວ່າແຜນການດັ່ງກ່າວຍັງບໍ່ຖືວ່າໄດ້ຍົກເລີກຂາດຕົວ ແລະ ຕອນນີ້ລັດຖະບານສະຫະລັດ ອາເມຣິກາ ຈະເດີນໜ້າເພີ່ມມາດຕະການກົດດັນທາງເສດຖະກິດຕໍ່ອີຣານ ແຕ່ກໍ່ສົ່ງສັນຍານວ່າສະຫະລັດ ອາເມຣິກາພ້ອມສະເໝີໃນການເຈລະຈາກັບອີຣານ ເຊິ່ງຜູ້ນຳສະຫະລັດ ອາເມຣິກາກ່າວວ່າ ຫາກຕົກລົງກັນໄດ້ຕົນຈະເຮັດໃຫ້ເສດຖະກິດອີຣານກັບມາຍິ່ງໃຫຍ່ອີກຄັ້ງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube