ລາວ-ໄທ ຈະຮ່ວມກັນແກ້ໄຂບັນຫາໝອກຄວັນ ແລະ ກຽມສະຫຼອງຄົບຮອບ 70 ປີ ສາຍພົວພັນການທູດ

ລາຍງານ 23 ມິຖຸນາ 2019, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ແລະ ທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີຂອງໄທ ພ້ອມດ້ວຍຄະນະ ໄດ້ພົບປະຫາລືສອງຝ່າຍ ໃນລະຫວ່າງກອງປະຊຸມສຸດຍອດອາຊຽນ ຄັ້ງທີ 34 ທີ່ນະຄອນຫຼວງບາງກອກ, ປະເທດໄທ.

 

ທ່ານນາຍົກລັດຖະມົນຕີຂອງໄທ ໄດ້ກ່າວຂອບໃຈຕໍ່ການຮ່ວມມືໃນການແກ້ໄຂບັນຫາໝອກຄວັນ ແລະ ເຫັນວ່າການແກ້ໄຂບັນຫາດັ່ງກ່າວ ຄວນມີມາດຕະການຮ່ວມກັນ ເພື່ອເປັນການແກ້ໄຂບັນຫາທີ່ຍືນຍົງ ທັງນີ້ກໍ່ຍ້ອນປະຊາຊົນຂອງທັງສອງປະເທດສ່ວນໃຫຍ່ເປັນຊາວກະສິກອນ ຈຶ່ງຄວນມີຄວາມຮູ້ຄວາມເຂົ້າໃຈໃນການຮ່ວມກັນແກ້ໄຂບັນຫາ ເຊິ່ງທັງ ສປປ.ລາວ ແລະ ໄທ ຕ່າງກໍ່ເຫັນດີຮ່ວມກັນວ່າມັນເປັນບັນຫາລະດັບພູມມິພາກທີ່ຕ້ອງອາໄສການຮ່ວມມືລະຫວ່າງປະເທດຕ່າງໆໃນພູມມິພາກ ແລະ ໄດ້ສັ່ງໃຫ້ໜ່ວຍງານທີ່ກ່ຽວຂ້ອງອອກມາດຕະການໃນການແກ້ໄຂບັນຫາດັ່ງກ່າວ.

 

ໃນໂອກາດນີ້, ທັງສອງຝ່າຍພ້ອມທີ່ຈະຈັດກິດຈະກຳສະເຫຼີມສະຫຼອງຮ່ວມກັນ ເນື່ອງໃນໂອກາດສະຫຼອງຄົບຮອບ 70 ປີຂອງການສະຖາປະນາສາຍພົວພັນທາງການທູດ.

ທັງສອງຝ່າຍຍັງໄດ້ປຶກສາຫາລືໃນເລື່ອງການເຊື່ອມໂຍງການທ່ອງທ່ຽວ, ການເລັ່ງເປີດໃຊ້ຈຸດກວດປ່ອຍຮ່ວມ (Common Control Area) ແລະ ການຍົກລະດັບຈຸດຜ່ານແດນລາວ-ໄທ ເພື່ອເພີ່ມຂີດການຮ່ວມມືທາງການຄ້າ ແລະ ປະຊາຊົນລະຫວ່າງສອງປະເທດ, ຕະຫຼອດຮອດການທີ່ລັດຖະບານໄທໄດ້ກຳນົດມາດຕະການແກ້ໄຂບັນຫາແຮງງານ ເຊິ່ງຈະອຳນວຍຄວາມສະດວກ ແລະ ຊ່ວຍໃຫ້ແຮງງານລາວທີ່ຢູ່ໃນໄທ ໄດ້ເຮັດວຽກຢ່າງຖືກຕ້ອງຕາມກົດໝາຍ.

ນອກຈາກນີ້, ທັງສອງຝ່າຍຍັງໄດ້ປຶກສາຫາລືກ່ຽວບັນຫາອື່ນໆທີ່ມີຄວາມສົນໃຈຮ່ວມກັນ.

 

 

 

 


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube