ຫວຽດນາມ ຮຽກພາກທຸລະກິດເຂົ້າພົບ ຫ້າມໂຄສະນາໃນສື່ທີ່ມີເນື້ອໃນຕໍ່ຕ້ານລັດຖະບານ

ສຳນັກຂ່າວຕ່າງປະເທດລາຍງານ 26 ມິຖຸນາ 2019 ວ່າ: ກະຊວງຖະແຫຼງຂ່າວ ແລະ ການສື່ສານຫວຽດນາມ ໄດ້ເຊີນຕົວແທນຈາກບໍລິສັດຂະໜາດໃຫຍ່ 10 ແຫ່ງທັງບໍລິສັດຫວຽດນາມເອງ ແລະ ບໍສັດຕ່າງປະເທດໃນຫວຽດນາມ ລວມເຖິງ YAMAHA ແລະ Grab ເຂົ້າປຶກສາຫາລືເມື່ອວັນອັງຄານ ທີ່ຜ່ານມາ ໂດຍເປັນການຂໍຄວາມຮ່ວມມືໃຫ້ຢຸດຕິການຊື້ໂຄສະນາໃນຊ່ອງ Youtube ທີ່ມີເນື້ອໃນຕໍ່ຕ້ານລັດຖະບານ ເຊິ່ງທາງການຫວຽດນາມມັກໃຊ້ຄຳວ່າ “ຂໍ້ມູນທີ່ເປັນພິດໄພ” ແທນພຶດຕິກຳການເຜີຍແຜ່ຂໍ້ມູນຂ່າວສານຕໍ່ຕ້ານລັດຖະບານ.

ຂະນະດຽວກັນ, ລັດຖະບານຫວຽດນາມ ໄດ້ສົ່ງໜັງສືແຈ້ງເຕືອນໄປຍັງບໍລິສັດອີກປະມານ 100 ແຫ່ງໃນປະເທດວ່າ ບໍ່ຄວນຊື້ໂຄສະນາ ຫຼື ຮ່ວມເຜີຍແຜ່ຜະລິດຕະພັນຂອງຕົນເອງໃນຊ່ອງ Youtube ທີ່ໜ່ວຍງານດ້ານຄວາມໝັ້ນຄົງໄຊເບີຫວຽດນາມຂຶ້ນບັນຊີດຳວ່າຜິດກົດໝາຍ ໂດຍມີລາຍງານວ່າທັງຊຳຊຸງ ແລະ ຫົວເຫວີ່ຍ ກໍ່ໄດ້ຮັບຈົດໝາຍເຕືອນດັ່ງກ່າວເຊັ່ນກັນ.

ການເຄື່ອນໄຫວດັ່ງກ່າວຂອງລັດຖະບານຫວຽດນາມ ຖືເປັນຄັ້ງທີ 2 ແລ້ວໃນເດືອນດຽວ ເຊິ່ງເປັນໄປຕາມກົດໝາຍຄວາມປອດໄພໄຊເບີສະບັບໃໝ່ ທີ່ມີຜົນບັງຄັບໃຊ້ຕັ້ງແຕ່ວັນທີ 1 ມັງກອນ ທີ່ຜ່ານມາ, ໂດຍເນື້ອໃນສຳຄັນຂອງກົດໝາຍສະບັບດັ່ງກ່າວລະບຸວ່າ ບໍລິສັດເຕັກໂນໂລຊີຕ້ອງລົບ ຫຼື ປິດກັ້ນເນື້ອໃນທີ່ລັດຖະບານຫວຽດນາມພິຈາລະນາແລ້ວວ່າ ສົ່ງຜົນຕໍ່ຄວາມໝັ້ນຄົງຂອງປະເທດ ແລ້ວມອບຂໍ້ມູນອັນຕະລາຍເຫຼົ່ານັ້ນໃຫ້ແກ່ລັດ, ນອກຈາກນີ້ ກົດໝາຍຍັງຫ້າມຜູ້ໃຊ້ອິນເຕີເນັດໃນຫວຽດນາມເຜີຍແຜ່ຂໍ້ມູນຂ່າວສານທີ່ມີເນື້ອໃນຕໍ່ຕ້ານລັດຖະບານ ຫຼື ການໃຊ້ສື່ສັງຄົມອອນລາຍເພື່ອບິດເບືອນປະຫວັດສາດ ດ້ວຍການນຳສະເໜີເນື້ອໃນທີ່ບໍ່ມີມູນຄວາມຈິງ.