ປ.ທຣຳ ບອກ ປ.ປູຕິນ ວ່າຢ່າແຊກແຊງການເລືອກຕັ້ງ ສ.ອາເມຣິກາ 2020 ທີ່ກອງປະຊຸມ G20 (ວິດີໂອ)

ສຳນັກຂ່າວຕ່າງປະເທດລາຍງານ 28 ມິຖຸນາ 2019 ວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ແລະ ທ່ານ ວະລາດິເມຍ ປູຕິນ ປະທານປະເທດລັດເຊຍ ຖະແຫຼງຕໍ່ສື່ມ່ວນຊົນກ່ອນທີ່ຈະປິດປະຕູປະຊຸມປຶກສາຫາລືສອງຝ່າຍ ນອກຮອບກອງປະຊຸດສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ໂອຊາກ້າ ປະເທດຍີ່ປຸ່ນ ໃນວັນສຸກນີ້, ໂດຍທ່ານ ໂດໂນ ທຣຳ ໄດ້ກ່າວເຖິງສອງບັນຫາສຳຄັນຄືສົງຄາມການຄ້າ ແລະ ການປົດອາວຸດນິວເຄຼຍ ແຕ່ບໍ່ໄດ້ກ່າວເຖິງຂໍ້ກ່າວຫາທີ່ວ່າລັດເຊຍແຊກແຊງການເລືອກຕັ້ງສະຫະລັດ ອາເມຣິກາ ເມື່ອປີ 2016 ທີ່ຜ່ານມາ.

ເມື່ອທັງທ່ານ ໂດໂນ ທຣຳ ແລະ ທ່ານ ປູຕິນ ກ່າວຈົບ ນັກຂ່າວກໍ່ໄດ້ຮ້ອງຖາມທ່ານ ໂດໂນ ທຣຳ ວ່າຈະກ່າວບອກໃຫ້ລັດເຊຍບໍ່ຕ້ອງແຊກແຊງການເລືອກຕັ້ງປະທານປະເທດສະຫະລັດ ອາເມຣິກາ ໃນປີ 2020 ບໍ່?.

ໂດຍທ່ານ ໂດໂນ ທຣຳ ກໍ່ຕອບວ່າ ຂ້າພະເຈົ້າຈະບອກແນ່ນອນ ທັນໃດນັ້ນທ່ານ ໂດໂນ ທຣຳ ກໍ່ຫັນກັບໄປບອກຜູ້ນຳລັດເຊຍ ພ້ອມກັບຊີ້ນິ້ວວ່າ: ຢ່າໄປຫຍຸ້ງກ່ຽວກັບການເລືອກຕັ້ງ, ກະລຸນາຢ່າເຂົ້າໄປຫຍຸ້ງກ່ຽວກັບການເລືອກຕັ້ງ ແລ້ວທ່ານ ປູຕິນ ກໍ່ສະແດງອາການຍິ້ມ.

ຫຼັງຈາກນັ້ນຜູ້ນຳທັງສອງກໍ່ໄດ້ອະທິບາຍເຖິງຂໍ້ກ່າວຫາດັ່ງກ່າວວ່າ ບໍ່ມີການສົມຄົບຄິດໃດໆ ຕາມການລາຍງານຂອງທ່ານ ໂຣເບິດ ມູນເລີ ຜູ້ອຳນວຍການ FBI ເພາະບໍ່ມີຫຼັກຖານໃດໆທີ່ຊີ້ວ່າທ່ານ ໂດໂນ ທຣຳ ກັບລັດຖະບານລັດເຊຍສົມຄົບຄິດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube