ຜູ້ນຳ ສ.ອາເມຣິກາ ຕ້ອງການພົບຜູ້ນຳເກົາຫຼີເໜືອ ໃນລະຫວ່າງທີ່ຈະຢ້ຽມຢາມເກົາຫຼີໃຕ້ ຫຼັງຈົບ G20

ສຳນັກຂ່າວຕ່າງປະເທດລາຍງານ 29 ມິຖຸນາ 2019 ວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ລົງຂໍ້ຄວາມໃນ Twitter ທີ່ສະແດງອອກຢ່າງຊັດເຈນວ່າຕ້ອງການສົ່ງສານເຖິງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໂດຍທ່ານ ໂດໂນ ທຣຳ ບອກວ່າຕອນນີ້ຕົນກຳລັງເຂົ້າຮ່ວມກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ໂອຊາກ້າ ປະເທດຍີ່ປຸ່ນ ແລະ ເມື່ອສຳເລັດການພົບປະຫາລືທີ່ສຳຄັນຫຼາຍລາຍການ ລວມເຖິງການປະຊຸມຮ່ວມກັບທ່ານ ສີ ຈິ້ນຜິງ ປະທານປະເທດຈີນແລ້ວ ຕົນຈະເດີນທາງຢ້ຽມຢາມເກົາຫຼີໃຕ້ເປັນຈຸດໝາຍຕໍ່ໄປ ແລະ ຈະເປັນໄປໄດ້ຫຼືບໍ່ ຫາກຕົນຈະໄດ້ມີໂອກາດພົບປະກັບຜູ້ນຳເກົາຫຼີເໜືອ ທີ່ເຂດປອດທະຫານ (DMZ) ເຖິງຈະເປັນພຽງການຈັບມືທັກທາຍກັນກໍ່ຕາມ.

ໃນດ້ານຂອງທ່ານ ສະຕີເຟນ ບີກັນ ທູດພິເສດ້ານວຽກງານເກົາຫຼີເໜືອຂອງລັດຖະບານສະຫະລັດ ອາເມຣິກາ ກ່າວວ່າສະຫະລັດ ອາເມຣິກາມີຄວາມມຸ່ງໝັ່ນຢາກໃຫ້ມີຄວາມຄືບໜ້າທີ່ຄູ່ຂະໜານ ຈາກຜົນກອງປະຊຸມຄັ້ງທຳອິດລະຫວ່າງຜູ້ນຳທັງສອງປະເທດ ທີ່ສິງກະໂປ ເມື່ອເດືອນມິຖຸນາ ປີທີ່ຜ່ານມາ, ເຖິງແມ່ນວ່າກອງປະຊຸມຄັ້ງທີ່ສອງ ທີ່ນະຄອນຫຼວງຮ່າໂນ້ຍ ເມື່ອເດືອນກຸມພາ ທີ່ຜ່ານມາ ຖືວ່າລົ້ມເຫຼວ ແລະ ເຮັດໃຫ້ການເຈລະຈາລະຫວ່າງສະຫະລັດ ອາເມຣິກາ ກັບ ເກົາຫຼີເໜືອໄດ້ຢຸດລົງນັບຈາກນັ້ນເປັນຕົ້ນມາ.

ຂະນະທີ່ທ່ານ ວະລາມິເມຍ ປູຕິນ ປະທານປະເທດລັດເຊຍ ພົບປະຫາລືກັບທ່ານ ມູນ ແຈ-ອິນ ປະທານປະເທດເກົາຫຼີໃຕ້ ນອກຮອບກອງປະຊຸມ G20 ຄັ້ງນີ້ເຊັ່ນກັນ ເຊິ່ງທ່ານ ປູຕິນ ກ່າວໃນຕອນໜຶ່ງວ່າຈາກການພົບປະຫາລືກັບຜູ້ນຳເກົາຫຼີເໜືອ ທີ່ເມືອງວະລາດິວັອສຕັອກ ເມື່ອທ້າຍເດືອນເມສາ ທີ່ຜ່ານມາ ລັດຖະບານເກົາຫຼີເໜືອຕ້ອງການຄວາມເຊື່ອໝັ້ນໃນເລື່ອງຄວາມປອດໄພ ແລະ ສະຖຽນລະພາບຂອງລະບອບການປົກຄອງພາຍໃນປະເທດ.

ໃນອີກດ້ານໜຶ່ງ, ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອ ຮຽກຮ້ອງໃຫ້ສະຫະລັດ ອາເມຣິກາ ແລະ ເກົາຫຼີໃຕ້ ຍົກເລີກການຊ້ອມຮົບໃນຊ່ວງລະດູຮ້ອນປີນີ້ ເຖິງແມ່ນວ່າສອງປະເທດຢືນຢັນຈະເປັນພາລະກິດທີ່ມີຂະໜາດນ້ອຍລົງກວ່າທຸກຄັ້ງທີ່ຜ່ານມາກໍ່ຕາມ ແຕ່ໃນສາຍຕາຂອງເກົາຫຼີເໜືອແລ້ວ ບໍ່ວ່າການຊ້ອມຮົບລະຫວ່າງສະຫະລັດ ອາເມຣິກາ ແລະ ເກົາຫຼີໃຕ້ຈະເປັນຮູບແບບໃດ ແລະ ຂະໜາດເທົ່າໃດ ຍ່ອມຖືເປັນການຂົ່ມຂູ່ຢູ່ດີ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube