ປະຫວັດສາດໜ້າໃໝ່ໄດ້ເກີດຂຶ້ນແລ້ວ ຜູ້ນຳ ສ.ອາເມຣິກາ ຢຽບດິນແດນ ແລະ ຈັບມືທັກທາຍຜູ້ນຳເກົາຫຼີເໜືອ

ສຳນັກຂ່າວຕ່າງປະເທດລາຍງານ 30 ມິຖຸນາ 2019 ວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຍ່າງຂ້າມເສັ້ນແບ່ງເຂດແດນທາງທະຫານ ທີ່ແບ່ງລະຫວ່າງກາງບ້ານປັນມຸນຈອມ ເຂດປອດທະຫານຂອງແຫຼມເກົາຫຼີ ໄປຍັງຝັ່ງເກົາຫຼີເໜືອ ເມື່ອຕອນບ່າຍຂອງວັນອາທິດນີ້ ຕາມເວລາທ້ອງຖິ່ນ ເພື່ອຈັບມືທັກທາຍ ແລະ ຖ່າຍພາບຮ່ວມກັບທ່ານ ຄິມ ຈອງ-ອຶຶນ ຜູ້ນຳສູງສຸດຂອງເກົາຫຼີເໜືອ ສ້າງປະຫວັດສາດເປັນຜູ້ນຳສະຫະລັດ ອາເມຣິກາໃນຕຳແໜ່ງຄົນທຳອິດ ທີ່ຂ້າມຊາຍແດນໄປຍັງເກົາຫຼີເໜືອ ເຖິງແມ່ນວ່າຈະໃຊ້ເວລາບໍ່ພໍເທົ່າໃດນາທີກໍ່ຕາມ.

ຫຼັງຈາກນັ້ນ ຜູ້ນຳສູງສຸດຂອງເກົາຫຼີເໜືອ ກໍ່ໄດ້ຍ່າງຂ້າມເສັ້ນແບ່ງເຂດແດນນມາຍັງຝັ່ງເກົາຫຼີໃຕ້ ເພື່ອຈັບມືທັກທາຍກັບທ່ານ ມູນ ແຈ-ອິນ ປະທານປະເທດເກົາຫຼີໃຕ້ ໂດຍມີການສົນທະນາກັນເລັກໜ້ອຍ, ກ່ອນທີ່ຜູ້ນຳເກົາຫຼີໃຕ້ຈະເຊີນທັງສອງໄປພົບປະຫາລືກັນທີ່ຫ້ອງຮັບຮອງພາຍໃນຕຶກສັນຕິພາບ ທີ່ຕັ້ງຢູ່ເຂດປອດທະຫານເບື້ອງເກົາຫຼີໃຕ້, ເຊິ່ງທ່ານ ໂດໂນ ທຣຳ ກ່າວວ່າຕົນຮູ້ສຶກເປັນກຽດຢ່າງຍິ່ງ ທີ່ໄດ້ມີໂອກາດພົບປະກັບທ່ານ ຄິມ ຈອງ-ອຶນ ອີກຄັ້ງ ນັບຕັ້ງແຕ່ການພົບປະຫາລືກັນທີ່ນະຄອນຫຼວງຮ່າໂນ້ຍ ປະເທດຫວຽດນາມ ເມື່ອທ້າຍເດືອນກຸມພາ ທີ່ຜ່ານມາ ແລະ ເຊື່ອໝັ້ນວ່າການພົບປະກັນຄັ້ງນີ້ ຈະເປັນຈຸດເລີ່ມຕົ້ນ ແລະ ການປູທາງໃຫ້ແຫຼມເກົາຫຼີເຂົ້າໃກ້ສັນຕິພາບຫຼາຍຍິ່ງຂຶ້ນ ພ້ອມທັງກ່າວດ້ວຍວ່າຈະເຊີນຜູ້ນຳເກົາຫຼີເໜືອຢ້ຽມຢາມນະຄອນຫຼວງວໍຊິງຕັນຢ່າງເປັນທາງການ, ໃນດ້ານຂອງທ່ານ ຄິມ ຈອງ-ອຶນ ບໍ່ໄດ້ກ່າວຫຍັງຫຼາຍ ແຕ່ສະແດງຄວາມຫວັງວ່າການພົບປະກັບຜູ້ນຳສະຫະລັດ ອາເມຣິກາ ໃນຄັ້ງນີ້ຈະເປັນການຍົກລະດັບສາຍພົວພັນ ແລະ ເຮັດໃຫ້ທັງສອງປະເທດກ້າວຂ້າມອຸປະສັກຕ່າງໆນາໆໄດ້.