ຜູ້ນຳເກົາຫຼີເໜືອກ່າວຊົມເຊີຍ ປ.ທຣຳ ວ່າ: ກ້າຫານ ແລະ ເດັດດ່ຽວ, ທີ່ກ້າວຂາຢຽບດິນແດນເກົາຫຼີເໜືອ

ສຳນັກຂ່າວຕ່າງປະເທດລາຍງານ 1 ກໍລະກົດ 2019 ວ່າ: ພາຍຫຼັງທີ່ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ສ້າງປະຫວັດສາດເປັນຜູ້ນຳສະຫະລັດ ອາເມຣິກາຢູ່ໃນຕຳແໜ່ງຄົນທຳອິດ ທີ່ຍ່າງຂ້າມເສັ້ນແບ່ງເຂດແດນທາງທະຫານ ທີ່ເສັ້ນແບ່ງກາງບ້ານປັນມຸນຈອມ ເຂດປອດທະຫານ ເຊິ່ງເປັນຊາຍແດນລະຫວ່າງສອງເກົາຫຼີ ໄປຍັງຝັ່ງເກົາຫຼີເໜືອ ເມື່ອວັນອາທິດ ທີ່ຜ່ານມາ ເພື່ອທັກທາຍກັບທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ແລະ ຫຼັງຈາກນັ້ນທັງສອງໄດ້ຍ່າງຂ້າມເສັ້ນແບ່ງເຂດກັບມາຍັງຝັ່ງເກົາຫຼີໃຕ້ ໂດຍທ່ານ ຄິມ ຈອງ-ອຶນໄດ້ທັກທາຍກັບທ່ານ ມູນ ແຈ-ອິນ ປະທານປະເທດເກົາຫຼີໃຕ້ ກ່ອນພົບປະຫາລືກັບທ່ານ ໂດໂນ ທຣຳຢ່າງບໍ່ເປັນທາງການພາຍໃນຕຶກສັນຕິພາບບ້ານປັນມຸນຈອມ ຝັ່ງເກົາຫຼີໃຕ້ ເປັນເວລາເກືອບ 1 ຊົ່ວໂມງ ແລ້ວຈຶ່ງຂ້າມກັບໄດ້ຍັງຝັ່ງເກົາຫຼີເໜືອ.

ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອ ລາຍງານກ່ຽວກັບເຫດການດັ່ງກ່າວວ່າ ນັ້ນຄືປະຫວັດສາດ ແລະ ໜ້າມະຫັດສະຈັນ ທີ່ທ່ານຜູ້ນຳຂອງເກົາຫຼີເໜືອ ແລະ ຜູ້ນຳຂອງສະຫະລັດ ອາເມຣິກາຈັບມືທັກທາຍກັນທີ່ບ້ານປັນມຸນຈອມ ເຊິ່ງເປັນສັນຍາລັກຂອງການແບ່ງແຍກສອງເກົາຫຼີຕະຫຼອດມາ ແລະ ການພົບປະກັນແບບກະທັນຫັນຄັ້ງນີ້ ເປັນໄປຕາມຂໍ້ສະເໜີຂອງທ່ານ ໂດໂນ ທຣຳ ທີ່ລົງຂໍ້ຄວາມໃນ Twitter ເມື່ອວັນເສົາ ທີ່ຜ່ານມາ ວ່າພາຍຫຼັງສຳເລັດການເຂົ້າຮ່ວມກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ໂອຊາກ້າ ປະເທດຍີ່ປຸ່ນ ຕົນຈະຢ້ຽມຢາມເກົາຫຼີໃຕ້ເປັນຈຸດໝາຍຕໍ່ໄປ ແລະ ຈະເປັນໄປໄດ້ຫຼືບໍ່ ຫາກຈະມີໂອກາດພົບກັບຜູ້ນຳເກົາຫຼີເໜືອທີ່ DMZ ເຖິງແມ່ນວ່າຈະເປັນພຽງການຈັບມືທັກທາຍກັນກໍ່ຕາມ.

 

ເຊິ່ງໃນລະຫວ່າງການພົບປະກັນ ແລະ ຈັບມືທັກທາຍກັນທີ່ເສັ້ນແບ່ງເຂດແດນທ່ານ ຄິມ ຈອງ-ອຶນ ໄດ້ກ່າວວ່າ: ຍິນດີເປັນທີ່ສຸດທີ່ໄດ້ພົບກັບທ່ານອີກຄັ້ງໜຶ່ງ ຂ້າພະເຈົ້າບໍ່ເຄີຍຄິດມາກ່ອນວ່າຈະໄດ້ພົບກັບທ່ານໃນສະຖານທີ່ແຫ່ງນີ້ ແລະ ນີ້ເປັນການກະທຳທີ່ກ້າຫານ ແລະ ເດັດດ່ຽວເປັນຢ່າງຍິ່ງ. ໃນດ້ານຂອງທ່ານ ໂດໂນ ທຣຳ ກ່າວວ່າ: ຂ້າພະເຈົ້າເຊື່ອວ່ານີ້ເປັນການສະແດງເຖິງຄວາມຕັ້ງໃນຂອງຜູ້ນຳເກົາຫຼີເໜືອ ໃນການລົບອະດີດ ແລະ ເປີດປະຕູສູ່ອະນາຄົດໃໝ່.

ນອກຈາກນີ້, ລາຍງານຂອງ KCNA ຍັງລະບຸວ່າ ຜູ້ນຳທັງສອງປະເທດໄດ້ຕົກລົງເພີ່ມການຕິດຕໍ່ກັນຢ່າງໃກ້ຊິດໃນທຸກລະດັບ ແລະ ໃນສ່ວນຂອງການເຈລະຈາປົດອາວຸດນິວເຄຼຍນັ້ນ ສະຫະລັດ ອາເມຣິກາ ແລະ ເກົາຫຼີເໜືອຈະຮ່ວມກັນສະແຫວງຫາແນວທາງໃໝ່ ເພື່ອນຳໄປສູ່ການຟື້ນຟູສາຍພົວພັນໃນດ້ານອື່ນດ້ວຍ ເພື່ອຫຼຸດຜ່ອນຄວາມເຄັ່ງຕຶງຂອງບັນຍາກາດຢູ່ແຫຼມເກົາຫຼີໂດຍລວມ ແຕ່ຍັງບໍ່ໄດ້ກ່າວເຖິງການທີ່ທ່ານ ໂດໂນ ທຣຳ ເຊີນທ່ານ ຄິມ ຈອງ-ອຶນ ຢ້ຽມຢາມນະຄອນຫຼວງວໍຊິງຕັນ, ຂະນະທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວວ່າການພົບປະຫາລືລະດັບເຈົ້າໜ້າທີ່ຂອງທັງສອງປະເທດຄັ້ງຕໍ່ໄປ ໜ້າຈະເກີດຂຶ້ນພາຍໃນເດືອນນີ້.