ກຳປູເຈຍ ປະຕິເສດການຊ່ວຍເຫຼືອ ເພື່ອປັບປຸງຖານທັບເຮືອຣຽມ ຈາກ ສ.ອາເມຣິກາ

ສຳນັກຂ່າວຕ່າງປະເທດລາຍງານ 2 ກໍລະກົດ 2019 ວ່າ: ກະຊວງປ້ອງກັນປະເທດສະຫະລັດ ອາເມຣິກາສົ່ງໜັງສື ທີ່ລົງນາມໂດຍທ່ານ ໂຈເຊັບ ເຟວເທິ ຮອງເລຂານຸການລັດຖະມົນຕີກະຊວງປ້ອງກັນປະເທດສະຫະລັດ ອາເມຣິກາ ຜູ້ຮັບຜິດຊອບວຽກງານອາຊີໃຕ້ ແລະ ອາຊີຕາເວັນອອກສຽງໃຕ້ ເຖິງສົມເດັດພິໄຊ ເສນາ ເຕຍບັນ ລັດຖະມົນຕີກະຊວງປ້ອງກັນປະເທດກຳປູເຈຍ ໂດຍຈົດໝາຍດັ່ງກ່າວປະທັບກາເມື່ອວັນທີ 24 ມິຖຸນາ 2019 ມີເນື້ອໃນສຳຄັນກ່ຽວກັບການຂໍລາຍລະອຽດເພີ່ມເຕີມຕໍ່ການທີ່ລັດຖະບານກຳປູເຈຍສົ່ງໜັງສືເຖິງລັດຖະບານສະຫະລັດ ອາເມຣິກາ ເມື່ອວັນທີ 6 ມິຖຸນາ ທີ່ຜ່ານມາ ປະຕິເສດການຊ່ວຍເຫຼືອຈາກສະຫະລັດ ອາເມຣິກາ ໃນການບູລະນະຊ່ອມແປງຖານທັບເຮືອຣຽມ ເຊິ່ງຕັ້ງຢູ່ແຂວງພະສີຫະນຸ ແຄມຝັ່ງທາງຕາເວັນຕົກສຽງໃຕ້ຂອງປະເທດ, ການປ່ຽນແປງທ່າທີຢ່າງກະທັນຫັນຂອງກຳປູເຈຍ ກໍ່ໃຫ້ເກີດຄວາມເປັນຫ່ວງຢ່າງຍິ່ງຕໍ່ສະຫະລັດ ອາເມຣິກາ ວ່າອາດນຳໄປສູ່ແຜນການທີ່ໃຫຍ່ກວ່າ ແລະ ໜ້າຈະມີສ່ວນກ່ຽວຂ້ອງກັບຊັບສິນທາງທະຫານຂອງຈີນ.

ເຊິ່ງທ່ານ ໂຈເຊັບ ເຟວເທິ ເຄີຍເດີນທາງມາຢ້ຽມຢາມຖານທັບຣຽມ ເມື່ອເດືອນມັງກອນ ທີ່ຜ່ານມາ ແລະ ປະກາດແຜນການດັ່ງກ່າວດ້ວຍຕົນເອງ ໂດຍອ້າງວ່າເປັນໄປຕາມການຂໍ້ຄວາມຊ່ວຍເຫຼືອຈາກກຳປູເຈຍ, ຂະນະທີ່ສະຖານເອກອັກຄະລັດຖະທູດສະຫະລັດ ອາເມຣິກາ ແລະ ສະຖານເອກອັກຄະລັດຖະທູດຈີນປະຈຳນະຄອນຫຼວງພະນົມເປນ ຕ່າງກໍ່ປະຕິເສດທີ່ຈະໃຫ້ຄວາມຄິດເຫັນຕໍ່ບັນຫາດັ່ງກ່າວ, ສ່ວນໃນດ້ານຂອງກະຊວງປ້ອງກັນປະເທດກຳປູເຈຍອອກຖະແຫຼງການ ວ່າງົບປະມານການຊ່ວຍເຫຼືອດ້ານຄວາມໝັ້ນຄົງທີ່ລັດຖະບານສະຫະລັດ ອາເມຣິກາມອບໃຫ້ແກ່ກຳປູເຈຍບໍ່ໄດ້ສູນຫາຍໄປໃສ ພຽງແຕ່ລັດຖະບານກຳປູເຈຍຕ້ອງການນຳໄປລົງທຶນໃນດ້ານຄວາມໝັ້ນຄົງອື່ນ, ສ່ວນບັນຫາຖານທັບຣຽມນັ້ນ ຈະມີການປ່ຽນແປງໃນອະນາຄົດ ໂດຍບໍ່ມີການໃຫ້ລາຍລະອຽດເພີ່ມເຕີມ.

ປັດຈຸບັນຈີນມີຖານທັບຂະໜາດໃຫຍ່ຢູ່ທີ່ຈິບູຕີ ທາງພາກຕາເວັນອອກຂອງທະວີບອາຟຣິກາ ຖືເປັນຖານທັບນອກປະເທດແຫ່ງທຳອິດຂອງກອງທັບປົດປ່ອຍປະຊາຊົນຈີນ ເຊິ່ງກຳປູເຈຍຖືເປັນໜຶ່ງໃນພັນທະມິດໃກ້ຊິດທີ່ສຸດຂອງຈີນໃນອາຊີຕາເວັນອອກສຽງໃຕ້ ແລະ ລັດຖະບານຈີນກໍ່ໄດ້ເພີ່ມການຊ່ວຍເຫຼືອຫຼາຍດ້ານໃຫ້ແກ່ລັດຖະບານພາຍໃຕ້ການນຳຂອງສົມເດັດຮຸນ ເຊນ ທີ່ກຳລັງຖືກກົດດັນຢ່າງໜັກຈາກຕາເວັນຕົກ ແຕ່ຜູ້ນຳກຳປູເຈຍເຄີຍປະກາດເມື່ອປີທີ່ຜ່ານມາ ວ່າຈະບໍ່ມີທາງໃຫ້ຕ່າງປະເທດເຂົ້າມາຕັ້ງຖານທັບໃນປະເທດ ໂດຍຂະນະນັ້ນມີກະແສຂ່າວວ່າຈີນກຳລັງຂຸ້ນຂ້ຽວ ໃນການຂໍ້ຕັ້ງຖານທັບເຮືອທີ່ແຂວງເກາະກົງ.