ລູກລ້ຽງອະດີດນາຍົກມາເລເຊຍ ຂຶ້ນສານຄະດີຟອກເງິນລັດເງິນຫຼວງ ໄປສ້າງຮູບເງົາ

ສຳນັກຂ່າວຕ່າງປະເທດລາຍງານ 5 ກໍລະກົດ 2019 ວ່າ: ທ້າວ ຣິຊາ ອາຊິສ ລູກບຸນທຳຂອງທ່ານ ນາຈິບ ຣາຊັກ ອະດີດນາຍົກລັດຖະມົນຕີມາເລເຊຍ ໄປຍັງສານຊັ້ນສູງ ໃນນະຄອນຫຼວງກົວລາລຳເປີ ເພື່ອຂຶ້ນສານນັດທຳອິດ ພາຍຫຼັງທີ່ໄອຍະການສັ່ງຟ້ອງຈຳເລີຍ 5 ຂໍ້ຫາ ກ່ຽວກັບການຟອກເງິນ ເຊິ່ງເປັນການຍັກຍອກມາຈາກກອງທຶນພັດທະນາແຫ່ງຊາດ (1MDB) ທີ່ທ່ານ ນາຈິບ ຣາຊັກ ສ້າງຕັ້ງຂຶ້ນໃນປີ 2009.

ເຊິ່ງພະນັກງານສືບສວນສອບສວນກ່າວຫາທ້າວ ຣີຊາ ອາຊິສ ເຊິ່ງເປັນຜູ້ຮ່ວມສ້າງຕັ້ງບໍລິສັດຮູບພາບ Red Granite Pictures ແລະ ມີບົດບາດໃນຖານະຜູ້ອຳນວຍການຮ່ວມສ້າງຮູບເງົາຮໍລີວູດເລື່ອງດັງ The Wolf of Wall Street ເມື່ອປີ 2013 ນຳສະແດງໂດຍ ລີໂອ ນາໂດ ດິຄາປຼິໂອ ໂອນຖ່າຍເງິນ 248 ລ້ານໂດລາສະຫະລັດ ຈາກ 1MDB ແລ້ວໃຊ້ເງິນຈຳນວນດັ່ງກ່າວເປັນທຶນໃນການສ້າງຮູບເງົາເລື່ອງດັ່ງກ່າວ, ຂະນະທີ່ມີລາຍງານຕື່ມວ່າ ກະຊວງຍຸຕິທຳຂອງສະຫະລັດ ອາເມຣິກາ ອາດຍື່ນຄຳຮ້ອງຂໍໃຫ້ທາງການມາເລເຊຍສົ່ງຕົວທ້າວ ຣີຊາ ອາຊິສ ເປັນຜູ້ຮ້າຍຂ້າມແດນ ພາຍຫຼັງທີ່ບໍລິສັດ Red Granite Pictures ປະນີປະນອມຍອມຄວາມນອກສານກັບລັດຖະບານສະຫະລັດ ອາເມຣິກາ ດ້ວຍຂໍ້ຕົກລົງທີ່ຍັງບໍ່ມີການເປີດເຜີຍ.

ເຖິງຢ່າງໃດກໍ່ຕາມ, ຈຳເລີຍໄດ້ໃຫ້ການປະຕິເສດທຸກຂໍ້ກ່າວຫາ, ຂະນະທີ່ສານໃຫ້ປະກັນຕົວດ້ວຍຫຼັກຊັບຄ້ຳປະກັນ 1 ລ້ານຣິງກິດ ແລະ ຢຶດໜັງສືຜ່ານແດນ, ເຊິ່ງຖານຄວາມຜິດໃນແຕ່ລະຂໍ້ຫາທີ່ໄອຍະການຮ້ອງຟ້ອງທ້າວ ຣິຊາ ອາຊິສ ມີບົດລົງໂທດສູງສຸດຈຳຄຸກ 5 ປີ ແລະ ປັບໃໝສູງສຸດ 5 ລ້ານຣິງກິດ, ສ່ວນທ່ານ ນາຈິບ ຣາຊັກ ກໍ່ຖືກດຳເນີນຄະດີເຊັ່ນກັນ ເມື່ອບໍ່ດົນພາຍຫຼັງປະລາໄຊການເລືອກຕັ້ງເມືຶ່ອເດືອນພຶດສະພາ ປີທີ່ຜ່ານມາ ໂດຍຖືກກ່າວຫາຫຼາຍກວ່າ 40 ຂໍ້ກ່າວຫາ ກ່ຽວກັບການຍັກຍອກເງິນ 681 ລ້ານໂດລາສະຫະລັດຈາກ 1MDB ເຊິ່ງຜູ້ກ່ຽວຍັງຄົງຢືນຢັນປະຕິເສດທຸກຂໍ້ກ່າວຫາເຊັ່ນກັນ.