ກອງທັບປະຊາຊົນລາວ ປະກາດສ້າງຕັ້ງ “ກອງບັນຊາການທະຫານອາກາດ” ຂຶ້ນຢ່າງເປັນທາງການ

ໜັງສືພິມກອງທັບປະຊາຊົນລາວລາຍງານວ່າ: ກະຊວງປ້ອງກັນປະເທດ ໄດ້ຈັດຕັ້ງພິທີປະກາດສ້າງຕັ້ງ ແລະ ການແຕ່ງຕັ້ງຄະນະກອງບັນຊາ ການທະຫານອາກາດ ກອງທັບປະຊາຊົນລາວຂຶ້ນຢ່າງເປັນທາງ ການໃນຕອນເຊົ້າຂອງວັນທີ 16 ກໍລະກົດ 2019 ນີ້, ຢູ່ທີ່ກະຊວງປ້ອງກັນປະເທດ ໂດຍການໃຫ້ ກຽດເຂົ້າຮ່ວມເປັນປະທານຂອງທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການ ເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ທ່ານ ພົນໂທ ສຸວອນ ເລືອງບຸນມີ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະ ເທດ, ຫົວໜ້າກົມໃຫຍ່ເສນາທິການກອງທັບ, ມີບັນດາສະຫາຍ ຄະນະນໍາກະຊວງປ້ອງກັນປະເທດ, ຄະນະນໍາກົມໃຫຍ່, ຫ້ອງວ່າການກະຊວງ, ຄະນະພັກ-ຄະນະ ບັນຊາກົມກອງອ້ອມຂ້າງກະຊວງ, ເຂົ້າຮ່ວມ.

ໃນພິທີ ທ່ານ ພົນຕີ ປະສິດ ທ່ຽງທໍາ ກຳມະການຄະນະພັກ ກະຊວງປ້ອງກັນປະເທດ, ຮອງຫົວໜ້າກົມໃຫຍ່ເສນາທິການ ກອງທັບໄດ້ຂຶ້ນຜ່ານດໍາລັດ ຂອງນາຍົກລັດຖະມົນຕີແຫ່ງ ສປປ.ລາວ ສະບັບເລກທີ 19/ນຍ ລົງວັນທີ 30 ມັງກອນ 2019 ວ່າດ້ວຍການອະນຸຍາດໃຫ້ສ້າງຕັ້ງກອງບັນຊາການທະຫານອາກາດ ກອງທັບປະຊາຊົນລາວ ອັກສອນຫຍໍ້ ກບອ ຢູ່ພາຍໃຕ້ການ ຊີ້ນໍາ-ນໍາພາໂດຍກົງຮອບດ້ານ ຂອງກະຊວງປ້ອງກັນປະເທດ.

ຈາກນັ້ນ ທ່ານ ພົນຕີ ສອນທອງ ພົມລາວົງ ກຳມະການຄະນະພັກກະຊວງ, ຮອງຫົວໜ້າກົມໃຫຍ່ການເມືອງກອງທັບໄດ້ ຂຶ້ນຜ່ານດໍາລັດຂອງນາຍົກລັດຖະມົນຕີ ສະບັບເລກທີ 183/ນຍ ລົງວັນທີ 25 ມິຖຸນາ 2019 ວ່າດ້ວຍການແຕ່ງຕັ້ງຜູ້ບັນຊາການທະຫານອາກາດກອງທັບປະຊາຊົນລາວ ໂດຍໄດ້ແຕ່ງຕັ້ງ ທ່ານ ພັນເອກ ຄໍາເຫຼັກ ແສງພະຈັນ ເປັນຜູ້ບັນຊາການທະຫານອາກາດກອງທັບປະຊາຊົນລາວ. ໄດ້ຜ່ານດໍາລັດຂອງນາຍົກລັດຖະ ມົນຕີສະບັບເລກທີ 182/ນຍ ລົງວັນທີ 25 ມິຖຸນາ 2019 ວ່າ ດ້ວຍການແຕ່ງຕັ້ງຫົວໜ້າການເມືອງ ໂດຍໄດ້ຕົກລົງແຕ່ງຕັ້ງ ທ່ານ ພົນຈັດຕະວາ ພູຫຼວງ ບົວພະຈັນ ເປັນຫົວໜ້າການເມືອງກອງບັນຊາການທະຫານອາກາດ ກອງທັບປະຊາຊົນລາວ ແລະ ຜ່ານຂໍ້ຕົກລົງຂອງ ກະຊວງປ້ອງກັນປະເທດ ເລກທີ 1690/ກປທ ລົງວັນທີ 07 ພຶດສະພາ 2019 ວ່າດ້ວຍການແຕ່ງຕັ້ງຄະນະບັນຊາກອງບັນຊາການທະຫານອາກາດ ກອງທັບປະຊາຊົນລາວ ໂດຍໄດ້ແຕ່ງຕັ້ງ ທ່ານ ພັນເອກ ຄໍາຫຼ້າ ສິມມະວົງ ເປັນຮອງຮັບຜິດຊອບວຽກງານການ ເມືອງ ທັງເປັນຫົວໜ້າຫ້ອງການເມືອງ, ທ່ານ ພັນເອກ ພັນທະ ມິດ ວໍລະບຸດ ເປັນຮອງຮັບຜິດຊອບວຽກງານອົບຮົມການບິນ ທັງເປັນຫົວໜ້າຫ້ອງອົບຮົມການບິນ, ທ່ານ ພັນໂທ ບຸນດອມ ບຸບຜາລິວັນ ເປັນຮອງຮັບຜິດຊອບວຽກງານເສນາທິການ ທັງເປັນຫົວໜ້າຫ້ອງເສນາທິການ, ທ່ານ ພັນໂທ ທອງພັນ ບຸນສະຫວັດ ເປັນຮອງຮັບຜິດຊອບວຽກງານພະລາທິການ ທັງເປັນຫົວໜ້າຫ້ອງພະລາທິການ ແລະ ທ່ານ ພັນໂທ ສອນທອງ ແກ້ວຈັນດາ ເປັນຮອງຮັບຜິດຊອບວຽກງານເຕັກນິກ ທັງເປັນຫົວຫນ້າຫ້ອງເຕັກນິກກອງບັນຊາການທະຫານອາກາດ ກອງທັບປະຊາຊົນລາວ.

ໃນພິທີອັນມີຄວາມໝາຍສໍາຄັນນີ້, ທ່ານ ພົນເອກ ຈັນສະ ໝອນ ຈັນຍາລາດ ກໍ່ໄດ້ໃຫ້ກຽດ ໂອ້ລົມໂດຍຍົກໃຫ້ເຫັນຄວາມສໍາຄັນຂອງການປະກາດສ້າງຕັ້ງກອງບັນຊາການທະຫານອາກາດ ກອງທັບປະຊາຊົນລາວ ແມ່ນເປັນຂີດໝາຍອັນດີແຫ່ງການເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບຂອງ ກອງທັບປະຊາຊົນລາວ ເວົ້າລວມ, ເວົ້າສະເພາະແມ່ນເຫຼົ່າຮົບທະຫານອາກາດ ເພື່ອກ້າວສູ່ລະບຽບແບບແຜນ ແລະ ທັນສະໄໝ ຮັບປະກັນເຮັດສໍາເລັດໜ້າທີ່ການເມືອງຂອງເຫລົ່າຮົບໃນສະເພາະໜ້າ ແລະ ຍາວນານ.

ປັດຈຸບັນ ພັກ-ລັດຖະບານ ກໍ່ຄືກະຊວງປ້ອງກັນປະເທດໄດ້ ປະກອບພາຫະນະ-ເຕັກນິກ ການທະຫານທີ່ທັນສະໄໝຈໍານວນໜຶ່ງໃຫ້ບັນດາເຫຼົ່າຮົບວິຊາສະເພາະໄດ້ຄຸ້ມຄອງນໍາໃຊ້ ແລະ ເຄື່ອນໄຫວໜ້າທີ່ການເມືອງຂອງຕົນ, ໃນນັ້ນທະຫານອາກາດກໍ່ແມ່ນເຫຼົ່າຮົບໜຶ່ງທີ່ໄດ້ ຮັບການປະກອບພາຫະນະ-ເຕັກນິກທີ່ທັນສະໄໝ ສະນັ້ນ ຈຶ່ງມີຄວາມຈໍາເປັນຕ້ອງໄດ້ປັບປຸງຄືນລະບົບການຈັດຕັ້ງ ແລະ ປະກອບບຸກຄະລາກອນໃຫ້ເປັນລະບົບຄົບຊຸດ ສາມາດຮັບປະກັນໃນການຄຸ້ມຄອງນໍາໃຊ້ພາຫະນະ ເຕັກນິກທີ່ປະກອບໃຫ້ເກີດປະໂຫຍດສູງສຸດ.

ທ່ານລັດຖະມົນຕີກະຊວງປ້ອງກັນປະເທດໄດ້ເນັ້ນໜັກ ແລະ ຮຽກຮ້ອງໃຫ້ບັນດາສະຫາຍທີ່ ຖືກແຕ່ງຕັ້ງຕ້ອງກໍາແໜ້ນທີ່ຕັ້ງ, ພາລະບົດບາດ, ໜ້າທີ່ຄວາມຮັບຜິດຊອບ ແລະ ຈັດຕັ້ງເຄື່ອນໄຫວໃຫ້ຖືກຕ້ອງ, ເອົາໃຈໃສ່ຊີ້ນໍາ ແລະ ປະສານກັບຂະແໜງການທີ່ ກ່ຽວຂ້ອງໃນການຄົ້ນຄວ້າປະກອບບຸກຄະລາກອນ, ພາຫະນະ-ເຕັກນິກ ແລະ ອາວຸດຍຸດໂທປະ ກອນໃຫ້ຄົບຖ້ວນຕາມຫຼັກການປະກອບຂອງກອງທັບ, ຕັ້ງໜ້າປັບປຸງກໍສ້າງກົມກອງໃຫ້ເຂັ້ມແຂງ ໜັກແໜ້ນ ແລະ ເພີ່ມທະວີພົວພັນຮ່ວມມືກັບບັນດາປະເທດ ເພື່ອນມິດຍຸດທະສາດ ແລະ ສາກົນ ເພື່ອຍາດແຍ່ງເອົາການສະໜັບສະໜູນ, ບົດຮຽນ ແລະ ປະສົບການອັນດີມາໝູນໃຊ້ເຂົ້າໃນການພັດທະນາກົມກອງ, ເຫຼົ່າຮົບກໍ່ຄື ກອງທັບໃຫ້ນັບມື້ທັນສະໄໝ.