ຜູ້ນຳເກົາຫຼີເໜືອ ຢ້ຽມຢາມໂຄງການສ້າງເຮືອດຳນ້ຳລຳໃໝ່

ສຳນັກຂ່າວຕ່າງປະເທດລາຍງານ 23 ກໍລະກົດ 2019 ໂດຍອ້າງອີງຈາກການລາຍງານຂອງສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອ ວ່າທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໄດ້ຢ້ຽມຢາມເພື່ອຕິດຕາມຄວາມຄືບໜ້າຂອງໂຄງການສ້າງເຮືອດຳນ້ຳລຳໃໝ່ ແລະ ໄດ້ເນັ້ນໜັກໃຫ້ເຈົ້າໜ້າທີ່ດ້ານຄວາມໝັ້ນຄົງທຸກໜ່ວຍງານທີ່ກ່ຽວຂ້ອງ ຈົ່ງໃສ່ໃຈການຍົກລະດັບຄວາມສາມາດທາງທະຫານຂອງຕົນເອງ, ເຊິ່ງແນ່ນອນວ່າລາຍງານຂອງ KCNA ບໍ່ໄດ້ລະບຸວ່າການສ້າງເຮືອລຳດັ່ງກ່າວຢູ່ສະຖານທີ່ໃດ ແລະ ການລົງຢ້ຽມຢາມຂອງຜູ້ນຳໃນຄັ້ງນີ້ເກີດຂຶ້ນເມື່ອໃດ,​ ແຕ່ເປີດເຜີຍພຽງວ່າ ໂຄງການກໍ່ສ້າງເຮືອດຳນ້ຳລຳນີ້ເກີດຂຶ້ນຕາມຄວາມສົນໃຈພິເສດຂອງທ່ານ ຄິມ ຈອງ-ອຶນ ແລະ ເມື່ອການກໍ່ສ້າງສຳເລັດຈະປະຈຳການຢູ່ໃນທະເລນອກຝັ່ງເບື້ອງຕາເວັນອອກຂອງປະເທດ.

ຂະນະທີ່ມີການວິເຄາະວ່າ ລາຍງານດັ່ງກ່າວຄືການສົ່ງສັນຍານເຖິງທຸກຝ່າຍພາຍນອກທີ່ກ່ຽວຂ້ອງ ໂດຍສະເພາະສະຫະລັດ ອາເມຣິກາ ວ່າລັດຖະບານເກົາຫຼີເໜືອຍັງມີຄວາມສາມາດໃນການພັດທະນາໂຄງການດ້ານອາວຸດ ເຊິ່ງລວມເຖິງຂີປະນາວຸດແບບຍິງອອກຈາກເຮືອດຳນ້ຳ (SLBM), ເຊິ່ງອ້າງອີງຈາກຂໍ້ມູນຂອງກະຊວງປ້ອງກັນປະເທດເກົາຫຼີໃຕ້ ເມື່ອປີທີ່ຜ່ານມາ ລະບຸວ່າເກົາຫຼີເໜືອມີເຮືອດຳນ້ຳ ແລະ ຍານພາຫະນະໃຕ້ທະເລປະມານ 70 ລຳ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube